KOLOS 2

1Ímaŋamaŋi árimeyi kaanuku íñj'endu t'étuum yeeyane faŋ uŋu hoonuun hu. Iŋ'írituum yooŋ bija ti bakate ku Lawodise kéeyilene ku, ni bakaaku yooŋ kéeyilene ku fe kéemusut ku káheelin t'íñje. 2Iŋ'ítuum iyu uŋu hoonuun hu arireyi kaanuku man kikawuun ni kiyaŋg, abe n'árimaŋioori áriihin t'afeeneŋ. Ímaŋamaŋi yooŋ Atambatun ásoniyanuun man n'áriyini kahooju bib nu búwesinato. Iyu, n'aŋ'áriyini kámeyi béenuusee bite b'Atambatun, bo beemo fu Kiris. 3Káwasi ku, ni kámeyi kite múniyo mu, bondu fe búmoomi naane ebaj, abe te o tu búnuusee fu. 4Isokuunsok bonde kaanuku an atum'abin abuutuun ni báhamin beetoofe. 5Hutoof yooŋ ikambuunkamb, ehelam bare yendu t'aruun, abe hikawam hutoofatoof dómbokun, ábuki ijukajuk naane arijoŋoore i, abe n'arijok alitee ti káyilen koonuun ti Kiris. 6Náami hahiyu, makamu arijoka t'Anahaan u Yesu Kiris, buroŋ boonuun bíyemi naane bite bakan kéehine ne o t'afeeneŋ. 7Arilooñ te o, abe n'arinut buroŋ boonuun yooŋ te o. Arihaŋ yooŋ kajoku alitee ti káyilen ku naane kaliikenuun i, abe n'aŋ'ariene Atambatun ko kireyi fe eyeehen. 8Arinaŋ toko kikawuun an atum'abuutuun nu búwesinato bite húŋgowulan, beeemo bu bibajut éñjeriŋ. Búwesinato naane bondu iŋi kajam bo t'ejoosan ite kúŋgowulan ku, nu tu ñúwejet ñeebaje ñu sembe ñite ñu t'etaam ye. Búwesinato bondu búnuutinoot ti Kiris. 9Ábuki naane Atambatun aamo i abin ahaban fe, akina yooŋ iyu a aamo fu. 10Abe naane árihine i t'afeeneŋ ni Kiris, naane aamo i abin ahaban, iyu yooŋ a ariemo fu. Akina aamo fu aseef ite ñúwejet ñite sembe su ñeeemo ñu t'etiir fe. 11Naane árihine i ne o t'afeeneŋ, ariteyanee yooŋ karam; káanukiiit karam kite kúŋgowulan ku, bare karam kéenuutina ku ti Kiris. Ko keemo fu anuutana síjiko sinsi sitiŋguun yéeni ariihoofoor. 12H'aribostee hu, anokooreenokoor kite arihokeehok ni Kiris, abe n'ariritanee yooŋ ne o, ábuki áriyilenayilen ti sembe site Atambatun eeritano u t'eket i. 13Hítiyar hu, árimoomi t'Atambatun naane bakan keekete iŋ'ite wuhoofoor woonuun, ni naane ariteyit i karam. Bare hahiye Atambatun áhinuunhin ariisooñ ariroŋ ni Kiris. Aboŋketaboŋket úne wuhoofoor wute w'úne fe. 14Kaawiit keetinane ku úne yéeni iŋi naane újeŋginut i ko, Atambatun atibatib ko t'ekuruwa yite Kiris eeneyan ko tuus. 15Ñúwejet ñéebajaanie ñu sembe fe, Atambatun aramaram so, abe n'áweetin ñúwejet ñondu tu buhooŋu ésuk i fe h'afaake hu ño ni ñaasel, abe n'añaahoor ne ño éewufoor kaanuku ariiŋanariiŋan ño t'ekuruwa yite Kiris. 16Iŋ'ite ho aamo fu atum'ariwas an eetinanuun tu buroon bamb'ariñoofo, ni bamb'árihujo, man yooŋ naane aamo i aŋ'ariteñeko káhinu sike sifeet site Esuwif i, árijokaariit yooŋ erimaas yeeniin, nu hunak hite kánuutina kite hiim hu. 17Diyu fe bísamunan bite buroon beefiye bu buwar bibin. Bare múniyo mu fe ti Kiris ti meemo fu. 18Kiŋki kaane eni awareewar káhihinoor, emalaka i yooŋ kawareewar kásukaay, atum'ariwasiin iŋi katinanuun. Iŋi kasokorooro uŋu buroon bimbi bifeeñiin. Biyinoor booniin bite bu t'etaam ye iŋi bitiŋgiin keeyitooro, abe yooŋ bibajut éñjeriŋ. 19Kajokut ti Kiris eeemo u hikaw hite kéeyilene ku keeemo ku eni yeene. Akina ákinineŋe fu eni i ereyi fe n'ékuumanee, abe n'ejokoor ayan faŋ tu súkulinu su, abe n'eŋ'ehaat yooŋ naane Atambatun ámaŋie i. 20Ariketaket ni Kiris, abe n'ariramee tu ñúwejet ñite sembe su ñeeemo ñu t'etaam ye. Náami iŋi naŋ nu buroŋ boonuun beemo fu naane bite bakate ku t'etaam ye? Iŋi naŋ n'af'aribeb keenoŋkooranuun buluwa naane bonde: 21«Atum'árisik doon dúmanuma», «Atum'arijeken diye», «Atum'arigor diya»? 22Buluwa bondu fe busokasok tu buroon beeemo bite bihabano kane bugoree. Háyine hu ifi kátuut buluwa bondu, abe ni kaliiken bo ésuk i. 23Múniyo buluwa bondu bunokooranokoor naane buroon bite búwesinato, ábuki bíkandijenakandijen kajoku ejoosan i, ni bítetianooro, ni káhihinoor eni. Bare bibajut mayet éñjeriŋ, ábuki biyinaat kákinineŋ kúŋgowulan ku ni káhinaati wúfaŋi wooniin weejakut wu.

will be added

X\