2 TIMOTE 2

1Áñuumo, awe bare a̱baj sembe t'Atambatun, éewufoore u úne kajaku koone h'úhine hu t'afeeneŋ ni Yesu Kiris. 2Báhamin b'a̱jamam bu ti kasoku hágila bakan keehooje-hooj, a̱liiken bo bakan kéewoore, kéeyinie kaliiken bo yooŋ bakaaku. 3A̱maat yooŋ n'íñje ti sílaam su naane asulaan eejake ite Yesu Kiris. 4Asulaan eeemo tu burok af'ámaŋi katoofu aseef oone, ákolaariit ni bite keenooto ku esulaan. 5An af'áyemi ti síheekoor ti kateyi, at'ásik hisiibanu hu, kane arko taŋ am ateye naane kateyi ku kusokee i. 6Awaña éelaame u tu múwañiin mu aware fu kajabu añoofo tu doon déehotukanee du. 7A̱yinoor ti b'isoke bee, ábuki Anahaan u káhinii á̱anandin bo fe. 8Á̱baŋino Yesu Kiris. Akina ite tu hubukandin hite Dafit, abe aritaneeritan t'eket i. Bondu beemo fu Hirim Heetoofe hu hih'iwaare. 9Iŋi Hirim hondu Heetoofe hu h'ijuk fee sílaam su, abe n'ifaakee yooŋ ni ñaasel naane ánukenoora. Bare hirim hite Atambatun hifaakutee ni ñaasel. 10Bo bíkinineŋe fu n'iŋ'ímuñ areyi fe iŋ'ite hu bakan k'Atambatun ajifane ku, kaanuku man boko yooŋ Yesu Kiris n'afakaniin, abe n'ánikaniin hiraanu. 11Hirim honde héewoore. Heenaan: «Uf'úket ne o, úne karoŋu yooŋ ne o. 12Uf'úmuñ ti sílaam su, úne káyemi yooŋ bákayi n'akina. Uf'úteñekoo, o yooŋ biteñeko úne. 13Ufut'úyemi bakan kéejube, o abaa káyemi an éejube, ábuki ayinaat kawasu báhamin b'asoke.» 14Bondu b'a̱ware fu kábaŋinan ésuk i ko kireyi fe. Á̱haminiin ayanee hágila Atambatun a̱aaniin itim'iŋi kalob iŋ'ite kirim. Bondu bibajut éñjeriŋ, kane arko taŋ kábuju sihel site keeemo ku ti bajamatan bu. 15Á̱hin wáhowah a̱atoof Atambatun, naane aroka eejake, eeyakut bufuño, abe n'aŋ'aliiken ésuk i Hirim hite múniyo mu ajoŋoor júl. 16A̱tey báhamin beeñunut, beeriibut nu múniyo m'Atambatun áwufoore mu úne, ábuki kiŋki kayooso te bo bokondu ti kahaŋu kakambu Atambatun. 17Báhamin booniin búmoomi naane esontaay yéekuukaaye, yeeemo ti kahaŋu kaŋabu. Himene ni Filet boko kaafeeneŋ ku nu bokondu. 18Kawasawas múniyo mu, abe ni kábuj káyilen kite bakaake iŋi kaaniin Atambatun aheeka eeritan úne t'eket i. 19Bare káyilen k'Atambatun awune ku úne kiyanayan naane kiñaan kítiyar kite enuuf. Kirim konde kikiñjee fu toko: «Atemit ámoomi bakan koone.» Nu bonde yooŋ: «An fe eeene akina an ite Atemit áwuŋg meejakut mu hiñaawu.» 20T'enuuf yéewarie, bíndiis bíteiit éwurus, man yooŋ bite ehalis beemo fu toko barebare. Bike yooŋ bondu toko beefaasee, bike nu burokee n'ekaf. Bítiyar bu uŋu búnuutannee hunak hite efeet, biraanu bu nu búnuutannee húnakonak. 21Kéeyilene ku yooŋ iyu. An af'akuuranooro ti meejakut monde m'isoke mu fe, an ondu anokooranokoor n'éndiis yey'énuutannee hunak hite efeet. Atambatun kákajino bija ti bike burok, ábuki o káñjeriŋ an éekinio u, abe o kásikiee aŋ'abin áhin burok bánoban fe beejake. 22A̱tey wúfaŋi wute hiñiaate hu. A̱ŋes kajoŋoor ku, ni káyilen ku, ni kámaŋioori ku, ni káasuumaay ku. A̱ŋes bondu fe ni kiŋki kalaw Anahaan u nu suhol seekuure. 23Bare síjeeŋoor seeñunut, seebajut yooŋ éñjeriŋ, a̱tey so. Á̱moomi kaanuku iŋi sísikin síheñjeŋoor. 24Abe aroka ite Anahaan u awarut kaheñjeŋoor. Awarawar káneeni t'ésuk i ereyi fe, n'áyiniiin kaliiken bite b'Atambatun, abe n'aŋ'ámuñ. 25Asaaho tíŋ eeliiken keeteñekoo ku. Maske Atambatun n'aŋ'áhiniin keewatanooro kinij kooniin kéemeyi múniyo mu. 26Náami n'iŋi kasooñ kabaj kikaw, abe n'iŋi kafak t'éfiir ite Setani yeejokiin i yéeni, abe n'aŋ'áhiniin keejam te o.

will be added

X\