EPOTOR 27

1H'aamo hu ajamooree kaanuku t'esahar t'írijufo fu iriija Itali, Festus n'ásik Pool ni bakaake keekulee asaan Suliyus, ake t'eseef ite esulaan i bakate ku Rom, ite t'eja yiyi kaane «eja yite áyi ómbokun eeemo u Rom». 2N'írijufo t'eke esahar ite Adiramit yeeware bisiiŋo tu wúsik wute Asi, abe n'írisitin. Aristarik ite u Tesalonik yite i Maseduwan ámoomi n'uni. 3Tifiit, n'iriya Sidon. Suliyus ajokajok Pool áwari aa; n'awaso eeja éejukin bákawiyo, kéeyokunano tu buroon b'asawulee bu. 4H'irinuute hu toko iriija, n'irikot katafa kite ekiŋk ite Siipur kaanuku íriinuuso eyam i, ábuki ésokumasokum uni. 5N'irikan han heejondoore hu ni Silisi ni Pamfili, abe n'irireeŋ Mira t'ésuk ite Lisi. 6H'iriwanee hu bo, aseef ite esulaan i n'ajuk esahar yéenuutina Aleksandiri yeeware bija Itali. N'ájuf uni te yo. 7N'iribaj kunak, esahar i n'eŋ'esaaho yeetey kep, abe írilaamalaam dómbokun bala irijondoor ni hikinu hihi kaane Kinid. Bare makamu eyam i eteñekateñeko rakas kaanuku iriiyuun ajoŋooree, n'iriŋaas Salimone iriikototoor ekiŋk ite Kiret yéenuus uni eyam i, 8ti katofu ni sílaam sómbokun. N'irireeŋ tike tiŋ iŋi kaane toko Wúsik Weejake, kaagoroor ni hikinu hihi kaane Lase. 9N'írikurioor bo naane, abe han hu nu husooñ hihaŋ kariyu kaanuku esahar yeeja toko. Múniyo hunak h'Esuwif i hihi kafeet te ho kaboŋket kite wuhoofoor wu káaheekin heenuut. Iŋ'ite ho hu Pool aaniin fu: 10---Kújakuwe, ijuka kaanuku bija bite b'úne kátaañi. Eenutuun esahar i búbujo nu buroon béejufe bu barebare, bare kumuum úne n'uŋ'újendan yooŋ kaketu. 11Bare aseef ite esulaan i ite u Rom n'awas báhamin bite bu Pool éejeŋgin bite ateyana u, n'ate esahar i. 12Kásik kondu kíjakaariit ni haajam. Iŋ'ite ho i keehaŋe kahooju ti háyine hu kéeyemie ku t'esahar i káhabaneina fu kaane kanuut bo keeja. Kámaŋamaŋi kaanuku ti bíyinie kabaju, ni kareeŋ Fenikis, kike kásik kite Kiret, keejondoore ni káasiŋ ki taanak tu tundu túlumo. Kámaŋamaŋi biriiko bo haajam hu heehabano. 13Eyam i n'ésiiŋein uni ni baamay, abe n'eŋ'esaaho yeetib. N'iŋi kaane man bi kayinoore bu, bo kabaju. Ni kañak hilaŋgaar hu, abe ni kaja, iŋi kakototoor katafa kite Kiret. 14Bare diŋgilis kep, náami eke eyam yómbombokun étibino, énuutin ti birij bite ekiŋk i. Iŋi kaane yo «erakiloŋ». 15N'eja n'esahar i. Esahar i étumbut éyini kajoŋoor n'eyam i. Náami iriibeben yeeja n'uni. 16Abin arko náami akiŋk ii kaane Koda ondu inde baatos uni. O ánuuse fu uni eyam i. N'íritaañioor tu busoona bite biramooro bu ayak abin áami íriñakino bo. 17H'aamo hu bakate esahar i kasirana bo, ni kakob esahar i fe ñúruuk. Abe ni káfiiten hilaŋgaar hu hihi hirand, ábuki kákolakoleyi kaanuku n'iŋi kabin kataal ti bifaah beeemo bu inde Libi. Náami keewas eyam i yeeja n'uni. 18Tifiit, eyam i ti katibu ni sembe kep t'esahar i, kasooñen n'iŋi káfiiten ti han hu buroon béejufee bu. 19Hunak héeseina hu, bakate esahar i kumuumiin ni káfiiten wañ wooniin wute burok bu. 20Kunak keehooje, íriheelinut ti taanak tu, nu búloofiiloof bu yooŋ, abe eyam i ti katibu ni sembe kep. Hireeŋ toko, iŋkut yooŋ iribin iriyakar kaanuku uni kafaku. 21Kéeyemie ku t'esahar i kañoofeit kunak. Náami Pool eesiiŋo hágilaiin abe n'aaniin: ---Kújakuwe, tiŋkan yéeni árijeŋginam fu, utum'únuutin yéeni Kiret. Buroon béebujee bee man bibaj yéeni, bija béetowutee bu fe. 22Bare hahiyu íñj'endu ti kaanuuun arijok alitee, ábuki mayet afeeneŋ t'aruun at'aket; esahar i barebare eja fu bútowuto. 