2 TIMOTE 1

1Íñje Pool eeemo u apotor ite Yesu Kiris naane t'Atambatun ámaŋie du ikiñje fee, íñje eeboñee u kawaare tu buroŋ b'aane bu o kawunu úne, úne kéehine ku t'afeeneŋ ni Yesu Kiris. 2Íñje íkiñjini fee awe Timote eeemo u naane añiam ímaŋie-maŋie u. Atambatun Faaf u, ni Yesu Kiris Anahaan ite úne kaja kásoniyani, ni kayubiyeni yooŋ, abe ni kawuni káasuumaay. 3Ko kireyi fe if'íyemi ti kalawu kaajiŋgan ni káajiim, iŋ'ilaw bija t'awe, abe iŋ'eene Atambatun eyeehen uŋu húuwe hu. Iŋ'eeno eyeehen, akina ii irok uŋu hoone hu n'ehol yeekuure but naane sifaafam kómbokun ii káhinaani. 4Iŋ'íbaŋino muhuw múuwe, n'aŋ'arkaam kasooñu ijuki kaanuku hikawam heetoof. 5Iŋ'íbaŋino káyilen keeyane keeemo ku t'awe. Káyilen kondu k'íñaayi ómbokun Loyis, n'íñaayi Enis kajabe ku kabaj, abe bukuuramkuur kaanuku a̱bajabaj ko yooŋ. 6Iŋ'ite ho aamo fu íñje kábaŋinani bonde: doon d'Atambatun ánihani du h'ibine hu ísit t'awe sumoŋiam, atum'a̱kananoor ne do. 7Ábuki Búwejet b'Atambatun awune bu úne bíhinaariit núuyemi bukoloow; uŋu buwun úne sembe, ni bíhin núumaŋi bakan, abe n'uŋ'újokumooro. 8Náami atum'aŋ'a̱fuño kawaare bite b'Anahaan ite úne. Atum'a̱fuñaam yooŋ íñj'eemo ee t'ekulu i uŋu hoone hu. Bare a̱maat yooŋ naane íñje ti sílaam su iŋ'ite Hirim Heetoofe hu; a̱maat ni sembe s'Atambatun awuni su. 9Akina afakane fu úne, abe n'aruw úne kaanuku núuyemi bakan koone keenabe. Káanukiiit man úne únoŋke ajakee, bare aŋarkeyi naane búmoomi ti hikawo, abe yooŋ ámaŋamaŋi káwufoor úne kajaku koone. T'etaam i éwuwanoorutee, aanaan o kaŋaasu ti Yesu Kiris éewufoor úne kajaku koone. 10Hahiye kujukanaa ésuk i h'Afakana ite úne Yesu Kiris áŋaasina hu. Akina ábuje fu sembe site eket i, abe n'aŋaas ti Hirim Heetoofe hu éewufoor úne buroŋ béeketaariit bu. 11Atambatun áhinamhin íiyemi apotor kaanuku iŋ'ibin iwaare ésuk i Hirim hondu Heetoofe hu, abe n'iliikeniin ho. 12Bo bíkinineŋe fu sílaam súuma sonde. Bare ifuñeit bondu, ábuki ímoomi t'aañ ti hikawam hiyaŋge fu, abe bukuuramkuur kaanuku abajabaj sembe site kajukar b'ánihanam bu bija tu hunak hite Kajoonan ku. 13Kirim kite ku nu múniyo k'a̱bine ku a̱jam t'íñje, a̱neefan te ko ti manoŋkar múuwe. A̱jok alitee ti káyilen ku, abe n'á̱maŋi húŋgowulan ni kámaŋi kéenuutina ti Yesu Kiris. 14A̱jok áwariee b'Atambatun ánihani bu. A̱jok bo ti sembe site Búwejet Beenabe bu beekine bu t'úne. 15Naane á̱meyie i, bakate ku tu búsuk bite Asi fe káwuŋgamwuŋg kiñaawu; Fisel n'Erumosen yooŋ boko. 16Onesifoor bare nu butoŋ boone, Atambatun aja áwufooriin kajaku koone. Ábuki akina af'afand karooŋan eholam, aanut yooŋ ífuñinanafuñinani te o naane eemo ee t'ekulu i. 17Bare h'áreeŋina hu Rom, átumbatumba aŋesam ayak ajukam. 18Anahaan u aja áhino eemaat ti kajaku koone hunak hite Kajoonan ku. Abe á̱moomi akuur but naane áyokunanam i Efees.

will be added

X\