2 KORENT 7

1Kújakuwe, aruun k'ímaŋie-maŋie ku, makamu Atambatun aanaan o káhinu úne bondu fe, úkuuranooro tu buroon bu fe bumbu bubuusatan sini su nu ñúwejet ñu. Úbaj buroŋ bite bakan keenabe kareeŋ, abe n'úkoleyi Atambatun. 2Árifeŋgin uni siheluun! Iritinut t'an, íribujut káyilen kite an, iribuutut yooŋ an íriisik ebaj yeene. 3Isokut bondu kaanuku iitinanuun. Iheeka eeenuun írimaŋiuunmaŋi dómbombokun, abe humuum eket i eyinaat kákinineŋ n'iriraan kámaŋi koonuun. 4Hikawam hiyaŋgayaŋg t'aruun dómbokun, abe n'aruun n'if'isaŋgoor. Naane aamo i iŋ'irijuk sílaam fe, hikawam iŋi hiyaŋg piŋ, abe iŋ'itoofan dómbokun. 5Múniyo h'irireeŋe hu Maseduwan, íritumbut iriyih mayet, abe irijukajuk sílaam sánosan: iribatikanoorabatikanoor ni bakan, sihel site s'uni yooŋ sibebut. 6Bare Atambatun aa abeetoor keeemo ku kikawiin uŋkut kusok, n'abeetoor uni éehin Tit éereeŋin. 7Abe káanukiiit kikaw uni kiyaŋgayaŋg iŋi naane Tit áreeŋina i barebare, bare kiyaŋgayaŋg yooŋ iŋi naane asoke i uni kaanuku aruun kumuumuun aribeetoorobeetoor. Asokasok uni kaanuku árimaŋamaŋi dómbokun kasooñu arijukam, n'asok yooŋ naane ariwatanooree i beebine bu bibaj, ni naane árihabaneina i bísiiŋooreina n'íñje, isooñen hikawam ni hihaŋ katoofu. 8Ímoomi kaanuku eleetar íima eraan i éhinuunhin áriitaañian, bare iŋkut iwatanooro hahiye. Múniyo iwatanoorawatanooro yéeni h'ijuke hu kaanuku eleetar i éhinuunhin áriitaañian toko-toko. 9Bare hahiye itoofana, káanukiiit naane íhinuun i áriitaañian, aaa. Itoofanatoofan naane aamo i kátaañian koonuun kíhinuunhin ariiwatanooro kunoŋk koonuun. Kátaañian koonuun, t'Atambatun kijakajak, hahiyu uni írihinutuun doon fe. 10Abe kátaañian keejake t'Atambatun uŋu kubuk buwatanooro bite kafakan an u, abe an u at'awatanooro bondu hikee. Bare kátaañian kéebukaariit buwatanooro uŋu kútowutan an u. 11Kátaañian koonuun, t'Atambatun kijakajak, abe hahiyu arijuka buŋ bi heemo fu! Arijuk naane arihile i ti káhinu kite buroon bu beewayo, nu buŋ b'árihandine fu baabu báhamin bujoŋoor, nu buŋ b'ariyiŋate fu t'aruun kumuumuun, nu buŋ b'árikoleyie fu káhinu kite meejakut mu, nu buŋ b'arimokene fu kasooñu áriheelin t'íñje, nu buŋ b'árihabaneina fu t'Atambatun, nu buŋ b'arifaree fu kajoŋooran an eetine u! Áriwufoorawufoor tu buroon bu fe kaanuku arikuurakuur but tu bondu. 12Náami h'íkiñjinuun hee, iŋ'ite híiit an eetine u, man yooŋ an i katine u te o. Íkiñjinuunkiñjin kaanuku áriinandin akuur but hágila Atambatun kaanuku árimaŋamaŋi uni árihabanein. 13Iŋ'ite ho hi kikaw uni kiyaŋge fu. Káanukiiit man kikaw uni kiyaŋgayaŋg barebare, bare iritoofanatoofan yooŋ dómbokun iŋi naane aamo i Tit hikawo hutoofatoof aŋarkeyi naane arireyi fe árihinahin ehelo yeebeb. 14Imakamak te o uŋu hoonuun hu, abe arisaanutam ñufuñ. Abe naane ii iriboo kasokuuun múniyo mu, iyu yooŋ i beejake bu b'irisoke bu Tit t'aruun beemo fu bite nu múniyo. 15Kámaŋi k'ámaŋiuun ku iŋi kihaŋ kane ábaŋino naane árijeŋgino i arireyi fe, ni naane arijoko i áwariee n'ekoloowe, abe ti kábitu yooŋ. 16Hikawam hutoofa dómbokun naane aamo i íyinooni kayakar t'aruun tu doon areyi fe.

will be added

X\