23Ímoomi bondu ábuki káajiim ku, amalaka áŋaasinoŋaasin t'íñje, ánuutin t'Atambatun éekiniam u, abe n'iŋ'irok bija te o. 24N'aanam: «Pool, atum'á̱koleyi! A̱warawar kajoonanee hágila áyi ómbokun eeemo u Rom. Abe awe á̱kinineŋe fu Atambatun n'afakan síhiinu site bakani keeemo ku n'awe t'esahar i.» 25Náami arijok alitee kújakuwe, ábuki hikawam hiyaŋgayaŋg t'Atambatun: naane asokam i, iyu yooŋ i bija fu kabaju. 26Úne bare kataalu t'eke ekiŋk. 27Káajiim kondu kíhin hahiyu sumoŋu ni kibaakiir, eyam i ti bija n'uni kep ti han hu hihi kaane Mediterane. Nu huhuk hu, kiŋki karok t'esahar i n'iŋi kaane man irilohena etaam. 28Ni kakob elaaliñj tu núruuk, abe ni káfiiten ti han hu kaanuku keeliik kásuli ku. Ni kajuk kaanuku areeŋeereeŋ simeetar seemo butuman nu sumoŋu nu hutok nu súsuba. N'iritof diŋgilis, n'iŋki kasooñ káfiiten no. Náami keejuk kaanuku ásulieesuli areeŋ simeetar seemo butuman nu hutok ni síhaaji. 29Ni kákoleyi kaane man esahar i n'eŋ'ebin ébiŋan ti bilaaliñj. Náami kéefiiten kilaŋgaar kibaakiir inde hiñaawu esahar i, ti kañaanu kaanuku teefiit ahilee. 30Kiŋki karok t'esahar i ni kaŋes kaanuku keenuut te yo keetey. Ni kawanan busoona bite biramooro bu, abe kanoŋk ii ni kaane keeja káfiiten kilaŋgaar kite hágila. 31Bare Pool n'aane esulaan i n'aseef ooniin: ---Bokondu ifit fi kariiko t'esahar i, at'áriyini kafaku. 32Náami esulaan i keefaran ñúruuk ñeekobe ñu busoona bu, abe ni kawas bo beeja. 33Boko ti kanahan ku kaanuku teefiit, Pool n'asokiin kareyi fe aaniin kañoofo. N'aaniin: ---Abajee úmiye kunak sumoŋu ni kibaakiir aruun bokondu ti kanahan, abe árihinut doon fe ti karuun. 34Íñj'endu ti kaanuuun hahiyu ariñoofo, ábuki iyu a ariware fu káhinu kaanuku ariiroŋ. Abe mayet kaawan kifeeneŋ utu kútowuto t'ake t'aruun. 35Hi Pool asoke hii ahaban, n'ayit humburu, abe n'alaw Atambatun aano eyeehen hágilaiin kareyi fe. Ahaban, n'afiitar ho, abe n'ateŋ. 36Náami kareyi fe kikawiin kiyaŋga, abe ni kateŋ yooŋ. 37Iriemo t'esahar i síteemeer súsuba ni bakan bákahaaji nu sumoŋu nu hutok n'afeeneŋ. 38Hi kateŋe hu kabir, ni káfiiten bajal beeŋeñene bu ti han hu kaanuku esahar i yéewiini. 39Hi tifiite hu, kiŋki karok t'esahar i kakeetanut t'íriyemie du, bare kaŋandanaŋandan katafa, abe han hu huyoosayooso etaam i. Ni káhabanein kaane ti káyinie, n'iŋi kaya bo esahar i. 40Ni kájendin kilaŋgaar ku, abe ni kawas ko ti han hu. T'ewahatu yendu yooŋ ni kájendin ñúruuk ñite hibaar hu. Kahaban, ni kasiiŋan karafa kite ku hágila esahar i kaanuku eyam i yeeja n'uni, abe n'írijund inde katafa ku. 41Bare irireeŋa tike tiŋ, esahar i n'étiis toko t'efaah. Hikaw hite esahar i nu huluuho, eŋkut yooŋ éyini katofu. Kúsuw ku n'iŋi kiney ni sembe kiyak kuwelej sibat su. 42Esulaan i ni kaane yéeni keeyool keekulee ku kaanuku an tu boko atum'abin aley eefak. 43Bare aseef ite esulaan i ámaŋamaŋi kafakan Pool. Awasutiin kéehin bi kayinoore bu. N'aane kéeyinie ku kaleyi kajab kátuuso man ni káyini kareeŋu etaam i. 44Bakaaku n'iŋi kafin kajok tu wubiliŋgit wu, man yooŋ tu buroon béebujee bu t'esahar i keeseiin ti hiñaawu. Iyu e ésuk i fe ebine fu ereeŋ t'etaam i ti káasuumaay.

will be added

X\