EPOTOR 14

1Hi Pool ni Barnabas kareeŋe hu Íkoñom, ni kayooso ti báalawum bu naane káhine i Antiyoos. Ni káhamin atoof ayak abin áami bakan keehooje-hooj t'Esuwif i, ni keenooto ku Esuwif káyilena. 2Bare Esuwif i keeteñekee ku káyilen ni katiŋg keenooto ku Esuwif kayak kayinoor beejakut ti kéeyilene ku. 3Pool ni Barnabas ni kafiyo bare Íkoñom. Iŋi káhamin ni kikaw keeyaŋge, abe n'eyakar yómbokun t'Anahaan u. Anahaan u n'áwufoor kaanuku bimbi kawaare ti kajaku koone bite nu múniyo, ábuki awuniinwun sembe site káhinu buroon beehaŋe ésuk i kikaw. 4Bakate ti hikinu hu ni káwaajinoor: bakaake ni kásiiŋoorein n'Esuwif i, bakaaku n'epotor i. 5Keenooto ku Esuwif, n'Esuwif i, n'eseef yeeniin ni kakuukooro kéehamin kaanuku keebin kéehihinoor Pool ni Barnabas, abe ni kámiñiin nu bujuju keeket. 6H'epotor i kajame hu bo, ni katey bija Listir, ni Derib, ni kaaku kikinu kite ku Likawoni, 7abe n'iŋi kawaare bo Hirim Heetoofe hu. 8Abajeebaj Listir ake ániine aŋ'ariiko kep, ábuki wuwoto wútimatim. Abukeebuk káatimin, abe ámusut bija. 9Hike hunak, n'áyemi ti kajamatan Pool. Pool n'ajondoman te o afiyo, n'ajuk kaanuku abajabaj káyilen kite kaanuku o kákoyi. 10Náami eetaŋk eeeno: ---A̱rito, abe n'a̱siiŋo ajoŋoor! Ániine u n'ajulan hifeeneŋ hu juj, abe n'áyemi ti kañaahu. 11Hi hahooja hu hujuke hu bu Pool áhine bii, ni kataŋk tu kooniin ku kite ku Likawoni kaane: ---Etambatun i káhinooraa élokow, káwaneino t'úne! 12Ni kásik huruwu hite atambatun ooniin Sóos kasaan Barnabas, abe Pool ni kaano Ermes, ábuki Pool af'áhamin. 13Asaraha ite t'enuuf ite i Sóos yéeyemie i tíyaŋ hikinu hu, n'abin tu wuruŋ wu nu kúyond keesaŋganee n'éfuloor. Akina ni hahooja hu kámaŋamaŋi kasarah ko bija t'epotor i t'ésubaiin. 14Bare hu Pool ni Barnabas kajame hu bondu, ni kátumb kátaañian naane, ni kajeh wújufa wooniin, abe ni katey t'etut hahooja hu ti kataŋku iŋi kaane: 15---Kújakuwe, kame iŋi naŋ n'árihin fii? Uni fu yooŋ kúŋgowulan naane aruun. Uni iribinuun ni Hirim Heetoofe hu kaanuku ariiwasan kimiile kondu keebajut kii éñjeriŋ, áriiwuŋgan inde Atambatun eeemo u buroŋ, éewuwane u bufor bu, n'etaam i, ni han hu, nu buroon beeemo bu toko fe. 16Kóyin sifaaf, awasawas biheet bu fe keejok bítim beetoofiin bu. 17Bare awasut búwuforooro ti meejake mamm'áhin ésuk i: aŋ'áwanannuun etiir i tu bufor bu, abe n'awunuun yooŋ éhotukan kane ewahatu yite te yo ereeŋ; aŋ'awunuun ariiñoofo, abe n'áhin siheluun seetoof. 18Bare naane epotor i káhamine i fe, kajukajuk sílaam bala hahooja hu heeniin hee, iti kasarahiin kúyond ku. 19Abaj kunak, Esuwif ni kahaŋ káreeŋin, kánuutin Antiyoos n'Íkoñom. Ni kañak hahooja hu kéesiiŋoorein nu boko, abe ni kawiŋg Pool bujuju kaanuku keeyoolo. Kahaban, ni kañakoo tíyaŋ hikinu hu, ábuki iŋi kaane man aketa. 20Bare hi kéeyilene ku kákuuto hu, n'arito, abe n'ayooso ti hikinu hu. Tifiit, ni kaja Derib, akina ni Barnabas. 21Pool ni Barnabas ni kawaare Hirim Heetoofe hu ti hikinu hite Derib, abe ni káhin bo bakan úkaan kéeyilen ti Yesu. Kahaban, ni kasooñ Listir, n'Íkoñom, n'Antiyoos. 22N'iŋi kahaŋ yooŋ káwutiyen kéeyilene ku sihel ti kikinu kondu, abe n'iŋi kaaniin káñiŋkaan keejok alit tip ti bítim bu. Iŋi kaaniin: ---Úwarawar kajuku sílaam sómbokun kaanuku núuyooso ti Jáyi jite Atambatun. 23Ti kéeyilene kaamo fe, n'iŋi kajifaniin bakan kéeyemi sifaaf su. Iŋi kawoor, abe ni kalaw bija tu boko. Kahaban, n'iŋi kawasiin tu sumoŋu Anahaan u i kayakare u te o. 24Bondu buwas, ni kakan Pisidi, abe ni kareeŋ Pamfili. 25Ni kawaare bakate ku Pers hirim hite Atambatun, abe ni kaja Atali. 26Kanuut toko, ni kájufo t'esahar keeja Antiyoos, hikinu hu ti kanaŋee du yéeni ti kajaku kite Atambatun, kaanuku kéeyini káhinu burok boone. Abe hahiyu burok bondu bihabanaa. 27Hi kareeŋe hu Antiyoos, ni kakuukan kéeyilene ku, abe ni kasokiin naŋ n'Atambatun áhine fu nu boko fe, nu buŋ b'áfeŋgine fu keenooto ku Esuwif karuŋ kite káyilen ku. 28Ni kariiko bo afiyo ni kéeyilene ku.

will be added

X\