EFEES 3

1Iŋ'ite ho aamo fu iŋ'ilaw Atambatun, íñje Pool eekulee u aŋarkeyi naane iŋ'irok bija ti Yesu Kiris kaanuku íiyokunanuun, aruun keenooto ku Esuwif. 2Mánoman arijamajam kaanuku Atambatun ti kajaku koone, asaanamsaan burok bite káhinu bija t'aruun. 3Atambatun afeeñamfeeñ éehinam íimeyi boone béenuusee bu. (Ikiñjakiñj bo memee íihamin te bo diŋgilis. 4Af'arijaŋga b'ikiñje bu, n'aŋ'árinandin b'ímeyie bu ti béenuusee bu, beesokee bu iŋ'ite hu Kiris.) 5Kóŋkeyin, Atambatun áwufoorut kúŋgowulan ku béenuusee bondu. Bare hahiye, áhinahin Búwejet boone béewufoor bo epotor yeene keenabe ku, n'eyiŋana yeene yooŋ. 6Béenuusee bondu iye i bije fu: makamu keenooto ku Esuwif káyilenayilen ti Hirim Heetoofe hu, boko yooŋ kabaju húrub t'ebaj y'Atambatun anaŋe i bija t'Esuwif i. Káhinahin t'afeeneŋ n'Esuwif i, abe boko yooŋ kamaatu ti b'Atambatun aane bu o káhinu bija ti bakan koone tu huruwu hite Yesu Kiris. 7Atambatun ti kajaku koone, asejanamsejan burok kaanuku iŋ'isok ésuk i Hirim Heetoofe hu. Awunamwun bondu ti sembe soone. 8Íñj'eemo fu araan u tej ti bakan kite Atambatun. Bare íñje a ajuke fu ti kajaku koone, kaanuku iŋ'ibin iwaare keenooto ku Esuwif Hirim Heetoofe hu, hite ebaj yéehabanaariit i yéenuutina i ti Kiris. 9Atambatun éewuwane u doon areyi fe afiyafiya ánuus béeyemie bu ti hikawo. Náami asaanamsaan yooŋ kaanuku íiwufoor ésuk i akuur but buŋ b'aja fu bo káhinu, 10kaanuku man emalaka i keeemo ku t'etiir, n'eseef yeeniin ifi kajuk kéeyilene ku, ni kámeyi naane búwesinato boone beemo i fe. 11Bondu bibajabaj naane t'Atambatun afiye du aane o káhinu bo, abe hahiye áhina bo ti Yesu Kiris Anahaan ite úne. 12Naane úhine i t'afeeneŋ ni Kiris, abe n'úyilen yooŋ te o, úbaja bítim bite bisiiŋo hágila Atambatun n'eyakar, kikaw úne káayaŋgin. 13Náami íñj'endu ti kaanuuun siheluun utum súbujo iŋi naane eemo i ti kajuku sílaam uŋu hoonuun hu. So site káwutiyenuun kániku. 14Iŋ'ite ho h'if'íyemi ti kalawu bija t'aruun, iŋ'íjiŋgitan hágila Atambatun Faaf u, 15o éekinie u butoŋ bánoban fe t'etiir bufor bu ni t'etaam i. 16Ánikanik areeŋ ñaaj, abe abajabaj yooŋ doon areyi fe. Náami íñj'endu ti kalawio kaanuku man n'áhin Búwejet boone beewun siheluun sembe. 17Atambatun áhin Kiris eekin tu suhol soonuun aŋarkeyi naane áriyilenayilen te o. Áhinuun yooŋ áriimaŋioori. Af'árimaŋioori, n'aŋ'arilooñ te o, abe n'aŋ'arinut yooŋ buroŋ boonuun te o. 18N'aŋ'áriyini yooŋ kánandin, aruun ni bakan kite Atambatun fe, buŋ bi kámaŋi kite Kiris kiŋabe fu, buŋ bi kikambe fu, buŋ bi kiliite fu, nu buŋ bu kúsulie fu. 19Hee, n'aŋ'áriyini kámeyi kámaŋi koone keehaŋe ku doon fe du húŋgowulan ayino kámeyi, man buroon b'Atambatun ákinie bu fe ni bíyemi yooŋ boonuun bu. 20Atambatun, ti sembe soone sunsu surok t'úne, áyinooni káhinu ahahan doon fe d'úlawo, man yooŋ d'úyinoore. 21Aja ákini ko kireyi fe ni hiraanu kániku ku tu buroŋ bite kéeyilene ku, ni ti Yesu Kiris! Amiin.

will be added

X\