1 TESALONIK 5

1Kújakuwe, bite hunak hu n'ewahatu yu bondu bibaj hu, arisawuleit írikiñjinuun iŋ'ite te bo. 2Ábuki árimoomi akuur but aruun kumuumuun kaanuku hunak h'Anahaan u ábatikein hu te ho, ho káfufu naane ákuw aa áfuf nu huhuk. 3Ésuk i ef'ebin eene: «Káasuumaay kibaja», man yooŋ: «Abebee», toko yooŋ tu búbujo bu bija fu káfufu beebin tu boko. Bo káfufu naane káseñji kite anaare eeemo ti bija bíyihino, abe ésuk i iti kafak bo. 4Kújakuwe, aruun bare arinooto t'ébaani, abe hunak hondu huwarutuun káfufu naane ákuw. 5Múniyo arireyi fe meejaaŋe míkiniuun, kaajiŋgan yooŋ kíkiniuun. Únooto bakan bakate káajiim, man yooŋ bakate t'ébaani. 6Náami utum'úŋot naane bakaaku; bare úniyo, abe n'újok kikaw úne. 7Káajiim n'ésuk i ef'eŋot, káajiim yooŋ n'ésuk i ef'éwusan. 8Bare úne, kaajiŋgan kíkinie fu úne, abe úwarawar kajoku kikaw úne. Úwarawar kasolu káyilen ku ni kámaŋioori ku naane uu úsol ebaŋgal kaanuku eŋ'eram úne. N'úsol yooŋ eyakar ite úne yite kafaku ku naane uu úsol ékuhe yite hitiik. 9Atambatun ajifanut úne kaanuku núubin újuk kayiŋat koone, bare kaanuku eebin eeŋaas t'Anahaan ite úne Yesu Kiris eefakan úne. 10Ábuki Kiris aketaket iŋ'ite h'úne, kaanuku man n'úroŋ ne o kane aja abin, hutoof úne buroŋ, man yooŋ úne káaketin. 11Náami ariyaŋgananoor kikaw, abe n'áriwutiyenoor káyilen naane aa arifiy árihin. 12Kújakuwe, uni bokondu ti kalawuuun bonde: árijeŋgin égila yeenuun kiŋki karok t'aruun, abe ni karimuun, ábuki Anahaan u ajifaniin fu. 13Arijokiin nu sumoŋu súsuba, abe n'árimaŋiiin yooŋ uŋu burok bu bimbi káhin. Síñakoor itim sibaj t'etutuun. 14Kújakuwe, uni bokondu ti kalawuuun yooŋ bonde: árihamin ayanee biñek bu; ariyaŋganan kikaw kiŋki kañako ni hiñaawu; áriyokunan keebajut ku sembe, abe n'aŋ'árimuñ n'ésuk i ereyi fe. 15Áriwasiyoor tu búnukanoor bu; ariŋes ko kireyi fe káhinoor meejake t'etutuun, ni ti bakaaku fe. 16Kikawuun kutoof ko kireyi fe; 17ko kireyi fe arilaw Atambatun; 18doon fe deeyak kabaju, arieno eyeehen. Bo b'ámaŋie fu t'aruun kéehine ku t'afeeneŋ ni Yesu Kiris. 19Atum'aŋ'arifit Búwejet Beenabe bu; 20atum'ariteñeko báhamin bite kiŋki kayiŋan tu huruwu hite Atambatun. 21Bare arijondoman jak tu buroon bu fe: arijok ti beejake bu, 22abe n'ariteñeko rakas doon fe deejakut. 23Atambatun humuumo aa awun káasuumaay ku, áhin áriiyemi bokoone ku árihabanein. Aja ajukaruun yooŋ búwejet bu, yaan i, n'eni i fe, atum'aribin ariwatanee tu doon hunak h'Anahaan ite úne Yesu Kiris ábatikein hu te ho. 24An eeruwuun u, o káhinu bondu, ábuki doon fe d'asoke aŋ'áhin do. 25Kújakuwe, arilaw bija t'uni. 26Arisaaf kéeyilene ku fe ti káfoonoor kite baatiaay. 27Íñj'endu ti kasokuuun bonde tu huruwu hite Anahaan u: arijaŋga bakaaku kéeyilene ku fe eleetar yende. 28Anahaan ite úne Yesu Kiris aja ásoniyanuun.

will be added

X\