KOLOS 1

1Íñje Pool eeemo u apotor ite Yesu Kiris naane t'Atambatun ámaŋie du, n'ati úne Timote írikiñjinuun fee, 2aruun bakate ku Kolos k'Atambatun akino ku. Aruun bakati uni ni bákaniin uni kéejeŋgine ku Yesu Kiris: Atambatun Faaf úne aja ásoniyanuun, abe n'awunuun káasuumaay. 3Iŋ'iriene Atambatun Faaf ite Anahaan ite úne Yesu Kiris eyeehen ko kireyi fe kane íriyemi ti kalawu bija t'aruun. 4Iŋ'irieno eyeehen ábuki irijamajam kaanuku áriyilenayilen ti Yesu Kiris, abe n'árimaŋi yooŋ bakan ku fe k'Atambatun akino ku. 5Hunak hi hirim hite múniyo mu, heeemo hu Hirim Heetoofe hu híreeŋina hu t'aruun hítiyar, arijamajam eyakar yeeemo i te ho. Iyu a arinaŋe fu káyilen koonuun, ni kámaŋioori koonuun fe t'eyakar yendu y'Atambatun anaŋe i t'etiir bija t'aruun. 6Hirim hondu Heetoofe hu híreeŋinuun naane hireeŋe i yooŋ tánotan fe t'etaam ye. Hondu ti kabukoor, hondu yooŋ ti kahaŋu bija hágila. Iyu yooŋ i hije fu t'aruun huta h'aŋ'aribin arijam abe n'árimeyi kaanuku Atambatun aŋ'áwufoor ésuk i kajaku koone nu múniyo. 7Áwiy uni Epafuras eeemo u burok uni bifeeneŋ aliikenuun fu bondu. Akina an éejube tu burok bite Yesu Kiris, abe burok b'iriware bu yéeni káhinu t'aruun, bo b'áhin fii. 8Akina asoke fu uni naane Búwejet Beenabe bu bíhinuun i áriimaŋioori. 9Iŋ'ite ho aamo fu huta h'iŋ'iribin irijam bo, iriwasut kalawu Atambatun bija t'aruun. Iŋ'irilawo kaanuku man n'áhinuun áriimeyi b'ámaŋie bu árihabanein, abe Búwejet Beenabe bu ni bíhinuun áriiwasi abe n'áriwesinato yooŋ. 10Káhinu iyu, buroŋ boonuun n'uŋu butoof Anahaan u, abe n'árihin yooŋ ko kireyi fe beetoofo bu. N'aŋ'árihin yooŋ buroon bánoban fe beejake, abe n'aŋ'arihaŋ kámeyi Atambatun. 11Iŋ'irilawo yooŋ kaanuku man n'awunuun ti sembe soone séenike su, aŋ'aribin árimuñ ko kireyi fe, abe n'arijok yooŋ alitee ni katoofu kómbokun. 12Ariene Faaf u eyeehen, akina éehinuun u áriiyini kabaju húrub t'ebaj y'anaŋe i bija ti bakan k'akino ku ti Jáyi jite meejaaŋe mu. 13Aramaram úne ti sembe site ébaani i, abe n'aja n'úne ti Jáyi jite Añi oone a ámaŋie u. 14Añi oone ondu ákinineŋe fu n'úfakanee: aamo fu wuhoofoor wute w'úne wuboŋketee. 15Kiris aamo fu búnokoorum beejukanee bite b'Atambatun éejukaariitee u. O aamo fu Añi átiyar u, abe ahaŋahaŋ dóonodoon fe déewuwanee. 16Ábuki te o t'Atambatun aŋaase fu éewuwan doon fe deeemo t'etiir bufor bu ni t'etaam i: beejukanee bu, ni béejukaariitee bu, ñúwejet ñite sembe su ñeeemo ñu t'etiir, ni bákayi ku, n'eseef i, ni bakate sembe su. Te o t'Atambatun aŋaase fu éewuwan doon fe, abe bija te o. 17Akina áyemayemi tu doon fe dúwuwanoorutee, abe dóonodoon fe te o tu dujoke fu. 18Kéeyilene ku kaamo fu eni yeene, abe akina aamo fu hikaw hu. Buroŋ bíyeni bu te o ti bíjabina fu, ábuki o aamo fu átiyar u dók ti karitanee t'eket i, kaanuku éeyemi átiyar u tu doon fe. 19Ábuki Atambatun áhabaneinohabanein kaanuku naane aamo i abin ahaban fe, Añio yooŋ n'áyemi iyu. 20Iyu yooŋ a áhabaneina fu kaanuku eebukan nu dóonodoon fe eeŋaasan bondu t'Añio. Ti halan hite Añio héeyuusee hu t'ekuruwa i t'Atambatun áhine fu káasuumaay t'etutiin, akina nu buroon bu fe beeemo t'etiir bufor bu, ni t'etaam i. 21Hítiyar hu, aruun yooŋ arikambakamb Atambatun, árimoomi enatoorao iŋi meejakut mamm'ariyinoor, ni mamm'árihin yooŋ. 22Bare hahiye, Atambatun áhina ariibukan ne o t'eket ite Añio, eejuke u sílaam t'enio, kaanuku af'aribin arisiiŋo hágilao, n'áriyemi bakan keenabe, keekuure, abe an at'áyiniuun kawatan tu doon. 23Bare ariwarawar kajoku alitee ti káyilen ku, abe n'arisiiŋo te ko ayanee. Atum'áriwuŋg kiñaawu eyakar y'aribaje i huta h'aŋ'aribin arijam Hirim Heetoofe hu. Hirim hondu Heetoofe hu huwaareewaare kúŋgowulan ku fe t'etaam ye, abe íñje Pool, burokam hahiyu kawaare ho. 24Hahiyu, hikawam hutoofa naane ii ijuk iye sílaam uŋu hoonuun hu. Ábuki íñj'endu ti kajuku sílaam kep t'eniam, kaanuku man n'íyokunan eni yite Yesu yeeemo i kéeyilene ku, abe n'íreeŋinan yooŋ sílaam site Kiris seeŋeñene su. 25Íñje hahiyu aroka ite kéeyilene ku. Atambatun asejanam fu burok bondu kaanuku iŋ'ibin irok bo bija t'aruun: aboñamboñ kaanuku iiwaare hirim hoone hireyi fe. 26Hirim hondu heemo fu h'afiye hu ánuus ésuk i fe huta hu ti sifaaf, bare hahiye áwufoora ho bakan k'akino ku. 27Ábuki Atambatun ámaŋamaŋi káwufooriin ebaj yéenike i y'ánuusaanie i, yeeemo i ti b'afaree bu bija ti keenooto ku Esuwif. B'ánuusaanie bu beemo fu bonde: Kiris ondu t'aruun. Te o t'ariyakare fu kaanuku ariibin arimaat ti Jáyi jite Atambatun. 28Kiris ondu if'iriwaare ésuk i fe. Iŋ'íriyeegaliin, abe n'iriliikeniin yooŋ ni káwasi k'Atambatun awune ku uni fe, kaanuku man huruw fe n'abin asiiŋo hágila Atambatun, káahaatin ti naane áhine i t'afeeneŋ ni Kiris. 29Bondu bíkinineŋe fu n'iŋ'irok, abe n'iŋ'ítuum ni sembe si Kiris awunam su, sondu sunsu surok t'íñje dómbokun.

will be added

X\