2 TESALONIK 3

1Hahiyu kújakuwe, arilaw bija t'uni man hirim hite Anahaan u ni hijamo ahilee, abe tánotan fe nu hujokee, naane aa árihin t'aruun. 2Arilaw yooŋ man Atambatun n'ajukar uni ti bakan keejakut ku abe ni kánafut. Ábuki ésukiit ereyi éyilene fu t'Atambatun. 3Anahaan u áwasaariit hirim h'asoke; o kawunuuun sembe, abe n'ajukaruun ti Setani. 4Anahaan u áhinahin kikaw uni keeyaŋg uŋu hoonuun hu. Bukuurakuur uni kaanuku aŋ'árihin naane ii irisokuun, abe aribaa yooŋ káhinu bo. 5Anahaan u Yesu Kiris aja ajoŋooran siheluun, éehinuun aŋ'árimuñ naane akina, abe n'áhinuun áriimaŋi yooŋ Atambatun. 6Kújakuwe, uni bokondu ti kasokuuun bonde tu huruwu hite Anahaan u Yesu Kiris: arikamb kéeyilene ku keeemo ku biñek, abe n'iŋi kateñeko yooŋ káhinu b'iriliikeniin bu. 7Aruun kumuumuun árimoomi akuur but buŋ b'ariware fu káhinu ariiliikool n'uni. H'íriyemie hu t'aruun íriñekiaariit. 8Iriñoofeit t'an fuufu. Aaa, iŋ'irirok burok beeniŋe kaajiŋgan ni káajiim kaanuku an t'aruun atum'álaam t'uni. 9Hih'írihin iyu, káanukiiit man uni iriwarut kabaju t'aruun doon, bare uni írimaŋiuun káwuforoor bija tu kuwaatu. 10Múniyo h'íriyemie hu t'aruun, irisokuunsok bonde: «An afut'ámaŋi burok, awarut yooŋ buñoofo.» 11Irisokuunsok bonde ábuki irijamajam kaanuku bakaake t'aruun biñek, károkaariit doon fe, tiŋkan buyooso ti bi kakolut bu ne bo. 12Bakan kondu, bonde b'irisok fu nu boko tu huruwu hite Anahaan u Yesu Kiris: karok ti káasuumaay keenoŋk kéekuumanooro. 13Kújakuwe, aruun bare, atum'ariene árilaamalaam káhinu kite meejake mu. 14Ake t'aruun afut'áhin naane irisokuun ee t'eleetar yende, arirejoor bo, abe n'ariteyo man n'afuño. 15Atum bare arijoko naane anatoorauun, bare aririmo naane atuuun. 16Yala Anahaan u aa awun káasuumaay ku n'awunuun akina humuumo káasuumaay ko kireyi fe, nu tu doon areyi. Yala Anahaan u n'áyemi n'aruun arireyi fe. 17Kasaafu konde, íñje Pool inoŋke fu iikiñj ko n'emoŋiam. Iye if'ihabanoor bileetar búuma bireyi fe. Diye makiñjar múuma. 18Anahaan ite úne Yesu Kiris aja ásoniyanuun arireyi fe.

will be added

X\