EPOTOR 16

1Hunuut toko, Pool n'aja Derib, ahaban n'aja Listir. Abajeebaj bo ake ániine éeyilene huruwu hoone Timote. Íñaayo Asuwif éeyilene, abe faafo Agerek. 2Bakate ku Listir kéeyilene ku, ni bakate ku Íkoñom iŋi kasok te o beejake kep. 3Pool n'aane eeja ne o. Náami keeja, abe n'ateyano karam iŋ'ite Esuwif i keekine ku tu búsuk bite bu ne bo, ábuki kareyi fe kámoomi kaanuku faafo Agerek. 4Hikinu-kinu fe hi kaje te ho, Pool ni Silas n'iŋi kasok kéeyilene ku b'epotor i ni sifaaf su kajamoore bu Serusalem, abe n'iŋi kaaniin kájeŋgin bo. 5Kéeyilene ku n'iŋi kajok bítim bu alit tip, abe n'iŋi kahaŋ yooŋ kahooju húnakonak. 6Búwejet Beenabe bu ni biteñeko kaanuku Pool ni Silas keewaare hirim hite Atambatun tu búsuk bite Asi; náami keekan Firisi ni Galasi. 7Hi kalohene hu ésuk ite Misi, ni kaŋes bija Bitini, bare Búwejet bite Yesu buwunutiin bondu. 8Náami keekan Misi, abe ni kaja Trowas. 9Káajiim ku, bike ni bifeeñ Pool: n'ajuk ake ániine ite Maseduwan t'asiiŋee, abe n'aŋ'áwasiyano aano: «A̱bin Maseduwan man n'á̱yokunan uni!» 10Hi bondu bifeeñe hu Pool ahaban kep, n'iriŋes kaanuku iriija Maseduwan, ábuki bukuurakuur uni kaanuku Atambatun aruwe fu uni aane irija bo iriiwaareiin Hirim Heetoofe hu. 11N'írijufo t'esahar Trowas, abe n'irijumban júl bija t'ekiŋk ite Samotiras. Tifiit, n'irija Neyapolis. 12Irinuut toko, n'irija Fílip, hike hikinu hómbokun t'ésuk ite Maseduwan, abe bakate ku Rom ni kákini ho. N'iririiko bo kunak keefamut. 13H'erimaas ite Esuwif i ereeŋe hu, n'irinuut hikinu hu iriija ti kaayelu ku, ti kaanu man uni kajuku ne bo tike tiŋ tand'alawee. N'abaj bakaake haare keekuukanooree toko. N'iririiko, abe n'írihamin nu boko. 14Ake ti haare hondu huruwu hoone Lidi, buroko kajoohenan bípiis beelaañe beeseere naane. Akina ite Tiyatiir, abe ájeŋginajeŋgin Atambatun. N'ajamatan, abe Anahaan u n'áfeŋgino búwejet kaanuku eenaŋ hikawo ti bu Pool áyemie bu ti kasoku ku. 15H'aamo hu áyilena, n'abostee, akina ni bakate ku tu boko, abe n'alaw uni aane: ---Makamu arijukajuk kaanuku nu múniyo íyilenayilen t'Anahaan u, aribin kame ariiwanan t'íñje. N'anoŋkooran uni iriieno hee. 16Hike hunak, n'íriyemi ti bija tindi kalaw, n'írifimboor n'ake ásuŋgute ásukateen. Ákooki erab eŋ'éhino aŋ'akisan. Aŋ'abaj te ko sírirem seefame, abe n'aŋ'asaan so kéekinio ku. 17N'aŋ'ásein uni ti hiñaawu uni Pooliin, abe n'aŋ'ataŋk aane: ---Háyine hondu eroka bakate Atambatun eeemo u t'etiir-t'etiir! Kabinabin káwufooruun buŋ b'ariyino fu kafaku! 18N'áhin bondu kunak keehooje. Hireeŋ toko, Pool n'átumb ayiŋat asooñen n'aweteko abe n'aane erab i: ---Íñje isok fee n'awe tu huruwu hite Yesu Kiris: a̱nuut t'ásuŋgute ondu! Toko-toko yooŋ, erab i n'enuut te o. 19Hi kéekinie ku ásuŋgute u kajuke hu kaanuku eyakar yeeniin ite kabaju t'ásuŋgute u sírirem ébujaa, ni kajok Pool ni Silas kéehuuniin bija t'efiñjan i, kaja kasaan eseef i. 20Ni kasaaniin ejoonana i bakate ku Rom abe ni kaane: ---Bokonde Esuwif, abe bokondu ti kayeeñooran hikinu hite h'úne. 21Kaŋesa káyoosanna diye ejoosan y'árimeyie kaanuku úne bakate ku Rom úwarut yo káhinu. 