EPOTOR 18

1Hunuut toko, Pool n'anuut Aten eeja Korent. 2N'ajuk bo ake Asuwif huruwu hoone Akilas, eebukee t'ésuk ite Pont. Ániine ondu ti káreeŋinao akina n'anaar'o Pirisil, kánuutin Itali, ábuki Kúlod áyi ómbokun eeemo u Rom asokasok aane Esuwif i fe kanuut bo. Pool n'aja aŋaabeiin, 3abe makamu burokiin bifeeneŋ, karoku kite bitant bu, n'ariiko tu boko iŋi karok t'afeeneŋ. 4Erimaas fe yite Esuwif i, Pool n'aŋ'áhamin ti báalawum bu, abe n'aŋ'aŋes káhinu Esuwif i n'Egerek i kéeyilen báhamin boone. 5Hi Silas ni Timote káreeŋina hu kéenuutin Maseduwan, Pool n'ajoŋoor kep ni kawaare ku. N'aŋ'áwufoor Esuwif i akuur but kaanuku Yesu aamo fu Afakana u. 6Bare Esuwif i ni karito te o, abe ni kálafatino. Náami eehaŋkiin hafor hite wañ woone abe n'aaniin: ---Af'áritowuto, aruun ariŋese bo. Ikuura toko but. Áfiitin ti hahiye, íñje kawasuuun iija iwaare ti keenooto ku Esuwif. 7N'anuut toko eeja t'ake ániine iŋi kaano Titiyus Sustus, éejeŋgine Atambatun. Enuuf yeene émoomi kaagoroor ni báalawum booniin. 8Kirispus, aseef ite báalawum bu n'áyilen t'Anahaan u, akina nu butoŋo fe. Keehooje yooŋ ti bakate ku Korent ni káyilen hi kajame hu Pool, abe ni kabostee. 9Hike hunak káajiim ku, Anahaan u n'afeeñ tu Pool abe n'aano: ---Atum'á̱koleyi, á̱hamin kep, atum'a̱koowan, 10ábuki íñj'endu n'awe. An at'áyinii kajoku kaanuku éehihinoori, ábuki keehooje bokondu ti hikinu hondu bákuuma ku. 11Pool n'ariiko Korent emit ni kiim hutok ni hifeeneŋ, aŋ'aliiken bo ésuk i hirim hite Atambatun. 12Hi Galiyoŋ áyemie hu águwernoor ite Akayi, Esuwif i ni kásiiŋoorein keejok Pool, abe ni kaja ne o ti báajoonanum bu. 13Kareeŋ ni katinano kaane: ---Áyin ondu aŋ'atiŋg ésuk i kéejeŋgin Atambatun awayo naane t'eluwa i esoke du. 14Pool n'aja kaanuku éehamin, Galiyoŋ n'aane Esuwif i: ---Arijamatan, aruun Esuwif i. Arko yéeni am atine fu t'eluwa i, man yooŋ n'áhin bike bómbokun beejakut, n'iŋ'iriiko yéeni iijamatanuun. 15Bare makamu aruun arijeeŋoore iŋi kirim, nu kuruwu, n'eluwa yeenuun, bondu boonuun. Ímaŋiit kákotin bondu! 16Abe n'anuutaniin ti báajoonanum bu. 17Náami kareyi fe keejok Sosuten, aseef ite báalawum bu, abe ni kámiño bímiñ hágila báajoonanum bu. Bare Galiyoŋ n'aŋ'áneenio kis. 18Pool n'asooñ ariiko Korent afiyo dikee. Ahaban, n'awasoor ni kéeyilene ku, abe n'ájufo t'esahar eeja Siri, akina ni Pirisil n'Akilas. Bala ájufo, ayiselayiselo Saŋkire, ábuki abinabina awaat Atambatun bike. 19Ni kareeŋ Efees, abe Pool n'awasoor bo ni Pirisil n'Akilas. N'ayooso ti báalawum bite Esuwif i, abe n'aŋ'ajeeŋoor toko nu boko. 20Ni kalawo kaanuku man n'ariiko bo afiyo dikee, bare n'ateñeko. 21N'aaniin o ti bija bu: ---Atambatun af'aane hee, íñje kásooñina beebe. Abe n'ájufo t'esahar eenuut Efees. 22H'awanee hu Sesare, n'aja Serusalem kaanuku eesaaf kéeyilene ku. Ahaban, n'aja Antiyoos. 23N'ariiko bo afiyo dikee, abe n'aja tu búsuk bite Galasi ni Firisi, aŋ'akaro ayaŋganan kéeyilene ku fe kikaw. 24N'abaj ake Asuwif eebukee Aleksandiri éereeŋina Efees, iŋi kaano Apolos. Ániine ondu ámoomi báhamin, ámoomi yooŋ Míkiñjin mu dómbokun. 25Áwufooreewufoor bítim bite Atemit, abe aŋ'aliiken ésuk i áhabanein bite bu Yesu ajoŋoor júl. Bare kaboste kite ku Saaŋ taŋ k'ámeyie fu. 26N'aŋ'áhamin ti báalawum bu hikawo káayaŋgin piŋ. Hi Pirisil n'Akilas kajamo hu, ni kaja ne o, abe ni kahaŋo káwuforoor bítim bite Atambatun. 27Ahaban, Apolos n'aane ámaŋamaŋi bija Akayi. Kéeyilene ku ni kahaŋo yooŋ katiŋgu, abe ni kakiñj eleetar bija ti bakate ku ne bo kéeyilene ku kaanuku keebin keejoko áwariee. H'areeŋe hu bo, n'abaj éñjeriŋ yómbokun ti keejoke ku bítim bu ti kajaku kite Atambatun. 28Ábuki aŋ'ajoŋoor n'Esuwif i hágila ésuk i eesokiin kaanuku kanooto ti bifeeneŋ, abe n'aŋ'áwufoor ti Míkiñjin mu kaanuku Yesu aamo fu Afakana u.

will be added

X\