2 KORENT 9

1Ti bite sírirem seetegee su kaanuku t'áyokunan bakan kite Atambatun bakate ku Serusalem, bijarut n'iŋk'ikiñjuun bike íwutiyen ti b'isoke bu. 2Ímoomi kaanuku arisiiŋasiiŋo ti kaanu ku áriiyokunaniin, abe imakamak uŋu hoonuun hu ti bakate ku Maseduwan eeeniin: «Bakati úne bakate ku Akayi kafaraa kawunu ku huta hu foomane.» Bíhabaneina boonuun bondu biñakañak bakan keehooje tu boko. 3Náami íiboñinuun bakati úne bokondu kaanuku t'áami nu múniyo, arifarafare naane isokiin i. N'aŋ'áami b'irisambooree bu uŋu hoonuun hu iti bíyemi fuufu. 4Káhinaate iyu, if'ibin t'aruun ni bakate ku Maseduwan, abe n'írireeŋin aruun t'arifareit, káwoolu k'íriwooluuun ku n'uŋu kusooñ kíyemi t'uni ñufuñ, abe aruun kumuumuun yooŋ n'aŋ'arifuño. 5Iŋ'ite ho h'ijukere fu n'ilaw bakati úne bokondu eeniin kágilanam toko keebin t'aruun keetofotoor bondu beejake bii bite kawunu ku b'arifiye bu arisok. Iyu n'iŋi bifare kane íreeŋin, abe n'uŋu búwufoor kaanuku aŋ'ariwun árihabanein, ániit anoŋkooranuun. 6Áribaŋino bonde: an af'ayoosen sinawaay seefamut, o káhotukan diŋgilis; an n'ayoosen dómbokun, o káhotukan dómbokun. 7Náami huruw fe aja awun naane t'ayinoore du tu búwejeto; káanukiiit man nu buwatanooro, man yooŋ am atiŋgee, bare áhin bo ni katoofu, ábuki Atambatun aŋ'ámaŋi an eewune ni katoofu kómbokun. 8Abe Atambatun áyinooniuun kawunu beejake bánoban ahahan, kaanuku ko kireyi fe n'aribaj doon fe d'arisawulee du, abe ni diŋeñen yooŋ bija ti káhinu kite meejake mánoman, 9naane busokee i ti Míkiñjin mu. Meenaan: «An eejake aŋ'awun dómbokun keebajut ku, abe kajaku koone kisiiŋasiiŋo hiraanu.» 10Atambatun af'awun awaña u sinawaay, o yooŋ af'awuno doon dite búkuumanooro. O kawunuuun yooŋ sinawaay seefame, abe n'áhin so seehaat kaanuku man meejake moonuun nu mubuk miriyaay meehooje. 11Iyu, n'aŋ'áriyemi kusaanum t'ebaj yánoyan, kaanuku man n'áriyini kawunu bakaaku árihabanein. Náami bakan keehooje-hooj n'iŋi kaane Atambatun eyeehen iŋ'ite buroon b'arisaane bu uni iriijeiin ne bo. 12Ábuki bondu bamb'árihin ii uŋu búyokunan bakan kite Atambatun ti bisawula booniin, abe yooŋ iŋi bíhin bakan keehooje-hooj ni kalaw Atambatun keeeno eyeehen iŋ'ite te bo. 13Abe bondu b'arija bu káhinu, bo káwufoor kaanuku áriyilenayilen árihabanein. Bakan keehooje-hooj kasokoroor Atambatun iŋi naane aa árijeŋgin Hirim Heetoofe hite hu Kiris, hondu h'áriyilene hu. Boko yooŋ kasokorooro iŋi naane aa áriruboor ebaj yeenuun nu boko, n'ésuk i ereyi yooŋ. 14Boko kalawu bija t'aruun, abe bondu káwufooruun kaanuku kámaŋiuunmaŋi, ábuki Atambatun ásoniyanuunsoniyan dómbokun. 15Úene Atambatun eyeehen iŋi b'awune bu úne beehaŋe bu doon areyi fe!

will be added

X\