2 TESALONIK 2

1Kújakuwe, ti bite bíbatikeina bite Anahaan ite úne Yesu Kiris, nu bukuukanooro bite b'úne ne o, iriilawuun bonde: 2bakaake ifi kaanuun hunak h'Anahaan u ábatikein hu te ho hireeŋa, siheluun sija sibeb, atum'áriyileniin. Hutoof yooŋ ake ayiŋanuun bo tu huruwu hite Atambatun, man yooŋ n'awaareuun bo, man yooŋ ni kaanuun irikiñjakiñj bo t'eleetar, atum'árikoleyi. 3Atum'ariwas an eebuutuun t'efehe yánoyan. Ábuki bala hunak hondu hireeŋ, bakan keehooje kajabu kárahan t'Atambatun, abe Ánafuta u eeware u bútowuto hiraanu n'atik áŋaasin. 4O kajeeŋan doon fe deenabe, nu doon fe déesukaayee. O kaanu ahaŋahaŋ bokondu fe. O bija ayak ayooso t'Enuuf ite Atambatun eeriiko toko, abe n'aŋ'aane akina humuumo aamo fu Atambatun. 5Isokuunsok bondu h'íyemie hu t'aruun, áribaŋineit? 6Abe bare árimoomi beekoleno bu béekinineŋe bu h'ata h'abin kane arko taŋ ewahatu yeene ereeŋe. 7Sembe séenuusee site Ánafuta u sondu tu burok kep. An eekolene u Ánafuta u af'aja ayak abin áami anuutanee, 8Ánafuta u n'aŋ'áŋaasin, abe Anahaan u Yesu n'aŋ'áwuur te o eeyoolo. O kátumbu ábujarooroo ni meejaaŋe meeyak mu káriboorina ne o kane ábatikein. 9Ánafuta u bibin ni sembe site Setani, abe o káhinu buroon bómbokun beehaŋe ésuk i kikaw kaanuku eebuutiin. 10O káhinu buroon bánoban beejakut kaanuku eebuut keeemo ku tu bútowuto. Abe bokondu tu bútowuto ábuki múniyo meewariin mu yéeni kafakan, káfeŋginut mo ñúwejet ñooniin. 11Bondu bíkinineŋe fu Atambatun n'áboñiniin búwejet bite kahiilaniin kayak iŋi káyilen haajuus hu. 12Náami kéeyilenut ku fe tu múniyo mu, abe n'iŋi kabaj katoofu kooniin ti meejakut mu kajoonanee. 13Kújakuwe, iriwarawar kaanu ko kireyi fe Atambatun eyeehen uŋu hoonuun hu, aruun k'Anahaan u ámaŋie ku. Múniyo Atambatun ajifanuunjifan kaanuku áriiyemi étiyar i ti kafaku ku. 14Bondu bibajabaj aŋarkeyi naane áriyilenayilen tu múniyo mu; bibajabaj yooŋ ti sembe site Búwejet Beenabe bu, béehinuun bu áriiyemi bakan kite Atambatun. 15Náami kújakuwe, arijok alitee, abe n'arinaŋ ti kikawuun b'irijoŋoore bu n'aruun iriiliikenuun, man yooŋ b'írikiñjinuun bu. 16Atambatun Faaf úne ámaŋamaŋi úne, abe ti kajaku koone n'ayaŋganan úne kikaw ko kireyi fe n'eyakar yeeyane. Uni bokondu ti kalawu Anahaan ite úne Yesu Kiris humuumo, n'Atambatun Faaf úne 17man ni káyokunanuun ariijok alitee, abe ni kawunuun sembe aŋ'árihin ko kireyi fe meejake, abe n'aŋ'arisok yooŋ beejake.

will be added

X\