2 KORENT 13

1Híhaajiyan h'ija fee bibin t'aruun. Míkiñjin mu meenaan: «Bala an atinanee, bákasuba man yooŋ bákahaaji kawarawar kajabu kaseede kaane kajukojuk.» 2B'ibine bu isok keebine ku kahoofoor ti híbinin húuma húsooboriyan hu, naane inooto i t'aruun fe iisooñ ibatikan isokiin bo, boko ni bakaaku fe: if'ísooñin t'aruun, it'iyubiyen an. 3Eeman árimaŋamaŋi bukuuruun kaanuku Kiris af'áhamin áŋaasann bo tu butumam? Bo kakuuruuun. Kiris anooto an eebajut sembe, bare af'áyemiuun ti kajoŋooran, aŋ'áwufooruun sembe soone. 4Múniyo atibeetib t'ekuruwa ti kabajaate koone kite sembe su, bare ondu tu buroŋ ti sembe site Atambatun. Uni yooŋ írihinahin ne o t'afeeneŋ ti kabajaate kite k'uni kite sembe su, bare uni bokondu tu buroŋ ne o ti sembe site Atambatun, abe ne so n'irija fu karoku t'aruun. 5Arijuker kikawuun jak, ariijuk man aribajabaj káyilen. Eeman árimeyia kaanuku Yesu Kiris ondu t'aruun? Kane arko taŋ aruun ariyinaat káwufoor kaanuku áriyilenayilen. 6Bare eenaan aruun kánandin kaanuku uni íriwufoorawufoor káyilen kite k'uni. 7Uni bokondu ti kalawu Atambatun kaanuku atum'aŋk'árihin doon fe deejakut. Úniiit írimaŋie káwufoor kaanuku burok bite b'uni t'aruun bijakajak, aaa. B'írimaŋie bu kep beemo fu árihin meejake, hutoof yooŋ irijokutee epotor bakate nu múniyo. 8Ábuki iriyinaat kafitu múniyo mite m'Atambatun; b'íriyinie bu beemo fu irirok bija te mo. 9Arko kabajaate kite k'uni kite sembe su iŋi kíkinineŋ n'áriyemi bakan kómbokun, kikaw uni yooŋ uŋu kutoof dómbokun. Náami iŋ'irilaw bija t'aruun kaanuku áriiyemi bakan keekuure but. 10Bonde bíkinineŋe fu n'íkiñjinuun úne káakamboorin kee: ímaŋamaŋi kane ija ibin, n'íŋaabeinuun aruun káawatanoorein, it'iŋk'ija káhaminuun ásufee. Ábuki sembe s'Anahaan u awunam su síteiit kábujuuun, so site káhinuuun ariihaŋ kayanu ti káyilen ku. 11Hahiyu úwasoor kújakuwe! Ariŋes káyemi bakan keekuure but, ariyaŋgananoor kikaw, arijamoor, abe n'arikin ti káasuumaay. Af'árihin iyu, Atambatun éemaŋie u ésuk i, abe n'aŋ'awuniin káasuumaay n'aŋ'áyemi n'aruun. 12Arisaafoor ti káfoonoor kite baatiaay. Bakan k'Atambatun akino ku kareyi fe keeemo ku beebe kasaafuun. 13Anahaan u Yesu Kiris aja ásoniyanuun arireyi fe! Yala Atambatun n'ámaŋiuun yooŋ! Yala Búwejet Beenabe bu ni bíhinuun áriiyemi t'afeeneŋ!

will be added

X\