1 PIYEER 5

1Hahiye sifaaf soonuun k'ijonde fu. Íñje humuumam faaf naane aruun; ijukajuk ni ñíkinam Kiris o ti sílaam su, abe íñje kabaju yooŋ húrub ti kániku keeja ku káwufooree memee. Bonde b'ilaw fu n'aruun: 2arihaaw áwariee kaahaaw k'Atambatun ánihanuun ku. Atum'árihin kite bakan keenoŋkooranee, bare arinoŋk ariijukar ko naane t'Atambatun ámaŋie du. Atum'árihin burok bondu iŋi hiŋes ebaj, bare árihin bo aŋarkeyi naane ho hutoofuun n'áriyokunaniin. 3Atum'ariŋes káhinu sembe ti bakan k'árinihanee ku, bare árihin man kaahaaw ku ni kiŋes kaliikool n'aruun. 4Abe Kiris Aseef ite ehaawa i af'aja áŋaasin, n'aŋ'awunuun hisiibanu héenike, abe utu húbujo hikee. 5Aruun yooŋ biñi bu, árijeŋgin sifaaf su. Abe aruun arireyi fe kéeyilene ku, atum'aŋ'ariyitooro tu búyokunanoor bu, ábuki Míkiñjin mu meenaan: «Atambatun aŋ'ásokum kiŋki kayitooro; kéeyitooraariit ku aŋ'áwufooriin kajaku koone.» 6Náami áritetianooro hágila Atambatun eebaje u sembe, man n'abin ayituun t'etiir hunak h'áfiitene hu. 7Abe n'ariwanan te o bakola boonuun fe, ábuki aŋ'ajokuun áwari aa. 8Arijok kikawuun, abe n'áriwasiyoor! Ábuki anatoora oonuun Setani ondu ti kañaahoor naane éŋaŋ ti kanuuru kep, hiŋes aañ a aware fu kateŋu. 9Arijok alitee ti káyilen ku, abe n'aŋ'aritandarisan te o, ábuki árimoomi kaanuku bakatuuun kéeyilene ku keeemo ku t'etaam i fe, sílaam sondu yooŋ s'ifi kajuk. 10Sílaam soonuun iti sifiyo dómbokun. Atambatun eehaŋe u émaŋia úne, aruwuunruw bite kániku koone kéehabanaariit ku aŋarkeyi naane árihinahin ni Yesu Kiris t'afeeneŋ. O humuumo karitanuun ariisiiŋo, n'ayaŋgananuun yooŋ ti kawunuuun sembe, abe n'asiiŋanuun t'ayane. 11Sembe su síyemi soone su ko kireyi fe! Amiin. 12Silas áyokunanam fu íikiñjinuun eleetar yende yéetofie ee. T'íñje, akina ati ite bifeeneŋ. Ímaŋiuunmaŋi kayaŋganan kikaw, abe n'eenuun yooŋ káasuumaay kite Atambatun naane isokuun ee i keemo fu. Arijok te ko alitee. 13Kéeyilene ku keeemo ku Babilon kasaafuun. Atambatun ajifaniin fu naane aruun. Añiam Mark asaafuun yooŋ. 14Arisaafoor ti káfoonoor kite baatiaay. Aribaj káasuumaay arireyi fe, aruun ki Yesu Kiris akino ku.

will be added

X\