1 TIMOTE 4

1Búwejet Beenabe bu busokasok bonde bukuur but. Beenaan: tu kunak kiraanu ku, bakaake kawasu káyilen ku. Boko kajoku tu ñúwejet ñuññu ñubuut, ni bi birab bu bimbi biliikeniin. 2Boko kawasu ñatuuk ñu ñeeemo ñu ejuusa ñeebuutiin; ñatuuk ñondu, siheliin siketaket kite so súsufee ni mañ méesufanee miyak milaañ jif. 3Iŋi kaane an awarut kasayi, bike buroon yooŋ buwarutee kateŋu. Bare Atambatun áwuwane fu buroon bondu. Náami kéeyilene ku kéemeyie ku múniyo mu káyinooni kateŋu bo, ti kaanio eyeehen. 4Doon d'Atambatun áwuwane fe dijakajak; doon fe dunooto toko dite káfiiten, saama núusik do ti kaanio eyeehen. 5Ábuki hirim hite Atambatun ni kalawu ku, bondu iŋi bíhin buroon bu beetoof t'Atambatun. 6Af'a̱liiken bondu kéeyilene ku, n'aŋ'á̱yemi aroka eejake ite Yesu Kiris. N'aŋ'á̱wufoor kaanuku kirim kite múniyo m'Atambatun áwufoore mu kúkuumani fu, ni bi kaliikeni bu yooŋ béewoore bu. Bondu fe a̱naŋanaŋ bo ti hikawi. 7Bare a̱teñeko kúsuwanooru keeñunut ku, keeriibut ku nu múniyo m'Atambatun áwufoore mu úne. Á̱ñiŋkaan kep á̱ajeŋgin Atambatun. 8Bímiñooro tu burok ajakajak, bare tu doon diŋgilis. Kájeŋgin Atambatun ajakajak tu doon areyi fe, ábuki eyakar yendu toko yite buroŋ bite hahiye, ni bite bu kóyinokoyin. 9Hirim h'isoki hee héewoore, abe ajakeejak huruw fe n'anaŋ ho ti hikawo. 10Bondu bíkinineŋe fu n'uŋ'úrok, abe n'uŋ'útuum yooŋ, ábuki úsikasik eyakar ite úne únaŋ t'Atambatun eeemo u buroŋ. Akina aamo fu Afakana ite kúŋgowulan ku kareyi fe, áhaŋum kéeyilene ku. 11Á̱hamin ésuk i bondu ayan faŋ, abe n'a̱liikeniin bo yooŋ. 12Atum'a̱was an fe eeheebi aŋarkeyi naane á̱moomi añi. Bare á̱hin man kéeyilene ku ni kaliikool n'awe ti máhaminar múuwe, ti manoŋkar múuwe, ti naane á̱maŋie i an, ti káyilen kúuwe, ni kakuuru kúuwe. 13Á̱ñiŋkaan aŋ'a̱jaŋga Míkiñjin mu tu buhooŋu kéeyilene ku, n'á̱handiniin mo, abe n'a̱liikeniin yooŋ bija kóyin k'ibin ku. 14Atum'a̱wiinen beeemo bu t'awe, bu Búwejet Beenabe bu buwuni bu h'eyiŋana i káhamine hu, abe sifaaf su ni kásit sumoŋiiin t'awe. 15Bondu a̱warawar kanaŋu bo ti hikawi, abe n'a̱jok bo á̱habanein, man ésuk i fe ni kajuk kaanuku aw'ondu ti kahaŋu bija hágila. 16A̱naŋ toko hikawi tu buroŋ búuwe, ni ti bamb'a̱liiken ésuk i. A̱jok tu bondu alitee. Af'á̱hin iyu, n'aŋ'a̱fak, kiŋki kajamatani yooŋ n'iŋi kafak.

will be added

X\