EFEES 2

1Hítiyar hu, árimoomi t'Atambatun naane bakan keekete aŋarkeyi naane aŋ'árijuum, abe yooŋ aŋ'arihoofoor. 2Aŋ'arineefan yéeni tu kunoŋk kite bakate ku t'etaam ye. Aŋ'árijamaani t'aseef ite sembe seejakut su seeemo su t'etiir. Aseef ondu aamo fu búwejet beejakut bu bumbu burok iye ti kéejeŋginaariit ku Atambatun. 3Hítiyar hu, úne fe kaafeeneŋ ku nu boko, ábuki wúfaŋi wute w'úne taŋ w'uf'úŋes, katoofu kite k'úne yooŋ k'uf'úyinoor. Makamu iye u úyemiaanie fu, Atambatun yooŋ ayiŋatayiŋat t'úne naane ayiŋate i ti bakaaku. 4Bare Atambatun aŋ'ayubiyen úne dómbokun, abe n'átumb ámaŋi úne naane, asooñen 5h'aamo hu te o úketa iŋi kájuumu kite k'úne, n'áhin úne núusooñ úroŋ ni Kiris. Kajaku kite Atambatun kíkinineŋe fu n'arifak. 6Atambatun aritanaritan úne t'eket i aŋarkeyi naane úhinahin t'afeeneŋ ni Yesu Kiris; ahaban, n'áhin úne núuriiko ne o t'afeeneŋ tu bufor bu. 7Náami h'áwufoore hu úne ti Yesu Kiris kajaku koone, am aamo yooŋ ti káwufoor bakate ku kuwaatu kaanuku aŋ'ayubiyen ahahee. 8Múniyo iŋi kajaku kite k'Atambatun h'arifake fu, ábuki áriyilenayilen te o. T'áruuniit tu bondu búnuutina, Atambatun awunuun fu bo. 9Tu kunoŋk kóonuuniit yooŋ tu búnuutina. Náami an t'aruun atum'amak. 10Ábuki Atambatun aroke fu úne. Naane úhine i t'afeeneŋ ni Yesu Kiris híkinineŋe fu n'áwuwan úne kaanuku ko kireyi fe n'uŋ'úhin kunoŋk keejake. Kunoŋk kondu, Atambatun afiyafiya afare ko kaanuku uŋ'úbin úhin ko. 11Aruun keenooto ku Esuwif ti kabukiee, áribaŋino naane áriyemie i hítiyar hu. Esuwif i iŋi katey karam, abe doon dondu dindi káhin ti siniiin barebare díkinineŋe fu ifi kámaŋi karuwuuun, n'iŋi kaanuun «keeteyit ku karam». 12Áribaŋino kaanuku kóŋkeyin arikambakamb Kiris; árigiiloolutee ti bakate ku Israyel; árigiiloolutee yooŋ tu wujamoor w'Atambatun ajamoore wu nu boko. Árimoomi naane emoosoora. Arikinakin t'etaam ye, bare aribajut yéeni eyakar, árimeyiit yooŋ Atambatun. 13Bare hahiye, naane aamo i árihina t'afeeneŋ ni Yesu Kiris, aruun kéekambaanie ku Atambatun aŋkut arikambo iŋ'ite halan hite Kiris héeyuusee hu. 14Akina aamo fu káasuumaay kite k'úne, akina éehine u Esuwif i ni keenooto ku Esuwif kéehin t'afeeneŋ. H'ásike hu enio awun n'aweleje fu hiñaan hite kahuufoor ku héewaajinooriin hu. 15Akina aneyane fu Eluwa yite Moyis, nu buroon b'esoke bu kaanuku iŋi bíhinee. Iyu a akuukane fu Esuwif i ni keenooto ku Esuwif kéeyemi te o an afeeneŋ áyeni, káasuumaay keebaj. 16H'akete hu t'ekuruwa i, áhinahin Esuwif i ni keenooto ku Esuwif keebukan n'Atambatun. Toko yooŋ t'anuutane fu kahuufoor kéeyemie ku t'etutiin, éehiniin kéehin t'afeeneŋ. 17Abinabin kawaare ésuk i ereyi fe Hirim Heetoofe hite káasuumaay ku: aruun keenooto ku Esuwif keekambe ku Atambatun, n'Esuwif i keeloho ku yooŋ. 18Ti Kiris t'úyino fu kaŋaasu úreyi fe, Esuwif i ni keenooto ku Esuwif, núusiiŋo hágila Faaf u ti sembe site Búwejet bifeeneŋ Beenabe bu. 19Náami aruun keenooto ku Esuwif, aŋkut áriyemi emoosoora, man yooŋ bakan kéenuutina tike tiŋ. Hahiyu árihina t'afeeneŋ ni bakan kite Atambatun, aruun bakate tu butoŋ boone. 20Árimoomi naane súmuul site enuuf. Epotor i n'eyiŋana yite Atambatun kaamo fu hiñaan hítiyar hu, abe Yesu Kiris humuumo aamo fu meeyane mite enuuf i. 21T'akina tu súmuul su silaŋgatanee fu seejok t'afeeneŋ, enuuf i ti kahaŋu yooŋ birito kep, yeebin éyemi enuuf yeenabe t'Atemit. 22Abe naane árihine i t'afeeneŋ ni Kiris, aruun yooŋ árigiilooleegiilool ni bakaaku kéeyilene ku fe tu kunut kondu tu Búwejet bite Atambatun bikine du.

will be added

X\