EPOTOR 24

1Abaj kunak hutok, Anañas asaraha ómbokun u n'áreeŋin Sesare, akina ni sifaaf su, n'ake ániine iŋi kaano Tertulus, buroko kákotin báhamin, man yooŋ bísiiŋooreina ni keekulee ku. Ni kakalame Pool ti Felikis águwernoor u. 2Pool n'áruwinee, abe Tertulus n'akalamoo aane: ---Awe Felikis éegilane u hikinu hu, awe á̱kinineŋe fu káasuumaay ni kibaj t'ésuk yende. Nu búwesinato búuwe n'á̱yokunane fu uni á̱ahin hikinu he heesooñ huwayo. 3Uni bokondu ti kaanii eyeehen uŋu buroon bimb'iribaj t'awe ko kireyi fe tánotan. 4Bare it'ikamban báhamin búuma, iisooñ ijoki afiyee. Iŋ'ite ho h'ímaŋie fu waasi, ti kajaku kúuwe, a̱jamatan uni jak diŋgilis kep. 5Irijukajuk kaanuku áyin ondu húŋgowulaniit. Ayeeñoorana Esuwif i bakate ku t'etaam ye fe, abe akina aamo fu aseef ite Enasareyeŋ i. 6Aŋesaŋes yooŋ kabuusatan Enuuf ite Atambatun yeenabe i, náami iriijoko. Af'á̱kandijeno awe humuumi, n'aŋ'á̱yini kajuku kaanuku b'iritinano bu te bo bite nu múniyo. 9Esuwif i ni kalitan bo yooŋ kaane nu múniyo. 10Águwernoor u n'asaan Pool hirim hu. Pool n'aane: ---Ímoomi kaanuku abajee simit seehooje, awe af'á̱kotin múniyo mu t'ésuk yende. Náami hikawam hiyaŋgayaŋg naane isiiŋee ee hágilai kaanuku iiramooro. 11Á̱yinooni kayuufu bonde a̱ajuk: abajoorut kunak keefaasee sumoŋu nu kúsuba, ijaja Serusalem kaanuku iilaw Atambatun. 12An ajukutam t'Enuuf ite Atambatun ti síjeeŋoor n'an; an yooŋ ajukutam ti ñáalawum ñu, man yooŋ ti hikinu hu ti katiŋgu ésuk i kaanuku kéerahan. 13Abe bokonde kayinaat káwufoori kaanuku bonde bi katinanam bee te bo bite toko. 14Bonde bare bite nu múniyo b'ija bee kasoku hágilai: íñj'endu tu burok bija t'Atambatun ite sifaaf uni, ti Bítim bite Anahaan u. Boko iŋi kaane bítim bondu bíteiit nu múniyo, bare íyilenayilen beekiñjee bu fe t'Eluwa yite Moyis, nu tu wuwiit wute eyiŋana yite Atambatun. 15Íkooki eyakar yendu t'Atambatun naane háyine hondu, yite kaanuku kéejube ku ni kéejubut ku fe bíriteina t'eket i. 16Iŋ'ite ho h'if'íñiŋkaan ko kireyi fe kaanuku man buroŋ búuma ni bíyemi beekuure hágila Atambatun nu kúŋgowulan ku. 17«Naane aamo i abajeebaj simit ijeit Serusalem, n'ibatuko bo kaanuku íiyokunan bakanam ti sírirem, abe n'íhin wusarah bija t'Atambatun. 18Tu bondu t'íyemie fu hi kajukam hu t'Enuuf ite Atambatun. Íhinahin kaasarah kite kakuuran kite sini su ihaban fe. Iriboorut ni hahooja, abe yooŋ báhamin bibajut toko. 19Bare bakaake Esuwif bakate Asi kámoomi toko, abe boko kawaram fu yéeni kakalame, ti kabaje bike t'íñje. 20Bokonde keeemo ku diye kasoki biin bi kajuke fu beejakut b'íhine hi kaje hu n'íñje ti sifaaf site ejoonana i. Bokonde keeemo ku diye kasoki bo! 21Kane arko fíya bonde b'iritee bu iisiiŋo isok bo t'etiir hágilaiin eene: "Aŋarkeyi naane iyakarayakar ti bíriteina bite t'eket i híkinineŋe fu n'ijoonanee úmiye tu buhooŋuuun!"» 22Felikis, éemeyie u bite Bítim bite Anahaan u akuur but n'atofanan kajoonan ku. N'aaniin: ---Lisiyas, aseef ite esulaan i af'áreeŋin, n'iŋ'íkotinuun. 23N'aane faaf ite esulaan i aa ajukar Pool akulo, bare n'awaso aŋ'áhin beetoofo bu, abe n'awas bákawiyo iŋi katofotooro. 24Abaj kunak, Felikis n'abin n'anaar'o Durusil; anaar'o Asuwif. N'aboñ bite Pool, abe n'aŋ'ajamatano éehamin ti káyilen ku ti Yesu Kiris. 25Bare hu Pool áhamine hu tu buroŋ beejoŋoore bu, ni naane húŋgowulan aware i kajoku hikawo, ni kajoonan keeware ku bibin, Felikis n'ákoleyi abe n'aane: ---Hahiyu a̱ja. If'ibin ibaj ejot, n'iŋ'isooñ iruwi. 26Ayakarayakar yéeni kaanuku Pool kawunio sírirem. Iŋ'ite ho h'af'afand kaboñu boone kaanuku iŋi káhamin. 27T'iyu, t'iyu, ayak abin áami abajee simit súsuba, Felikis n'anuut, Porsiyus Festus eesao. Náami makamu Felikis ámaŋamaŋi Esuwif i kikawiin keetoof te o, n'awas Pool t'ekulu i.

will be added

X\