2 KORENT 8

1Kújakuwe, írimaŋamaŋi árimeyi naane Atambatun áwufoore i kéeyilene ku keeemo ku t'ésuk ite Maseduwan kajaku koone. 2Kajukajuk bo sílaam sómbokun, bare kikawiin kútumbatumba kutoof kasooñen naane aamo i kabajut doon fe-fe-fe, doon di kawune du dihahahah. 3Iiseede bonde: kawunawun doon di káyinie du; kajaja yooŋ ayak abin áami kawuna ahaŋ doon di káyinie du. Kanoŋkanoŋk 4kéewasiyan uni dómbokun kaanuku man boko yooŋ sírirem sooniin ni sígiiloolee ni seeja su kaboñiee bija ti bakan k'Atambatun akino ku bakate ku Serusalem. 5Bi káhine bu bihaŋahaŋ b'iriyakare bu yéeni. Kajabajaba kásik ñúwejet ñooniin kasaan Anahaan u; kahaban, ni kájeŋgin uni káhabanein naane t'Atambatun ámaŋie du. 6Tit ajabe fu asiiŋan t'aruun bateg bu bite káyokunan kite bakate ku Serusalem kéeyilene ku. Iŋ'ite ho h'íriwasiyano fu irieno ábatikein t'aruun eebin éereeŋinan burok bondu beejake bii. 7Aruun kusaanum tu buroon bu fe: ti káyilen ku, ni kámeyi kite múniyo mu, ni kawaare kite te mo, ni bíhabaneina bu t'Atambatun, ni kámaŋi k'árimaŋie ku uni. Náami írimaŋamaŋi áriyemi yooŋ naane kusaanum tu burok bondu beejake bii bite bateg bu. 8Íñjeiit eemo ti kanoŋkooranuun. Íñj'eemo ti kasokuuun naane bakaaku káhabaneina i ti káyokunan kite kéeyilene ku, iijuk man aruun yooŋ árimaŋamaŋi bakaaku nu múniyo. 9Ábuki árimoomi naane Anahaan ite úne Yesu Kiris áwufoore i úne kajaku koone: akina éeyemie u husaanum, n'áhinooro an eebajut uŋu hoonuun hu kaanuku man kabajaate koone ni kíhinuun áriiyemi kusaanum. 10Foomane, aruun áriyemie fu étiyar i ti kaanu ku árimaŋamaŋi káyokunan bakate ku Serusalem kéeyilene ku, aruun áriyemie fu yooŋ étiyar i ti káhinu kite te bo. Náami íñj'endu ti kasokuuun kaayinoor kúuma tu bondu, abe bo yooŋ bijake fu t'aruun: 11arihabanoor bo hahiyu. Árihabanein ti káreeŋinan kite te bo nu doon d'aribaje du, naane árihabaneina i yooŋ ti kájabina kite te bo. 12Ábuki an af'awun áhabanein, bondu bijakajak t'Atambatun. Atambatun aŋ'ámaŋi an awun aliik tu doon d'abaje du, káanukiiit tu doon d'abajut du. 13Eenutuun arihaŋkooro áriiyokunan bakaaku. Ésuk i fe ewarawar kareyi. 14Hahiye árinooni kásiku baataayaay boonuun áriiyokunan keebajut ku. Hike hunak, aruun yooŋ afut'aribaj, n'iŋi kafin kásik baataayaay booniin kéeyokunanuun. Iyu, ésuk i fe n'eŋ'ere 15naane yooŋ ti Míkiñjin mu musoke du. Meenaan: «Keehere ku dómbokun kabajut ahahee, keehere ku diŋgilis kabajut átetiee.» 16Úene Atambatun eyeehen, akina éehine u Tit éehabanein t'eholo kaanuku éeyokunanuun, naane uni yooŋ írihabaneina i! 17Tit aanaan hee eebin t'aruun naane irisoko i. Afiyafiya ásiten bo yéeni, ábuki átumbatumba áhabanein ti kaanu kite éeyokunanuun. 18Íriboñiniinboñin o n'ake ati úne. Ati úne ondu, kéeyilene ku fe iŋi kasok te o beejake iŋi naane aa awaare ajakee Hirim Heetoofe hu. 19Abe yooŋ kéeyilene ku kajifano fu kaanuku eebin eeriboor n'uni ti kátuki k'irija ku, bija kasaan bakate ku Serusalem kéeyilene ku sírirem seetegee su. Burok bondu beejake bii kánikan Anahaan u, abe bo yooŋ káwufoor kaanuku írimaŋamaŋi káyokunan bakaaku. 20Sírirem s'irisaanee su sifamafam, abe írimaŋiit an abin awatan uni ti naane irijoke i so. 21B'iriŋes bu káhinu beemo fu beejake bu, káanukiiit t'Atemit barebare, bare yooŋ tu kúŋgowulan ku. 22Íriiboñin ake ati úne yooŋ éeriboorin nu boko. Ati úne ondu, irijukajuk keehooje-hooj kaanuku áhabaneinohabanein tu burok bite b'Atambatun. Abe hahiye ahaŋa bíhabaneina aŋarkeyi naane hikawo hiyaŋgayaŋg t'aruun. 23N'afin áami Tit, uni if'iriboor, abe aŋ'arok n'íñje bija t'aruun. Bakati úne bakaaku kéeriboorina ku ne o, kéeyilene ku káboñiniin fu, abe iŋi karok bija ti kánikan kite Kiris. 24Náami áriwufooriin kaanuku árimaŋiiinmaŋi nu múniyo, beekuur kéeyilene ku kaanuku irikooŋakooŋ fu naane ii irimak iye uŋu hoonuun hu.

will be added

X\