2 TESALONIK 1

1Íñje Pool, ni Silas, ni Timote, írikiñjinuun fee, aruun bakate ku Tesalonik kéeyilene ku, aruun k'Atambatun Faaf úne, n'Anahaan u Yesu Kiris kakino ku. 2Atambatun Faaf u n'Anahaan u Yesu Kiris kaja kásoniyanuun, abe ni kawunuun káasuumaay. 3Kújakuwe, iriwarawar kaanu Atambatun ko kireyi fe eyeehen uŋu hoonuun hu. Abe ajakeejak naane ii írihin iyu, ábuki káyilen koonuun kihaŋa bija hágila, abe kámaŋioori k'árimaŋioorie ku kondu ti kahaŋu kayanu. 4Iŋ'ite ho h'if'irisaŋgoor uŋu hoonuun hu ti bakaaku kéeyilene ku. Ábuki naane aa arijuk sílaam bija yooŋ kúnuur fe, arijokajok alitee ti káyilen koonuun. 5Bare sílaam sondu káwufoor kaanuku Atambatun aŋ'ajoonan ésuk i ajoŋooree. Ábuki fu naane aamo i aŋ'arijuk sílaam, Atambatun káhinuuun áriiyemi bakan bakate nu múniyo, buroŋ boonuun beeriib ni jáyi joone. H'arijoke hu te jo híkinineŋe fu n'aŋ'arijuk sílaam. 6Múniyo Atambatun káhinu beejoŋoore: o káhihinoor kiŋki káhihinooruun. 7Abe o káyihinanuun, aruun kaŋk'arijuk sílaam su, n'uni yooŋ fe. O káhinu bo kane Anahaan u Yesu áŋaasin tu bufor bu, akina n'emalaka yeene bakate sembe su. 8O bibin ti kaañen kómbokun kaanuku eenij ásuf ti kéemaŋiit ku kámeyi Atambatun, abe n'iŋi kateñeko káhinu naane Hirim Heetoofe hite h'Anahaan ite úne Yesu Kiris husoke i. 9Kúnuur ki kaja ku kajuku keemo fu konde: boko bútowuto hiraanu, keekamboor sat n'Anahaan u, ni sembe soone séenike su. 10Bondu kabaju hunak h'Anahaan u abin hu te ho. Hunak hondu, o bíbatikeina kaanuku bakan k'akino ku fe kéenikano; aamo fu kéeyilene ku fe kasokorooro. Aruun yooŋ káyemi nu boko, ábuki áriyilenayilen hirim h'irisokuun hu. 11Iŋ'ite ho h'if'irilaw ko kireyi fe bija t'aruun. Iŋ'irilaw Atambatun ite úne kaanuku man n'áhinuun áriiyemi bakan bakate nu múniyo, buroŋ boonuun beeriib ni naane ámaŋie i h'aruwuun hu. Áyokunanuun yooŋ ni sembe soone áriiyini káhinu meejake m'árimaŋie mu, nu burok b'ariemo bu te bo aŋarkeyi naane áriyilenayilen te o. 12Iŋ'irilaw bondu kaanuku man ésuk i fe n'esokoroor huruwu hite Anahaan ite úne Yesu uŋu hoonuun hu, abe ni kasokorooruun yooŋ uŋu hoone hu. Bondu kabaju aŋarkeyi naane Atambatun ite úne, n'Anahaan u Yesu Kiris kásoniyanuun.

will be added

X\