EFEES 1

1Íñje Pool eeemo u apotor ite Yesu Kiris naane t'Atambatun ámaŋie du, íkiñjinuun fee aruun bakate ku Efees k'Atambatun akino ku, kéejeŋgine ku Yesu Kiris. 2Atambatun Faaf úne, n'Anahaan u Yesu Kiris kaja kásoniyanuun, abe ni kawunuun káasuumaay. 3Úsokoroor Atambatun, eeemo u Atambatun ite Anahaan ite úne Yesu Kiris, ni Faafo yooŋ toko! Ásoniyanasoniyan úne ni kásoniyan kánokan kéenuutina t'etiir bufor bu iŋi naane úhine i t'afeeneŋ ni Yesu Kiris. 4T'áwuwanoorut etaam i, ajifanajifan úne ti Kiris kaanuku man n'úyemi bakan keenabe te o, keeyinaatee kawatan tu doon. Makamu ámaŋamaŋi úne, 5n'asoŋk bijifan úne núuyemi bakañio. Ti Yesu Kiris t'aŋaase fu éehin bondu. Iye a ámaŋie fu káhinu aŋarkeyi naane butoofotoof. 6Náami úsokorooro iŋi meejake moone meehahe mu. Anoŋkanoŋk eewun úne mo fuufu iŋi naane úhine i t'afeeneŋ n'Añi oone a ámaŋie-maŋie u. 7Ti halan hite Kiris t'Atambatun arame fu úne ti meejakut mu, abe n'aboŋket úne yooŋ wuhoofoor wute w'úne. Iyu a áwufoore fu úne kajaku koone keehahe-hahe ku, n'áhin úne yooŋ núuwesinato, abe n'úniyo. 9Áhinahin úne núumeyi boone béenuusee bu yéeni, b'afiye bu asiiŋan ti kajaku koone, abe n'áŋaasann bo ti Kiris. 10Bondu, Atambatun kahabanoor bo ti bihabanooreey bu. O kakuukan doon fe deeemo t'etiir bufor bu, ni t'etaam i, Yesu Kiris éeyemi aseef u. 11Naane írihine i t'afeeneŋ ni Kiris, iribajabaj húrub hite h'uni t'Atambatun, ábuki Atambatun asoŋka bijifan uni naane t'áhabaneina du. Abe Atambatun áhinahin buroon bu fe beeriib ni naane ámaŋie i akina humuumo. 12Náami iriisokorooro naane ahahe i, uni keeemo ku étiyar i ti kayakar ku ti Kiris! 13Aruun yooŋ kéehine ku t'afeeneŋ ni Kiris, arijamajam hirim hite múniyo mu, heeemo hu Hirim Heetoofe hu héekinineŋe hu n'arifak. H'áriyilene hu ti Kiris, Atambatun n'áhin t'aruun éluwenuma yite káwufoor kaanuku aruun bokoone ku; yo yeemo fu Búwejet Beenabe bu b'afiye bu aane o kawunu úne. 14Búwejet Beenabe bu beemo fu húrub hítiyar hu ti meejake m'Atambatun anaŋe mu bija ti bakan koone. Úne kabaju mo kane úfakanee kuur. Náami úsokoroor Atambatun naane ahahe i! 15Iŋ'ite ho aamo fu huta h'iŋ'ibin ijam kaanuku áriyilenayilen t'Anahaan u Yesu, nu buŋ b'árimaŋie fu yooŋ bakan k'Atambatun akino ku fe, 16iwasut kaanu Atambatun eyeehen uŋu hoonuun hu. If'íyemi ti kalawu, iŋ'íbaŋinouun. 17Iŋ'ilaw Faaf u éenike u, Atambatun ite Anahaan ite úne Yesu Kiris kaanuku eewunuun Búwejet bite búwesinato, ni bite káwufooruuno, abe ni bíhinuun ariihaŋo kámeyi. 18Iŋ'ilaw Atambatun kaanuku eejaaŋan ñúwejet ñoonuun, man n'árimeyi eyakar yómbokun y'aruwuun i bite te yo, n'ebaj yéewarie-warie i y'anaŋe i bija ti bakan k'akino ku. 19Ímaŋamaŋi yooŋ árimeyi sembe sómbombokun su sunsu surok t'úne kéeyilene ku. Sembe sondu sómbombokun su, Atambatun átumbatumba áwufoor so 20h'aritane hu Kiris t'eket i, abe n'áhino eeriiko inde baatoso t'etiir bufor bu. 21Toko diyu ti Kiris anaŋee fu t'etiir emalaka i fe, n'eseef i, ni bakate sembe su, ni bákayi ku. Anaŋeenaŋ t'etiir huruwu hánohan heeyino karuwiee, káanukiiit hahiye barebare, bare bija kóyinokoyin. 22Atambatun awunawun Kiris sembe tu doon areyi fe, abe n'ásiko awun éeyemi hikaw hite kéeyilene ku. 23Kéeyilene ku kaamo fu eni yite Kiris, abe Kiris ondu tu boko ahoojaniin bib, akina eehoojane u dóonodoon fe.

will be added

X\