2 KORENT 1

1Íñje Pool eeemo u apotor ite Yesu Kiris naane t'Atambatun ámaŋie du, n'ati úne Timote írikiñjinuun fee aruun bakate ku Korent kéeyilene ku, ni bakaaku fe bakate ku Akayi k'Atambatun akino ku. 2Atambatun Faaf úne, n'Anahaan ite úne Yesu Kiris kaja kásoniyanuun, abe ni kawunuun káasuumaay. 3Úsokoroor Atambatun Faaf ite Anahaan ite úne Yesu Kiris. Akina aamo fu Faaf u aa ayubiyen ésuk i, abe n'áyemi yooŋ Atambatun aa abeetooriin ko kireyi fe! 4Aŋ'abeetoor úne ti sílaam site s'úne sireyi fe, kaanuku man n'úfin úyini kabeetoor yooŋ bakaaku kiŋki káyemi ti sílaam sánosan. Úbeetooriin yooŋ naane akina aa abeetoor úne. 5Múniyo naane uu úmaat iye ti sílaam seehooje site su Kiris, iyu yooŋ i Kiris af'ahaŋ kabeetoor úne. 6Hih'irijuk iye sílaam, kaanuku fu iriibeetooruun, abe n'arifak. Abe h'Atambatun aa abeetoor uni, kaanuku fu man n'iribeetooruun áriiyini yooŋ bújokumooro ti sílaam su naane sonde sins'irijuk iye. 7Abe iribajabaj eyakar yómbokun uŋu hoonuun hu, ábuki írimoomi kaanuku naane aa arimaat iye ti sílaam site s'uni, aruun kabeetooree naane uni. 8Kújakuwe, írimaŋamaŋi árimeyi sílaam s'irijuke su tu búsuk bite Asi. Sílaam sómbombokun, sútumbatumba síriif uni irisooñen n'iŋ'iriene man hite h'uni hihabanaa. 9Irijaja ayak abin áami iŋ'iriene hee káhabaneino kaanuku keeyool uni. Bijaja iyu kaanuku itim iriyakar t'uni kumuum uni. Aaa, t'Atambatun unoono taŋ aa aritan keekete ku t'iriware fu kayakar. 10Akina arame fu uni t'eket yéetaañie naane yendu, abe akina kasooñu aram uni. Te o t'irinaŋe fu eyakar ite uni, yite kaanuku abaa karamu uni. 11Aruun yooŋ kumuumuun aŋ'áriyokunan uni naane aa arilaw bija t'uni. Iyu i bakan keehooje ifi kaane Atambatun eyeehen ti naane aa ájeŋgin kalawu kooniin bija t'uni, abe n'awun uni káasuumaay. 12Iisokuun bimb'irisaŋgoor ne bo: sihel site s'uni súwufoorawufoor uni kaanuku iririikariiko n'ésuk i biriiko beejoŋoore, ni bijak yooŋ, áhaŋum n'aruun. Abe bondu fe t'Atambatun tu búnuutina fu. Káanukiiit tu búwesinato bite húŋgowulan. Aaa, t'Atambatun éewufoore u uni kajaku koone tu búnuutina fu. 13Múniyo bimb'írikiñjinuun ti bileetar bite b'uni, áriyinooni bo kajaŋga, ábuki bítaañiit kánandin. Abe eenaan aruun bibin kánandin bimb'irisok fe, hutoof yooŋ hahiye árinandinaariit bo bireyi. Abe hunak h'Anahaan u Yesu ábatikein hu te ho, aruun kasaŋgoor n'uni naane iriyak i yooŋ kasaŋgoor n'aruun. 15Hikawam hútumbatumba hiyaŋg tu bondu isooñen n'eene yéeni if'íyemi ti bija bija bu Maseduwan, n'iŋ'íŋaasin t'aruun, abe n'ífiitein bo yooŋ íñje ti bíbatikeina. Káhinu iyu, kikawuun n'uŋu kutoof kireeŋ kúsuba, abe n'aŋ'áriyokunanam iiyuun kátuki kúuma inde Súde. 17H'eene hu íñje káhinu bondu, íhaminahamin fíya t'iyinoorut? Bare fíya if'íhabanein eene íñje káhinu bike, iŋ'iyinoor naane bakate ku t'etaam ye, t'áami hahiyu if'eene «hee» n'aŋ'áami kame «aaa»? 18Iisokuun bonde hágila Atambatun eeemo u báhamino bifeeneŋ taŋ: h'irienuun hu «hee», áaaiit éyemie fu ti sihel site s'uni. 19Ábuki Yesu Kiris Añi ite Atambatun i iriwaareuun u, íñje, ni Silas, ni Timote, abinut kaanuku éeyemi o afeeneŋ u «hee» ni «aaa». Ko kireyi fe akina aamo fu «hee» yite Atambatun. 20Ábuki te o t'Atambatun aane fu «hee» tu buroon bu fe b'afiye bu aane o káhinu. Náami tu huruwu hite Yesu Kiris t'uf'úene «amiin» yite i úne kane úyemi ti kasokoroor Atambatun. 21Abe Atambatun humuumo áhine fu úne núuyini kajoku alit tip ti káhinu k'úhine ku t'afeeneŋ ni Kiris, uni n'aruun. Akina ákajine fu úne núuyemi eroka yeene. 22Akina yooŋ áhine fu t'úne éluwenuma yeene yite káwufoor ku kaanuku úne bakan koone, abe n'anaŋ ti sihel site s'úne Búwejet boone Beenabe bu, beekuur úne kaanuku aroŋa kawunu úne eke ebaj. 23Atambatun onda ti kaseedaam, aja ayoolam kane arko haajuus h'isok fee: h'ísooñinoot hu Korent, íñje ímaŋiituun bibin kasoku bike bite káhinuuun áriitaañian. 24Írimaŋiit káyemi eseef yeenuun iŋ'iribin irinoŋkooranuun bike ti káyilen koonuun, ábuki arijokajok te ko alit tip. B'iriŋes bu beemo fu núurok t'afeeneŋ bija ti katoofu koonuun.

will be added

X\