2 KORENT 4

1Atambatun ayubiyene fu eesaan uni burok bondu; iŋ'ite ho h'iriñakeit fu ni hiñaawu. 2Iriteñekateñeko béefuñinanie bu bumbu búnuusee. Íribuutaariit an, abe írihosanaariit yooŋ Hirim hite Atambatun. Múniyo mu kep m'if'íriwufoor ésuk i akuur but, man huruw fe n'ámeyi t'ehelo hágila Atambatun kaanuku uni bakan kéejube. 3Arko bare Hirim Heetoofe hu hih'iriwaare húkumbalooleekumbalool, n'aŋ'áami kame ti bakan keeemo ku tu bútowuto bu barebare. 4Bokondu káyilenut, ábuki atambatun eejakut u ite etaam i ámiñamiñ ñúwejet ñooniin ñéeyemi t'ébaani. Áhinahin bondu kaanuku itim káyini kajuku meejaaŋe mite Hirim Heetoofe hu, héewufoore hu kániku kite ku Kiris eeemo u humuum búnokoorum bite Atambatun. 5Úniiit kumuum uni k'if'iriwaareuun, bare Anahaan u Yesu Kiris i if'iriwaareuun. Irijokoorajokooro naane eroka yeenuun iŋ'ite hu Yesu. 6Ábuki Atambatun eeene u: «Meejaaŋe mu mija mijaaŋan t'ébaani i!» o yooŋ áhine fu meejaaŋe moone meejaaŋ ti sihel site s'uni, kaanuku man n'ajaaŋan uni ti kámeyi kite kániku koone kiŋki kisilan tu buhooŋu bite Kiris. 7Bare uni kéeyekie ku ebaj yendu, írimoomi naane simeenaay seerokee n'ekaf, man ésuk i n'ejuk kaanuku sembe sómbombokun sondu t'úniiit tu súnuutina fu, bare t'Atambatun. 8Iŋ'irijuk sílaam sánosan, bare iriwelejeit; iŋ'irijahale, bare sihel site s'uni súbujaariit; 9iŋ'írihihinooree, bare Atambatun awasut uni; iŋ'írifiitenee t'etaam, bare iriyoolutee. 10Sini site s'uni uŋu súwufoor ko kireyi fe buŋ b'eket ite Yesu eje fu ariike, kaanuku man buroŋ boone ni bifeeñ yooŋ ti sini site s'uni. 11Uni bokondu tu buroŋ, bare ko kireyi fe iŋ'íriheelin t'eket i iŋ'ite hu Kiris, kaanuku man buroŋ boone ni bifeeñ yooŋ ti sini site s'uni seeemo su iŋi siket. 12Náami eket i ef'eŋolool uni, bare aruun, buroŋ bu beemo fu t'aruun. 13Míkiñjin mu meenaan: «Íyilenayilen, iŋ'ite ho h'íhamine fu.» Abe makamu káyilen kondu koko k'iribaje fu, uni yooŋ káhamin. 14Múniyo írimoomi kaanuku Atambatun eeritane u Anahaan u Yesu t'eket i, o yooŋ karitan uni, ábuki írihinahin t'afeeneŋ ni Yesu, abe n'aŋ'áhin uni iriisiiŋo kaagoroor ne o, n'aruun yooŋ fe. 15Bimbi bibaj uni fe, uŋu hoonuun hu, kaanuku man meejake mite Atambatun ni mihaŋ kagoru bakan keehooje. Iyu, ésuk i n'eŋ'ehaŋ kahooju ti kaanu Atambatun eyeehen, ni ti kasokoroor koone. 16Iŋ'ite ho h'úñakeit fu hikee ni hiñaawu. Hutoof yooŋ sini site s'úne uŋu súbujo ni diŋgilis, ni diŋgilis, ñúwejet ñite ñ'úne iŋi ñihaŋ káyemi ñíyeni húnakonak. 17Sílaam suns'újuk iye, uf'úliik so ni jáyi jómbokun jéehabanaariit ju j'úja ju kabaju, n'uŋ'úmeyi kaanuku síwiinawiini, abe sífiyaariit yooŋ. Abe sílaam su humuum hite te so iŋi sifare jáyi jondu bija t'úne. 18Ábuki kikaw úne kunooto tu buroon beejukanee bu; kondu ti beejukaneit bu. Beejukanee bu bífiyaariit, bare beejukaneit bu iŋi bifiyo hiraanu.

will be added

X\