22Hahooja hu ni hirito tu Pooliin ni Silas. Ejoonana i bakate ku Rom ni kaane kanuutaniin wañ wooniin, abe ni kámiñiin nu kunuk. 23Ni kámiñiin afiyo, abe ni kakuliin. Kahaban, ni kaane ajukara ite ekulu i ajukariin áwariee. 24H'ajukara ite ekulu i ajame hu bondu, n'akuliin t'anuuf áhindaa u, o káakobin wuwotiin tu wubiliŋgit. 25Nu huhuk hu, Pool ni Silas ni kalaw, abe n'iŋi kahooñ keesokoroor Atambatun. Keekulee ku bakaaku n'iŋi kajamataniin. 26Kaja kajuku, náami etaam i étumba eyoŋoŋanooro ni sembe, eyak eyoŋoŋan kiñaan kítiyar keejoke ku ekulu i. Wuruŋ wute ekulu i nu wuhaŋ wúfeŋgino wureyi fe, abe ñaasel ñeekobee ñu keekulee ku nu ñúkulino. 27Ajukara ite ekulu i n'ániyo; h'ajuke hu kaanuku wuruŋ wute ekulu i wúfeŋginafeŋgino, n'áruusin kábura koone kaanuku eeyooloolo, ábuki aŋ'aane man keekulee ku kareyi fe kateyatey. 28Bare Pool n'ataŋk ni sembe aane: ---Atum'á̱hinooro beejakut! Uni bokondu diye irireyi fe! 29Ajukara ite ekulu i n'aane asaanee ejaaŋana, abe n'amoken ayooso t'ekulu i. N'ájiŋgitan hágila Pool ni Silas ti kábitu kep. 30Ahaban, n'ánuutanniin, abe n'ákandijeniin aaniin: ---Kújakuwe, naŋ n'iware fu káhinu kaanuku iifak? 31Ni kaano: ---Á̱yilen t'Anahaan u Yesu, abe n'aŋ'a̱fak, awe ni bakate ku t'awe. 32Abe ni kasoko hirim hite Atemit, akina ni keekine ku t'enuuf te o fe. 33T'ewahatu yendu yite i nu huhuk hu, ajukara ite ekulu i n'aja nu boko, abe n'añaw busontaay booniin. N'ahaŋ abostee, akina nu butoŋo fe. 34N'aja nu Pool ni Silas t'enuuf te o, abe n'awuniin keeñoofo. Hikawo nu hutoof dómbokun, akina nu butoŋo fe naane áyilene i t'Atambatun. 35Hi tifiite hu, ejoonana i bakate ku Rom ni kaboñ esulaan t'ajukara ite ekulu i kaanuku aja aanee awasan háyine hondu. 36Ajukara ite ekulu i n'abin asok bo Pool. N'aano: ---Ejoonana i kaane iwasanuun ariija. Hahiyu árinooni kánuutina ariija ti káasuumaay. 37Bare Pool n'aane esulaan i: ---Káhinahin íriimiñee tu buhooŋu ésuk i ti kajoonanut uni, abe bare uni bakate yooŋ Rom! Kahaban, ni kajok uni kakul, abe hahiyu ni kámaŋi búnuuso keewasan uni? Aaa! Kabin boko kumuumiin keenuutan uni! 38Esulaan i ni kaja kasok bondu ejoonana i bakate ku Rom. Bokondu ni kákoleyi dómbokun hi kajame hu kaanuku Pooliin ni Silas bakate yooŋ Rom. 39Ni kabin kaaniin kaboŋketiin. Kahaban, ni kánuutanniin t'ekulu i, abe ni kalawiin kaaniin kanuut ti hikinu hu. 40Hi kánuutina hu t'ekulu i, Pool ni Silas ni kaja ti Lidi. Ni kajuk toko kéeyilene ku, abe ni kayaŋgananiin kikaw. Kahaban, ni kaja.

will be added

X\