1 PIYEER 4

1Makamu Kiris ajukajuk sílaam t'enio, ariwarawar yooŋ bifare kajuku sílaam naane akina, ábuki an af'ajuk sílaam t'enio, awasoora ni kaahoofoor. 2Náami áfiitin ti hahiye, tu kunak keeŋeñenuun ku t'etaam ye, buroŋ boonuun buwarawar káyemi naane t'Atambatun ámaŋie du bo, abe n'ariwas wúfaŋi wute kúŋgowulan ku. 3Múniyo kóŋkeyin arifiyafiyo aa ti káhinu kite buroon bi kéeyilenut ku bimbi kámaŋi káhinu. Árikinaanakinaani tu huŋotu hu ni bakan k'ariseñeit ku, nu wúfaŋi weejakut wu, n'éwusan i, ni kahahan ku tu buñoofo nu tu búhujo bu, nu wuwaasen wute ñájiim ñu, abe bonde búfuñinanafuñinani. 4Abe hahiyu naane aŋkut i árihin buroon beejakut bu ni kéeyilenut ku, kajahalaa, abe bokondu ti kálafatinuun. 5Bare boko bibin kakamu Atambatun bi káhine bu fe. Akina afaraa kajoonan keeroŋe ku ni keekete ku. 6Iŋ'ite ho i Hirim Heetoofe hu husokee fu yooŋ keekete ku. Kajoonaneejoonan uŋu buroon bi káhine bu t'etaam ye boko buroŋ, bare hahiye Búwejet Beenabe bu nu búyokunaniin kaanuku man ni káyini karoŋu naane Atambatun. 7Kamoosen kite etaam i kulohena. Náami buroŋ boonuun buwarawar kajoŋoor, abe n'arijok kikawuun man n'áriyini kalawu. 8Beehaŋe bu fe beemo fu árimaŋioori dómbokun, ábuki kámaŋioori aŋ'ahok wuhoofoor weehooje. 9Ariwananoor atoofee tu sunuuf soonuun, atum'aŋ'arifutanoor. 10Atambatun awunuunwun arireyi fe bifehe bite káyokunan bakaaku, huruw fe aliik ti b'Atambatun awuno bu. Áriyemi naane eroka keejake keeemo ti káhinu bakaaku meejake mite m'Atambatun meewayoore mu. 11An eeemo ti kawaare awarawar kasoku kirim kite Atambatun. An eeemo ti káyokunan ake awarawar káhabanna sembe s'Atambatun awuno su, kaanuku man tu buroon bu fe Atambatun n'asokorooree iŋ'ite hu Yesu Kiris. Kániku ku kíyemi koone ku hiraanu, ni sembe su fe! Amiin. 12Kújakuwe, aruun k'ímaŋie-maŋie ku, atum'arijahale naane ariemo i ti sílaam sómbokun. Bondu bibajuunbaj kaanuku t'ajuk man múniyo áriyilenayilen t'Atambatun man yooŋ. Atum'ariyinoor n'ariene bondu buwarut kabaju. 13Kikawuun kutoof kep aŋarkeyi naane aŋ'arimaat ti sílaam site Kiris, man hunak h'ésuk i eja hu kajuku kániku koone, n'aritoofan árihabanein. 14Atoof t'aruun kane árilafatinee aŋarkeyi naane aruun eriboora yite Kiris, ábuki Búwejet béenike bu bite b'Atambatun bondu t'aruun. 15An t'aruun af'ajuk sílaam, atum'áyemi am ayoole, man yooŋ am ákuwate, man yooŋ am áhine beejakut, man yooŋ am ayoosee ti báhamin bite ake. 16Bare an af'ajuk sílaam aŋarkeyi naane akina Akarjen, atum'afuño. Aaa, aane kep Atambatun eyeehen naane ésuk i ii kaano akina an ite Kiris. 17Hunak hite Kajoonan ku hireeŋa, abe t'ajab ti bakan kite Atambatun. Abe arko keejab t'úne, buŋ fíya bi bija fu búmuje ni keeteñekee ku káyilen Hirim Heetoofe hite h'Atambatun? 18Naane Míkiñjin mu musoke i meene: «Arko kafaku kite kéejube ku kítaañataañi, buŋ fíya bi bija fu káyemi t'énafuta i n'ehoofoora i?» 19Iŋ'ite ho aamo fu keeemo ku ti kajuku sílaam aŋarkeyi naane Atambatun ámaŋie bo, káhin beejake bu kep, abe ni kayit eyakar yeeniin fe kanaŋ te o éewuwaniin u, ábuki áwasaariit hirim h'asoke.

will be added

X\