2 PIYEER 3

1Kújakuwe, aruun k'ímaŋie-maŋie ku, eleetar yende ésooboriyan y'íkiñjin fee n'aruun. Tu súsuba su fe, iŋ'íbaŋinanuun b'ariliikenee bu kaanuku man n'arinaŋ tu ñúwejet ñoonuun biyinoor beejoŋoore. 2Áribaŋino báhamin b'eyiŋana yite Atambatun keenabe ku kabine bu kasok kóŋkeyin, n'eluwa yite Anahaan u n'Afakana u yooŋ toko, y'epotor i k'Atambatun áboñinuun ku kaliikenuun i. 3Arijab árimeyi bonde: tu kunak kiraanu ku, bakan bibin, abe wúfaŋi wooniin weejakut wu taŋ wi kaja fu káhinu. Boko kásuwuuun, 4abe n'iŋi kaane: «Yesu aanut kereŋ akina bíbatikeina? Náami ondu diin? Sifaaf úne kaketa, abe bare doon fe duwayeit huta h'etaam i eŋ'ebin éwuwanee!» 5Bare bike bondu toko bi kanoŋke keefiil: kóŋkeyin, Atambatun asokasok hirim, bufor bu nu búwuwanee, n'etaam i. N'ánuutann etaam i tu móhujo mu, abe nu móhujo n'aroke fu yo. 6Abe nu móhujo yooŋ mite kóyin etiir yómbombokun i n'ábuje fu etaam ite i kóŋkeyin. 7Hirim hondu hoho hite h'Atambatun hujoke fu bufor bite bu hahiye n'etaam i, sineemak su seebin séesuf buroon bondu. Binaŋeenaŋ bija tu hunak h'énafuta i kaja hu kajoonanee te ho, abe ni kátowutanee hiraanu. 8Kújakuwe, aruun k'ímaŋie-maŋie ku, abajeebaj bare bike b'ariwarut kafiilu: t'Anahaan u, hunak hifeeneŋ húmoomi naane simit éñjune, abe simit éñjune ni síyemi naane hunak hifeeneŋ. 9Bakaake iŋi kaane Atemit ákurakuri ti káhinu b'asoke bu, bare tókoiit. Am aŋ'ámuñ n'aruun kep, ábuki ámaŋiit mayet afeeneŋ átowuto. Aaa, b'ámaŋie bu beemo fu huruw fe n'awatanooro wuhoofoor woone. 10Hunak h'Anahaan u ábatikein hu te ho káfufu naane ákuw. Hunak hondu, karim kéekolinanie-kolinani kajamiee kane bufor bu bíyemi tu bútowuto, abe buroon beeemo bu te bo kásufiee. Etaam i nu doon fe deeemo te yo kajoonanee. 11Makamu buroon bu fe iyu i bija fu bútowuto, hahiyu arijuk jak buŋ bu buroŋ boonuun buware fu káyemi! Buwarawar kanabu, abe n'arijok yooŋ alitee t'Atambatun, 12aruun ti kanahan ku hunak hoone, aruun yooŋ ti káhinu wáhowah kaanuku heesoŋk heereeŋ. Hunak hondu, sineemak su kásufu bufor bu, abe buroon bite bu t'etiir fe butuuyo. 13Bare Atambatun afiyafiya asok aane o káwuwan bufor bíyeni, n'eke etaam yooŋ, abe buroon béejube taŋ bija fu káyemi toko. Bondu b'únahan fu. 14Kújakuwe, aruun k'ímaŋie-maŋie ku, iŋ'ite ho aamo fu makamu aruun bokondu ti kanahan hunak hondu, árihin wáhowah man n'áriyemi hágila Atambatun bakan keekuure, bakan keeyinaatee kawatan tu doon fe, ni bakan yooŋ keebaje káasuumaay ne o. 15Abe n'arinaŋ bonde ti kikawuun: Anahaan u ondu ti kámuñu kep kaanuku man n'áriyini kafaku. Bondu b'ati úne Pool, nu búwesinato b'Atambatun awuno bu asokuun fu t'eleetar yeene. 16Aŋ'asok bo yooŋ ti bileetar boone fe kane ajemen bonde. Abajeebaj ti bileetar boone bike béetaañie kajoku, abe bakan kéewesinateit, káyilen kooniin yooŋ kifamut, n'iŋi kajok bo kawetekanoor, naane ii káhin yooŋ nu waawu wuwiit wute Míkiñjin mu. Iyu ifi káhin kéetowutanooro. 17Kújakuwe, aruun k'ímaŋie-maŋie ku, aruun bare, ariheeka áriimeyi bonde. Iŋ'ite ho aamo fu aritey énafuta i, itim kabin kahiilanuun ti kájuumu kooniin, kéehinuun atum'aŋk'arijok alitee. 18Bare arihaŋ kajoku alitee t'Anahaan ite úne Yesu Kiris, n'Afakana ite úne yooŋ toko, man n'arihaŋo kámeyi, abe n'ahaŋuun yooŋ kásoniyan. Aja ákini kániku ku hahiye nu ko kireyi fe! Amiin.

will be added

X\