1 TESALONIK 4

1Hahiyu kújakuwe, arijamajam t'uni buŋ b'ariware fu káhinu ariitoof Atambatun, abe múniyo bo yooŋ b'af'árihin. Bare uni bokondu ti kalawuuun tu huruwu hite Anahaan u Yesu, abe n'íriwasiyanuun bo yooŋ man n'árihin ahaŋ diyu. 2Ábuki árimoomi báhamin b'irisokuun bu, béenuutina bu t'Anahaan u Yesu. 3Bonde b'Atambatun ámaŋie fu: áriiyemi bakan keenabe. Aamo fu atum'ariŋot ni bakan k'ariseñeit. 4Huruw fe t'aruun awarawar biriiko n'anaar'o biriiko beenabe abe nu bujoŋoor, 5abe atum'awas wúfaŋi weejakut wu weehaŋo sembe, naane kéemeyiit ku Atambatun ii káhin. 6An awarut kahoofoor, man yooŋ n'abuut áwiyo éeyilene naane akina tu buroon bite haare hu. Irisokuunsok ayan faŋ kaanuku Anahaan u kaniju ásuf ti kiŋki káhin wuhoofoor naane wondu. 7Atambatun aruwut úne kaanuku núuyemi bakan keekuurut, bare kaanuku núuyemi bakan keenabe. 8Iŋ'ite ho aamo fu an eeteñekee hirim hondu, húŋgowulaniit h'ateñekee fu, bare Atambatun aa awunuun Búwejet boone Beenabe bu a ateñekee fu. 9Kújakuwe, ti kámaŋioori keeware ku kabaju t'etut bakan kéeyilene, arisawuleit ariikiñjee tu bondu, ábuki Atambatun humuumo áwufooruunwufoor naane ariware i kámaŋioori. 10Iyu yooŋ a arijoke fu kéeyilene ku fe bakate ku Maseduwan ereyi bif. Bare uni bokondu ti káwasiyanuun man n'árihin ahaŋ diyu. 11Áriñiŋkaan ariikin ti káasuumaay, atum'ariyooso ti b'arikolut bu ne bo, abe n'aŋ'arinoŋk áriikuumanooro n'ésuwa yeenuun naane iribine i irisokuun. 12Af'árihin iyu, kéeyilenut ku ti Kiris n'iŋi kasok t'aruun beejake, abe at'árilaaman an fe tu doon. 13Kújakuwe, ti bite keekete ku, írimaŋiituun kawasu t'ébaani, kaanuku atum'áritaañian naane bakaaku keebajut ku eyakar. 14Íriyilenayilen kaanuku Yesu aketaket, abe n'arito t'eket i; iyu yooŋ i íriyilene fu kaanuku Atambatun karitan t'eket i kéeyilene ku ti Yesu kaanuku kéeyemi ne o. 15Bonde b'Anahaan u asoke bu b'irija fu kasokuuun: úne keeja ku káyemi buroŋ kane Anahaan u ábatikein, ut'úgilan keekete ku. 16Hunak hondu, úne kajamu ekaaw yómbokun yite buruw, ni kaaji kite aseef ite emalaka i, ni káabiinu kite Atambatun. N'aŋ'áami Anahaan u Yesu Kiris humuumo n'aŋ'ánuutin t'etiir, éewanein. Kéeyilene ku te o abe ni kaket kaja fu kajabu káritein. 17Ahaban, úne keeyak ku káyemi buroŋ t'ewahatu yendu, úne kayitiee nu boko tu bufor bu, núuja úfimboor n'Anahaan u t'etiir. Iyu, n'uŋ'úyemi n'Anahaan u ko kireyi fe. 18Náami ariyaŋgananoor kikaw ni kirim kondu.

will be added

X\