EPOTOR 28

1H'aamo hu irireeŋa etaam i, n'irijam kaanuku ekiŋk i iŋi kaane yo Malt. 2Keekine ku bo ni kajok uni atoof dómbokun. Ni kátifan kaañen kómbokun, abe ni karuw uni, ábuki etiir i émoomi ti kanubu, abe aŋ'ajokokan naane. 3Pool n'aher mirir kaanuku éenib mo ti sineemak su. Náami ésunduk ehaŋa énuutin te mo iŋi hásufa hu, abe n'elajo t'emoŋio. 4Hi keekine ku t'ekiŋk i kajuke hu naane ésunduk i ee eleŋkoloolo t'emoŋio, ni kaanoor: ---Mánoman áyin ondu ayoola bakan. Naane afake i ti han hu fe, atambatun eejoŋoore u ajukerajuker n'aane at'awaso eeroŋ. 5Bare Pool n'alas emoŋio, doon du deeney ti sineemak su, abe doon fe durkuto. 6Bakaaku n'iŋi kaane man akina kanaayu, man yooŋ n'aket toko-toko. Bare ni kanahan afiyo, abe hi kajuke hu kaanuku doon fe dunooto ti kabajio, ni kawas bi kayinoore bu keesooñ keeene áyin ondu kame fu atambatun. 7Abajeebaj kaagoroor toko etaam ite aseef ite ekiŋk i, huruwu hoone Pubiliyus. N'ajok uni atoof, abe n'awanan uni te o kunak kíhaaji. 8Faafo ámoomi t'ahurusee ábuki enio éhinahin kásufu, haro yooŋ hiteyatey. Pool n'aja ajuko; n'alaw, abe n'ásit te o sumoŋio, n'áhino éekoyi. 9Hunuut toko, bakaaku kéesomute ku fe keekine ku t'ekiŋk i ni kabin keejuk Pool; n'áhiniin yooŋ kéekoyi. 10Ni káwufoor uni toko buhooŋu béewarie naane, abe h'abine hu áami bija bite b'uni bireeŋa, ni kawun uni buroon b'irisawulee bu fe. 11Írihina Malt kiim kíhaaji, n'iritik írijufo t'eke esahar ite Aleksandiri, iŋi kaane yo «Etambatun i básumbeel bu.» T'ekiŋk i t'éhine fu haajam hu. 12N'iriya ti hikinu hihi kaane Sirakuus, abe n'iribaj bo kunak kíhaaji. 13Irinuut toko, n'irikototoor katafa ku ayak abin áami irireeŋa ti hikinu hihi kaane Resiyo. Tifiit, eyam n'ésiiŋein uni inde hiñaawu, abe kunak kúsuba kep, n'irireeŋ Pusol. 14N'irijuk bo bakan kéeyilene, abe ni kalaw uni kaane iririiko nu boko erimaas. T'iyu, t'iyu, bija naane irireeŋe i Rom. 15Bakate ku bo kéeyilene ku kajamajam mite m'uni. Bakaake ni kabin íriifimboor tindi kaane «Emarse yite Apiyus», bakaaku tindi kaane «Suwotel síhaaji su». Hi Pool ajukiin hu, n'aane Atambatun eyeehen, abe hikawo ni hiyaŋg. 16H'irireeŋe hu Rom, ni kawas Pool eekin t'eke enuuf, asulaan aŋ'ajukaro. 17Abaj kunak kíhaaji, Pool n'aruw eseef ite Esuwif i bakate ku Rom. Hi kakuukanooree hu, n'aaniin: ---Kújakuwe, naane itinut i fe ti bakan úne, íjuumut yooŋ tu joosan ite sifaaf úne, Esuwif i bakate ku Serusalem ni kajokam, abe ni kásikam kasaan bakate ku Rom. 18Bakate ku Rom ni kákandijenam, kahaban ni kaane yéeni keewasanam, ábuki kajukut b'íhine beejakut beejare n'iyoolee. 19Bare Esuwif i ni kateñeko, isooñen n'eene ímaŋamaŋi áyi ómbokun eeemo u Rom ajoonanam. Ibajut bare tu boko bike bite kakalameiin. 20Iŋ'ite ho h'íboñina fu boonuun kaanuku iijukuun núuhamin. Múniyo iŋ'ite an u i Israyel kayakare u te o hi kakobam fu baasel bonde. 21Ni kaano: ---Irijukut mayet eleetar yéenuutina Súde yeesoke múuwe mu, abe abajut an éenuutina bo eekame uni, man yooŋ eesoke beejakut t'awe. 22Bare írimaŋamaŋi a̱akam uni awe humuumi b'a̱yinoore bu, ábuki írimoomi kaanuku tánotan fe, ésuk i iŋi kateñeko bítim b'a̱amo bu te bo. 23Ni káfiiten hunak hi kaware hu káfimboor nu Pool. H'aamo hu hireeŋa, ni kabin kahaŋ kahooju t'enuuf i tu Pool áyemie du. Huta hu nu bújom bu bija yooŋ kaanendan ku, Pool n'aŋ'aliikeniin kep: n'aŋ'asokiin bite Jáyi jite Atambatun, abe n'aŋ'ájokin t'Eluwa yite Moyis, nu wuwiit w'eyiŋana yite Atambatun kakiñje wu, eekamiin bite bu Yesu kaanuku man ni káyilen. 24Bakaake ni káyilen b'asoke bu, bare bakaaku ni kateñeko káyilen. 25Naane aamo i kanooto ti kajamoor boko kumuumiin, abe yooŋ bokondu ti bija biyeetu, Pool n'áwutiyen aane: ---Búwejet Beenabe bu bukooŋakooŋ fu naane ti kirim konde ki bíhine ku Esayi ayiŋana ite Atambatun eesok sifaafuun kómbokun! 26Beenaan: «A̱ja a̱juk eheet yendu abe n'a̱aniin: "Bakate ku hahiye kajamu jak, bare iti kajok; boko káheelin féet, bare iti kajuk. 27Ábuki kayaŋgayaŋg aa kikaw, iŋ'ite ho hu ñúwejet ñooniin ñínandinaariit fu; kalofalof wúkondiniin, kaanuku utum'uŋu wujam; kaŋotaŋot ñíkiniin, kaanuku itim'iŋi ñijuk. Káhinahin ii kaanuku itim kabin káwuŋgan inde íñje, íihiniin kéekoyi, íñje Atambatun."» 28Pool n'áwutiyen aane: ---Árimeyi bonde: Atambatun aboñaboñ bija ti keenooto ku Esuwif, keesokee buŋ b'aja fu kafakaniin ariike. Boko kajamatan hirim hoone! 30Pool n'abaj simit súsuba t'enuuf y'ásike i aŋ'ajaam yo, aŋ'ajok áwariee kiŋki kabin kajuku koone kareyi fe. 31Aŋ'awaare Jáyi jite Atambatun, abe n'aŋ'aliiken ésuk i bite b'Anahaan u Yesu Kiris ni hikaw heeyaŋge piŋ, abe an ákolenaariito.

will be added

X\