EFEES 4

1Náami íñj'endu ti kalawuuun bonde, íñje eekulee u aŋarkeyi naane iŋ'irok bija t'Anahaan u: buroŋ boonuun bíyemi naane t'Atambatun ámaŋie du h'aruwuun hu. 2Ko kireyi fe áritetianooro, árineeni yooŋ, abe n'aŋ'árimuñ. Árimaŋioori, abe n'aŋ'árimuñalool. 3Árihin wáhowah ariijok ti naane Búwejet Beenabe bu buwunuun i aŋarkeyi naane árihinahin t'afeeneŋ. Nu buwunuun yooŋ ariiriiko ti káasuumaay kéegiilooluun ku. 4Eni efeeneŋ taŋ ebaje fu, yeemo fu kéeyilene ku; Búwejet Beenabe bifeeneŋ taŋ bibaje fu yooŋ; abe Atambatun, bite eyakar efeeneŋ taŋ b'aruwuun fu. 5Anahaan afeeneŋ taŋ abaje fu, ni káyilen kifeeneŋ yooŋ, ni kaboste kifeeneŋ taŋ. 6Atambatun afeeneŋ taŋ abaje fu, eeemo u Faaf ite ésuk i ereyi fe. Ondu t'etiir doon areyi fe, aŋ'arok t'ánoan, ondu yooŋ t'ánoan. 7Bare huruw fe t'úne abajabaj b'Atambatun awuno bu ti kajaku koone, naane yooŋ ti Kiris aliike du n'awun úne. 8Múniyo iyu yooŋ i Míkiñjin mu musoke fu te o. Meenaan: «H'asiree hu bija t'etiir-t'etiir, ajaja n'enatoora keejokee, abe n'awun kúŋgowulan ku bike.» 9Náami naŋ neemo fu «h'asiree hu t'etiir»? Aamo fu ajabajaba áwanein níbahindaa-hindaa etaam i. 10An éewaneina u, o aamo fu yooŋ eesiree u bija t'etiir-t'etiir kaanuku eehoojan aduna i ereyi fe. 11Akina awune fu kúŋgowulan ku kéeyemi bakaake epotor, bakaake eyiŋana yite Atambatun, bakaake ewaaraa Hirim Heetoofe hu, bakaaku ni káyemi égila yite bakan kite Atambatun, abe n'iŋi kaliikeniin hirim hoone. 12Awunawun bondu bakan k'Atambatun akino ku kaanuku man ni káyini káhinu burok bite káyokunan bakaaku kéeyilene ku. Iyu, keeemo ku eni yite Kiris, abe ni káyilen kareyi fe n'iŋi kahaŋ kayanu ti káyilen ku. 13Úreyi fe yooŋ n'uŋ'úyini káhinu t'afeeneŋ ti káyilen ku, abe t'afeeneŋ yooŋ n'úmeyi Añi ite Atambatun. N'uŋ'úhaat ti káyilen ku, abe n'uŋ'úre ti kareyi kite Kiris. 14Náami ut'uŋk'úyemi biñi. Ut'uŋk'úyemi naane busoona bu móhujo miñake tánotan ti han hu, man yooŋ b'eyam i etendeŋane. Ejuusa i yooŋ it'iŋki kabuut úne ni báhamin bimbi kanoŋk kéetuut. 15Bare uf'uŋ'úsokoor múniyo mu, abe n'úmaŋioori yooŋ, n'uŋ'úhaat tu doon areyi fe ti Kiris eeemo u hikaw hite kéeyilene ku. 16O ákinineŋe fu eni i ereyi fe n'eŋ'ejokoor ayan faŋ tu súkulinu su seeemo du. Arko doon fe deeemo te yo déehin burok bite te do, n'eŋ'ehaat ti kámaŋioori ku. 17Bonde b'ija fu kasokuuun, abe íñje kajoku te bo alitee tu huruwu hite Anahaan u: buroŋ boonuun itim'iŋki bíyemi naane bite kéeyilenut ku. Biyinoor booniin bibajut éñjeriŋ, 18abe kájokaariit doon fe. Kabajut buroŋ b'Atambatun bamb'awun, ábuki kámeyiit doon tus, abe ñúwejet ñooniin yooŋ iŋi ñíbaani túruk. 19Kámeyiit bufuño; biyinoor booniin fe bite káhinu buroon bite bufurukato, abe káraanaariit yooŋ káhinu baabu buroon béefuñinanie bu. 20Bare aruun, bóndiiit b'ariliikenee fu ti Kiris! 21Ábuki bukuuramkuur kaanuku arijamajam huruwu hoone, abe ariliikeneeliiken múniyo meeemo mu ti Yesu, bare kereŋ? 22Náami ariwarawar kawasu manoŋkar moonuun mítiyar mu. Manoŋkar mondu mummu múyoosanaaniuun tu wúfaŋi wuwu wubuutuun múbujuunbuj fu yéeni. 23Biyinoor boonuun buwarawar káyemi bíyeni. 24Náami arisiimo manoŋkar míyeni m'Atambatun áwuwanee mu naane ámaŋie i, man n'aribaj buroŋ béejube abe ni binab yooŋ béenuutina tu múniyo mu. 25Iŋ'ite ho aamo fu atum'aŋ'arijuus! Huruw-ruw fe asok áwiyo bite bu nu múniyo, ábuki úhinahin t'afeeneŋ. 26Af'ariyiŋat, arinaŋ toko kikawuun, atum'aribin ariney ti kaahoofoor. Atum'aŋ'ariŋotan kayiŋat koonuun. 27Atum'ariwun Setani bítim t'aruun. 28An eeemo ákuw araan kákuwat; anoŋk éesuwat aŋ'arok burok beejake éekuumanooro, éeyini yooŋ káyokunan keebajut ku. 29Atum'árihamin báhamin beejakut; arisok kep báhamin beebaje éñjeriŋ bite káyokunan ésuk i ti bisawula booniin keehaŋ kayanu ti káyilen ku, abe nu butoof yooŋ kiŋki kajamatanuun. 30Atum'árihin Búwejet bite Atambatun Beenabe bu béetaañian. Bo b'Atambatun ásike fu éehin t'aruun naane éluwenuma bija tu hunak h'aja hu kafakan koonuun akuur but. 31Arinuutan méetike meeemo mu tu suhol soonuun, ni kajoku an tu suhol soonuun, ni kayiŋat, nu sulob, ni bílafatinool, ni bánafut bánoban. 32Áriyemi bakan keejake, abe n'árineeni. Ariboŋketoor naane Atambatun aboŋketuun i ti Kiris.

will be added

X\