1 TIMOTE 5

1Atum'aŋ'a̱futanoor ti híhaaniin, bare a̱saaho á̱ahamin ne o naane aa á̱hamin ni faafi. A̱jok yooŋ ehaawa i naane bakatii. 2A̱jok haare hu keehaane ku naane síñaayi, abe búsuŋgute bu, n'a̱jokiin naane bákaniini, n'ehol yeekuure but. 3A̱tofotoor haare hu ki bákayiniin kakete ku, k'á̱meyie ku kaanuku kabajut an. 4Arko bakaake tu boko kákooki biñi, man yooŋ bakañiiin kákooki biñi, bi biñi bu kaware bu kajabu te bo beemo fu katofotoor sifaafiin ni síñaayiin, keefin kéegaliniin naane ii katofotooriin yéeni. Bondu butoofe fu Atambatun. Ti katofotoor kite butoŋ booniin ti kayak fu káwufoor kaanuku káhinahin bi bítim bite Kiris bíkandijene bu. 5Anaare eeemo áyino aketaket abe abajut an ite káyokunano, aŋ'ásik eyakar yeene anaŋ t'Atambatun, abe aŋ'aboo kalawio kaajiŋgan ni káajiim kaanuku man n'áyokunano. 6Bare anaare eeemo áyino aketaket, abe beetoofo bu taŋ b'af'áhin, naane aamo i buroŋ fe, akina an eekete. 7Bondu b'a̱wariin fu kábaŋinan, kaanuku man itim kabin kawatanee tu doon. 8An afut'aŋ'atofotoor ebuke yeene, áhaŋum butoŋ booniin, an ondu awasa káyilen ku, abe an éeyilenut ákoyiokoyi. 9Bala anaare akiñjee ti kaawiit kéeyekie ku kuruwu kite haare hu ki bákayiniin kakete ku bija ti káyokunan kooniin, anaare ondu awarawar kabaju áfiitin ti simit bakan bákahaaji. Awarawar káyemi t'ániine afeeneŋ taŋ t'aseñee fu. 10Awarawar káyemi an éemeyiee tu burok boone beejake bu: an eejoŋoorane bakañio, aŋ'ajok áwariee kiŋki kaja te o, abe yooŋ n'aŋ'añaw wuwot wute kéeyilene ku. Awarawar káyemi an aŋ'áyokunan yéeni keeemo ku ti sílaam su, abe n'aŋ'áhin yooŋ buroon bánoban beejake. 11Keereeŋanoorut ku simit bakan bákahaaji ki bákayiniin kakete ku, atum'a̱kiñj kuruwu kooniin ti kaawiit ku. Ábuki siheliin ufu susooñan ti biseño, n'iŋi káwuŋg Kiris kiñaawu. 12Abe ifi káhin iyu, n'iŋi katin, ábuki kajokut ti hirim hi kajabe hu kasoko. 13Hutoof yooŋ kaseñeit, kuruwu kooniin ifi kikiñjee ti kaawiit ku, it'iŋki karok doon fe. Kabaa buyoosorooro sunuuf su kep, abe iti karaan t'eñeke i. Báhamin beejose taŋ, abe iti káyini kajoku ñutumiin. Bi kakolut bu ne bo, boko kasoku bo. 14Iŋ'ite ho h'ímaŋie fu haare hu keereeŋanoorut ku simit bakan bákahaaji ki bákayiniin kakete ku ni kasooñ kaseño, keebaj biñi, abe ni kajokoor sunuuf sooniin, kaanuku man enatoora yite y'úne itim kabaj húkuuseima keesok t'úne bike. 15Ábuki bakaake ti haare hondu ki bákayiniin kakete ku kaheeka keewas bítim bu keesa Setani ti hiñaawu. 16Anaare éeyilene af'abaj t'ebuke yeene bakaake ki bákayiniin kakete, awariinwar káyokunan. Atum'asejan bondu kéeyilene ku. Af'áhin iyu, kéeyilene ku n'iŋi káyini káyokunan ki bákayiniin kakete ku abe kabajut an. 17Sifaaf ifi kajoŋooran áwariee kéeyilene ku, bajaam booniin buwareewar káwutiyen tu kúsuba, áhaŋum ti kiŋki káñiŋkaan ti kawaare ku, ni kaliiken kite ésuk i. 18Ábuki Míkiñjin mu meenaan: «Atum'a̱kob butum bite húyond heeemo t'eyotok.» Nu musooñ meene: «Aroka awareewar kajaamu.» 19An af'akalame faaf ite kéeyilene, atum'a̱jamatano, kane arko taŋ bákasuba man yooŋ bákahaaji kakalamoo fu. 20Kiŋki káhin wuhoofoor wu, a̱kamoor tu boko tu buhooŋu ésuk i, man bakaaku yooŋ ni kákoleyi. 21Íñj'endu ti káwasiyani bonde hágila Atambatun, ni Yesu Kiris, n'emalaka i keenabe ku: á̱hin bonde b'isoki bee, a̱jok ésuk i fe kare, atum'aŋ'a̱reeŋo yooŋ an. 22Atum'aŋ'a̱moken ti kásitu sumoŋii t'an kaanuku a̱asejano burok ti kéeyilene ku. Atum'a̱yooso tu wuhoofoor wute bakaaku; a̱riiko akuur but. 23Atum'a̱raan tu búhujo bite móhujo mu barebare, aŋ'á̱hujo yooŋ ébiñ diŋgilis iŋ'ite hu hari, naane uu huboo káseñji ku. 24Wuhoofoor wute bakaake wúmeyiee akuur but ti kátumboorut kajoonanee. Bakaaku iŋi kajoonanee ahaban, wooniin wu nu wutik wúmeyiee. 25Burok beejake yooŋ iŋi bímeyiee akuur but. Abe beesoŋkut bu bujukano biyinaatee yooŋ kánuusu hiraanu.

will be added

X\