2 KORENT 12

1Kamaku k'eemo kee te ko kibajut éñjeriŋ, bare iwarawar káwutiyen bike b'Anahaan u áwufooram h'afeeñam hu. 2Ímoomi ake ániine Akarjen, abe abajee simit sumoŋu ni sibaakiir, Atambatun n'ayito bija t'etiir-t'etiir tu bufor bu bíraanna du. (Ímeyiit man Atambatun átumbe fu ayito, man yooŋ bibajabaj an ondu naane ti híyawutu; Atambatun unoono taŋ ámeyie fu.) 3Hee, ímoomi kaanuku ániine ondu ayiteeyit bija arijana. (Eene ímeyiit man Atambatun átumbe fu ayito, man yooŋ bibajabaj an ondu naane ti híyawutu; Atambatun unoono taŋ ámeyie fu.) N'ajam bo báhamin b'an ayinaat kasooñu abatikan asok, abe kawunut húŋgowulan bítim bite kasoku bo. 5Íñje kamaku ániine ondu, bare it'imak hikee tu buroon b'íhine, kane arko taŋ ti béewufoore bu kabajaate kúuma kite sembe su. 6Kane bare ímaŋi yéeni kamaku, báhamin búuma man bíyemi bite esoŋ, ábuki n'aŋ'áami múniyo taŋ m'ija fu kasoku. Bare iŋ'iteñeko jímak ju, ábuki ímaŋiit an abin ajokam ahaŋ t'afiye du ajokam hah'ajuk buroon bimb'íhin, man yooŋ hah'ajamam ti báhamin. 7Bondu b'Atambatun áwufooram bu bihaŋahaŋ káwari. Bare asejanamsejan bike iŋi bíhihinoor eniam dómbombokun kaanuku itim'iyitooro. Ake amalaka ite Setani af'ámiñam ii kaanuku itim'iyitooro. 8Ilawalaw Anahaan u keemo kíhaaji eeeno: «A̱nuutanam sílaam sondu.» 9Bare n'aanam: «Kajaku kiŋk'íwufoori kifamifam, ábuki an af'aja ayak abin áami aŋkut abaj sembe, toko ti sembe súuma t'ifi sihaŋ kafeeñu te o.» Náami íñje kamaku ti béewufoore bu kabajaate kúuma kite sembe su, man sembe site Kiris ni síyemi t'íñje. 10Iŋ'ite ho aamo fu kabajaate kúuma kite sembe su, ni kílafatinu ku, nu kúnuur ku, ni káhihinoor ku, nu wútaañi wu, hikawam uŋu hutoof dómbokun kane bondu fe bibajam iŋ'ite hu Kiris. Ábuki if'ija ayak abin áami iŋkut ibaj sembe, toko ti sembe site Kiris t'ifi síyemi t'íñje. 11Íhamina fu naane an eewene, bare aruun aritiŋgam fu. Aruun ariwaram fu yéeni kámuuru, ábuki hutoof yooŋ inooto doon tus, siñaab soonuun sans'ariene boko kaamo «epotor kómbokun», bokondu kahaŋutam tu doon fe. 12Béewufoore bu kaanuku íñje apotor ite nu múniyo bíhineehin t'aruun ni kámuñu kómbokun. Bo beemo fu bonde: káhinu kite buroon bánoban beehaŋe bu ésuk i kikaw. 13Náami naŋ n'íhine fu neejake ti bakaaku kéeyilene ku n'íhinut t'aruun? Kane arko fu taŋ naane íhinutuun i áriilaam t'íñje. Kame aribaalam katin kúuma kondu! 14Hahiyu iŋk'ifare bibin t'aruun híhaajiyan, abe it'íhin an éelaam t'íñje, ábuki ebaj yéenuuniit y'iŋese fu, bare aruun kumuumuun k'iŋese fu. Múniyo biñi bíiit kaware fu káyeki sifaafiin, bare sifaafiin kawariin fu káyeki. 15Íñje bare ifaraa kasaan doon d'ibaje du fe, bija humuum síhiiniam uŋu hoonuun hu. If'ímaŋiuun esaan ee, bondu fíya buwarawar kákinineŋ n'ariraan kámaŋi kúuma? 16Náami árimoomi kaanuku íhinutuun áriilaam t'íñje. Bare bakaake kaanu ímuusamuus aa, abe iŋ'ibuutuun yooŋ. 17Arijondoman fee ti bakan k'íboñinuun ku. Ake fíya tu boko abuutuunbuut éesik ebaj yeenuun abin asaanam? 18Íwasiyanawasiyan Tit kaanuku eebin t'aruun akina n'ati úne i isokuun u. Tit abuutuunbuut fíya éesikuun dike doon? Árimoomi kaanuku aaa. Kaayinoor kite k'uni kifeeneŋ ku, bija yooŋ máhinar mite m'uni fe. 19Hahiyu tíme ariena man uni írihaminuun atoof iye kaanuku iriiŋes ekooŋ t'aruun, bare me? Aaa kújakuwe, aruun k'írimaŋie-maŋie ku, írihaminuunhamin hágila Atambatun naane eroka bakate Kiris, abe irisokuunsok bonde fe kaanuku man n'arihaŋ kayanu ti káyilen ku. 20Íkolakoleyi n'ija ibin, n'íŋaabeinuun tu buroŋ beetoofutam, aruun yooŋ n'arijamam ti kasokuuun beetoofutuun. Íkolakoleyi bíŋaabeina t'aruun síheñjeŋoor, ni bíhiñanoor, ni kayiŋatoor, ni kabatikanoor, ni bílafatinool, nu búsokoor meejakut, ni biyitooro, ni kajoŋooraate. 21Íkolakoleyi n'ija ibin, Atambatun n'asooñ áhinam iisa t'aruun ñufuñ, iibin iyiy iŋi keehooje keehoofoore abe kawatanooreit keewas kakuuraate ku, nu huŋotu hu ni haare ki kaseñeit, nu bufurukato bu.

will be added

X\