2 PIYEER 1

1Íñje Simoŋ Piyeer aroka ite Yesu Kiris, n'apotor oone toko yooŋ ikiñje fee bakan k'Atambatun awune ku káyilen keeree ni kite k'uni. Yesu Kiris eeemo u Atambatun ite úne, n'Afakana ite úne toko yooŋ awunawun úne káyilen kondu aŋarkeyi naane ájubajub. 2Atambatun aja ahaŋuun kásoniyan, abe n'awunuun yooŋ káasuumaay keefame-fam iŋi naane árimeyiiin i, akina n'Anahaan ite úne Yesu Kiris. 3Atambatun awunawun úne ti sembe soone doon fe d'úsawulee du kaanuku núuroŋ naane ámaŋie i. Áhinahin úne bondu iŋi kámeyi k'úmeyio ku, akina eeruwe u úne kaanuku núujuk kániku koone ni kajaku koone. 4Iyu a awune fu úne buroon bómbokun béewarie naane afiye i asok aane o kawunu úne bo. Áhinahin iyu kaanuku af'arijok bo, n'arifak tu wúfaŋi weejakut weeemo wu t'etaam ye wuwu wúbuj ésuk i, abe n'aribaj sihel naane yeene i. 5Iŋ'ite ho aamo fu áriñiŋkaan áriiwutiyen manoŋkar meejake ti káyilen koonuun; ti manoŋkar meejake mu n'áriwutiyen toko kámeyi b'Atambatun ámaŋie bu; 6ti kámeyi ku b'Atambatun ámaŋie bu n'áriwutiyen toko bújokumooro; tu bújokumooro bu n'áriwutiyen toko kajoku alitee ti káyilen ku; ti kajoku ku alitee ti káyilen ku n'áriwutiyen toko káhinu naane Atambatun ámaŋie i; 7ti káhinu ku naane Atambatun ámaŋie i n'áriwutiyen toko kajokoor baatiaay; ti kajokoor ku baatiaay n'áriwutiyen toko kámaŋioori. 8Ábuki af'aribaj síjiko sondu, abe nu sulooñ t'aruun, so kákinineŋ kámeyi k'árimeyie ku Anahaan ite úne Yesu Kiris ni kibaj éñjeriŋ, abe nu kubukoor meejake. 9Bare an eebajut u so, ámoomi naane an éefuume; ájukaariit áwariee. Afiilafiil kaanuku Atambatun akuuranakuuran wuhoofoor woone wute wu kóŋkeyin. 10Kújakuwe, iŋ'ite ho aamo fu áriñiŋkaan ariijok alitee áriiwufoor kaanuku Atambatun aruwuunruw, abe n'ajifanuun yooŋ. Ábuki af'árihin iyu, at'ariney hikee ti kaahoofoor. 11Iyu a Atambatun aja fu káfeŋginuun tay wuruŋ wute Jáyi jéehabanaariit ju. Jo jeemo fu jite ju Yesu Kiris Anahaan ite úne, n'Afakana ite úne yooŋ toko. 12Iŋ'ite ho aamo fu naane árimeyie i buroon bonde fe, abe yooŋ n'arijok alitee tu múniyo m'arijame mu, ibaa kábaŋinanuun bo ko kireyi fe. 13Ijukerajuker n'eene naane eemo i buroŋ, íñje kábaŋinanuun bo kaanuku man n'áriniyo. 14Ábuki ímoomi kaanuku memee n'iŋ'iket, naane t'Anahaan ite úne Yesu Kiris áwufooram du bo. 15Íñje káhinu wáhowah kaanuku man kane ibin iket, n'aŋ'aŋ'áribaŋino ko kireyi fe buroon bondu. 16H'iribine hu irisokuun kaanuku Anahaan ite úne Yesu Kiris bíbatikeina ni sembe, kúsuwanooriiit kéetuutee k'irisokuun. Bare irijukajuk kahahu koone ni ñíkin uni féet. 17Írimoomi ne o ti hirij heenabe hu, kóyin k'Atambatun Faaf u ánikano ku, abe n'asalo yooŋ. Kóŋkeyin, kaaji kite Atambatun eehaŋe u énika kíhaminnahaminn ne o keene: «An onde aamo fu Añi úuma i ímaŋie u. Te o ti hikawam hutoofe fu.» Uni kumuum uni irijamajam kaaji kondu kéenuutina kii t'etiir bufor bu. 19Iyu u úhaŋe fu káyilen báhamin b'eyiŋana yite Atambatun kasoke bu. Árihinahin áwari aa ariinaŋ te bo siheluun, ábuki búmoomi naane ejaaŋana yéetife t'ábaanie ayak abin áami hurabu hu hireeŋa, abe kaarabu ku ni kijaaŋan suhol soonuun. 20Arijab árimeyi jak bonde: an ayinaat káhandin akina humuumo báhamin bite eyiŋana yite Atambatun beeemo bu ti Míkiñjin mu. 21Ábuki an ámusut bunoŋkooro eeyiŋan báhamin bite Atambatun. Bare Búwejet Beenabe bu bitiŋge fu kúŋgowulan ku keeyiŋan báhamin bite Atambatun.

will be added

X\