KOLOS 3

1Ariritaneeritan t'eket i ni Kiris. Náami ariŋes buroon bite bu t'etiir, ti Kiris aamo du t'ariikee inde baatos Atambatun. 2Ariyinoor iŋ'ite buroon beeemo bu t'etiir kep, abe n'ariwas biyinoor bite buroon beeemo bu t'etaam. 3Ábuki ariketaket, abe buroŋ boonuun búnuuseenuus ni Kiris t'Atambatun. 4Kiris aamo fu buroŋ boonuun nu múniyo. Af'abin áŋaasin, n'aŋ'áriŋaasin yooŋ ne o ti kániku koone. 5Náami ariyool ti siniuun doon fe deeemo dite t'etaam: huŋotu hu ni bakan k'ariseñeit, kakuuraate ku, kámaŋi kite buroon béefuñinanie bu, wúfaŋi weejakut wu, ni bimero bite buroon b'árikiniit bu. (An af'amero doon d'ákiniit, ajokajok bondu ahaŋ naane ajoke i Atambatun.) 6Kunoŋk naane kondu ifi kíkinineŋ Atambatun n'ayiŋat ti kiŋki kateñekoo kájeŋgin. 7Iyu yooŋ af'árinijaani hítiyar hu, aruun ti káhinu kite wuhoofoor wondu. 8Bare hahiye, ariwas bonde fe: kajoku an tu suhol soonuun, ni kayiŋat, ni bánafut. Kílafatinu kuwarut kánuutina tu ñutumuun, ni báhamin yooŋ beefute fe. 9Atum'arijuusoor, ábuki aŋkut áriyemi naane hítiyar hu, abe ariwasawas yooŋ manoŋkar moonuun. 10Manoŋkar míyeni m'aribaje fu, abe Atambatun awunuun fu mo kaanuku ko kireyi fe n'áriyemi bakan kíyeni, ariinokoor ne o éewuwanuun u. Iyu, n'aŋ'áriyini kámeyio arihaban. 11Hahiyu aŋkut abaj bokonde Esuwif, bokonda kanooto Esuwif; bokonde kateyatey karam, bokonda kateyit karam; bokonde kániyeit, bokonda baataaŋaat; bokonde búsukateen, bokonda kanooto búsukateen. Bare Kiris taŋ abaje fu, o eeemo u doon areyi fe, abe n'áyemi ti bakan koone kareyi fe. 12Náami makamu Atambatun ajifanuun fu kaanuku áriiyemi bakan koone, abe yooŋ ámaŋiuunmaŋi, árimeyi kayubiyen an, abe n'aritoof yooŋ. Áritetianooro, árineeni yooŋ, abe n'aŋ'árimuñ. 13Árimuñalool, abe n'aŋ'ariboŋketoor yooŋ kane ake atin t'áwiyo. Naane Anahaan u aboŋketuun i, ariboŋketoor iyu yooŋ. 14Abe beehaŋe bu fe beemo fu árimaŋioori. Kámaŋioori ku ifi kíkinineŋ kajokoor ku ni kiyan. 15Káasuumaay ki Kiris kaŋk'awun kija kujoŋooran siheluun. Atambatun aruwuunruw bite káasuumaay kondu kaanuku áriiyemi eni efeeneŋ. Arieno ko kireyi fe eyeehen. 16Hirim hite Kiris hija hikin t'aruun, n'ebaj ite te ho fe. Ariliikenool, abe n'aririmoor nu búwesinato boonuun bireyi fe. Arihooñ kuhooñu kánokan kite k'Atambatun, abe n'arihooñ ko suhol soonuun síhabanein ariieno eyeehen. 17Abe doon fe d'ariemo ti káhinu, man yooŋ ti kasoku, árihin do tu huruwu hite Anahaan u Yesu, abe n'ariene yooŋ Atambatun Faaf u eyeehen uŋu hoone hu. 18Aruun haare hu, árijeŋgin bákayinuun naane bijake i ti bakan kite Anahaan u. 19Aruun háyine hu, árimaŋi haare hoonuun, abe atum'aŋ'arinuur tu boko. 20Aruun biñi bu, árijeŋgin sifaafuun ni síñaayuun tu doon areyi fe; bondu butoofe fu Anahaan u. 21Aruun sifaaf su, atum'aŋ'árihin bakañuuun keeyiŋat; n'aŋ'arijendaniin kábuju biyinoor. 22Aruun búsukateen bu, árijeŋgin kéekiniuun ku bakate ku t'etaam ye tu doon areyi fe. Atum'árijeŋginiin kane káyemiuun ti kajukar barebare, kaanuku man n'aritoofiin. Bare árijeŋginiin nu suhol seekuure but, iŋi naane árijeŋgine i Anahaan u. 23Burok b'ariyino káyemi te bo fe, áriñiŋkaan te bo naane bakan keeemo tu burok káanukiiit bija tu kúŋgowulan ku, bare bija t'Anahaan u. 24Árimoomi kaanuku Anahaan u kasiibanuun ti biŋeñen b'anaŋe bu bija ti bakan koone. An éekiniuun u aa arirok bija te o, o aamo fu Kiris Anahaan u. 25Bare an eenijut u ajakee, o kabatikanee meejakut m'áhine mu, ábuki t'Atambatun ésuk i erare.

will be added

X\