3 SAAŊ 1

1Íñje faaf u íkiñjini fee awe Gáyiyus, áwiyam i ímaŋie-maŋie u. 2Óom, íñj'endu ti kalawu yala buroon bu fe ni bijak t'awe, abe n'a̱baj káasuumaay t'enii naane a̱baje i ko tu búwejeti. 3Hikawam hutoofatoof dómbokun hi bakaake kéeyilene káreeŋina hu beebe, abe ni kasokam naane a̱joke i múniyo mu nu sumoŋu súsuba, ni naane a̱kine i te mo. 4Bimbi bihaŋ káhinu hikawam heetoof fe beemo fu kane ijam kaanuku bakañiam kakinakin tu múniyo mu. 5Óom, á̱hinahin beejoŋoore naane aa á̱yokunan kéeyilene ku kiŋki kabin t'aruun, áhaŋum naane kaamo i emoosoora. 6Kanoŋkanoŋk keesok beebe tu buhooŋu kéeyilene ku buŋ b'á̱maŋie fu húŋgowulan ariike. Waasi, aŋ'á̱yokunaniin naane hutoofe i Atambatun, kéeyini kayuunu wútuki wooniin. 7Múniyo kanuutanuut tu boko kaanuku keeja keewaare huruwu hite Kiris, abe kásaariit doon fe ti kéeyilenut ku. 8Náami úne, úwarawar káyokunan bakan naane bokondu, man n'úmaat yooŋ tu burok bimbi káhin bija tu múniyo mu. 9Ikiñjakiñj eleetar yéetofie bija ti bakate ku t'aruun kéeyilene ku; bare Jotiref ámaŋiit kajamu b'isoke bu, ábuki ámaŋamaŋi káyemi aseef oonuun. 10Iŋ'ite ho aamo fu kane ija ibin, íñje kábaŋinan beejakut b'áhine bu fe, ni kirim keejakut ku kaŋk'asok t'uni. Abe araanut diyu: aŋ'ateñeko emoosoora i kéeyilene ku keewanan te o. Kiŋki kámaŋi kaanuku emoosoora yendu keewanan tu boko, n'aŋ'aaniin aaa, abe n'aŋ'awiisiin ti kéeyilene ku. 11Óom, atum'a̱liikool ni meejakut mu, bare a̱liikool ni meejake mu. An aŋ'áhin meejake, akina an ite Atambatun; an aŋ'áhin meejakut, an ondu ámeyiit Atambatun. 12Ésuk i ereyi fe eŋ'esok beejake ti Demetiriyus, abe humuum múniyo mu múwufoorawufoor kaanuku bite toko. Uni yooŋ iriseedoseede beejake, abe á̱moomi kaanuku bimb'irisok bite toko. 13Ibajabaj beehooje bite kasokii, bare ímaŋiit bo kakiñju. 14Mánoman wane kajukoor memee, abe n'uŋu waanoŋk núwaahamin kúsuba wane. 15A̱ja a̱baj káasuumaay. Bákawiyi bakate ku beebe kasaafi. A̱saaf yooŋ bákawiy uni kareyi fe, abe atum'a̱fiil an tu boko.

will be added

X\