1 TIMOTE 6

1Keeemo ku tu húsukateenaate hu fe kawarawar kajoku kéekiniiin ku naane bakan keewaree kájeŋgin, kaanuku man an atum'abin asok beejakut tu huruwu hite Atambatun, nu tu bumb'úliiken ésuk i. 2Búsukateen bu keeemo ku kéekiniiin ku káyilenayilen ti Kiris, kawarutiin kaheebu, ábuki boko bakatiiin ti bítim bu. Bare kawarawar karoku bija tu boko ahaŋee, ábuki kiŋki káñjeriŋ ii n'ésuwa yeeniin, bokondu bakan kéeyilene, abe kámaŋieemaŋi. Bonde b'a̱waare fu kaliiken ésuk i, abe n'á̱haminiin bo ayanee. 3An af'aliiken ake bike beewayee, abe n'ateñeko kirim kite ku nu múniyo kite k'Anahaan ite úne Yesu Kiris, nu bumb'úliiken ésuk i beeriibe bu nu múniyo m'Atambatun áwufoore mu úne, 4an ondu an eeyitooree, abe ámeyiit doon. Kámaŋi kite sulob su, ni síjeeŋoor su iŋ'ite kirim ku kúmoomi te o naane kásomut. Toko ti bíhiñanoor bu t'ufu búnuutin, ni síñakoor su, ni bílafatinool bu, ni biyinoor beejakut bu ti bakaaku, 5ni síjeeŋoor séehabanaariit su. Kiŋki káhin iyu, ñúwejet ñooniin ñíbaanabaani, abe iŋkut kámeyi yooŋ múniyo mu. Iŋi kaane man káyilen ku t'Atambatun efehe yite bisaanumato. 6Múniyo káyilen ku t'Atambatun ebaj yómbokun tu húŋgowulan, kane arko hikawo hutoofatoof tu doon d'abaje du. 7Úbinut nu doon fe t'etaam ye, abe úyinaat yooŋ bija nu doon fe. 8Náami uf'úbaj doon dite búkuumanooro, nu wañ wute bisiimo, afameefam. 9Bare kéemaŋie ku ebaj yeeniin ehah, Setani abuutiin. Kajokee t'éfiir ite wúfaŋi úkaan weeñunut, abe yooŋ wujakut. Uŋu wúbuj ésuk i, abe yooŋ uŋu wútowutaniin hiraanu. 10Ábuki káfaŋi kite sírirem abuke fu beejakut bánoban. Bakaake kahaŋahaŋ bimero so kasooñen ni kawas káyilen ku, keesejanooro wúseñji weehooje. 11Bare awe eeemo u an ite Atambatun, a̱tey buroon beejakut bondu. A̱ŋes káyemi an éejube, a̱jok t'Atambatun, a̱baj káyilen, á̱maŋi an, á̱muñ, abe n'á̱neeni. 12Á̱tuum étuum yeejake i yey'ebin ni káyilen ku. A̱jok buroŋ béehabanaariit bu, ábuki Atambatun aruwiruw kaanuku a̱abaj bo. Abe a̱binabina á̱hamin atoof aa ti káyilen kúuwe tu buhooŋu bakan keehooje. 13Íñj'endu ti kasokii bonde hágila Atambatun aa awun dóonodoon fe buroŋ, ni Yesu Kiris éehamine u atoof iya ti káyilen koone hágila Poons Pilat: 14á̱hin naane ibine i isoki, abe n'a̱kuur, an yooŋ atum'awatani tu doon bija hunak h'Anahaan ite úne Yesu Kiris ábatikein hu. 15Atambatun káhinio éebatikein hunak h'ajoke hu te ho. Akina abaje fu sembe sánosan. Akina aamo fu Atambatun unoono, Faaf ite meejake mu, Áyi ite bákayi ku, n'Anahaan ite kunahaan ku. 16O taŋ áketaariit fu. Akinakin ti meejaaŋe m'an ayinaat kalohu. An ámusuto kajuku, abe an yooŋ ayinaato kajuku. Aja ákini hiraanu kániku ku, ni sembe su! Amiin. 17A̱ane kusaanum kite t'etaam ye itim kayitooro, itim kanaŋ yooŋ eyakar yeeniin t'ebaj yéefiyaariit. A̱aniin kanaŋ yo t'Atambatun aa awun úne areyi fe ahahan kaanuku núutoofan. 18A̱sokiin a̱aniin iŋi kanoŋk ajakee, abe ni káyemi kusaanum ti kinij keejake; káyemi bakan keewune, abe n'iŋi káruboor buroon booniin ni bakaaku. 19Káhinu iyu, n'iŋi kakuukan ebaj yeejake abe n'eyan bija tu kuwaatu, abe n'iŋi káyini kabaju buroŋ bite bu nu múniyo. 20Óom Timote, a̱jok áwariee doon d'Atambatun ánihani du. A̱tey báhamin beeñunut, beeriibut nu múniyo m'Atambatun áwufoore mu úne. A̱tey síjeeŋoor su tu buroon bite bíhaŋoor búwesinato, abe yooŋ bíteiit nu múniyo. 21Bakaake kaanaan boko kúwesina, abe ni kawas káyilen ku. Atambatun aja ásoniyanuun.

will be added

X\