1 PIYEER 3

1Aruun yooŋ haare hu árijeŋgin bákayinuun. Af'árihin ii, bakaake tu boko, hutoof yooŋ káyilenut hirim hite Atambatun, ifi kajuk tu kunoŋk koonuun, n'iŋi káyilen. Abe bondu fe t'arisokutiin hirim, 2ábuki boko kajuku buŋ bu buroŋ boonuun bukuure fu, nu buŋ b'árijeŋginiin fu. 3Káwari koonuun kuwarut káyemi kite tíyaŋ, naane birifaañu bite jísaŋg, man yooŋ jísaŋg jite ni kikaŋk ku, ajok bimeŋk bite éwurus i, ni bisiimo bite wañ weeseere wu. 4Aaa, kuwarawar káyemi t'éhinda suhol soonuun, kite búwejet béeneenie abe ni bibeb. Káwari kondu kúbujaariit, abe kibajabaj t'Atambatun éñjeriŋ yómbokun. 5Iyu i haare hu bakate ku kóŋkeyin kéeyilene ku, abe ni kayakar t'Atambatun ifi káwarianooro, ábuki kájeŋginajeŋgin bákayiniin. 6Iyu i Saara af'áhinaani; ájeŋginajeŋgin Aburaham, abe kaanuku eeruwo, n'aŋ'aano «Anahaan úuma». Af'árihin meejake, abe afut'árikoleyi yooŋ doon fe, n'aŋ'áami hahiyu áriyemia naane akina. 7Aruun yooŋ háyine hu, arijokoor haare hoonuun áwariee, abe n'áribaŋino kaanuku arireyit nu boko sembe. Arijokiin nu sumoŋu súsuba, ábuki kawarawar kabaju buroŋ béehabanaariit bu b'Atambatun ayak bu kawunu naane aruun. Af'árihin ii, doon utu dukolen kalawu koonuun. 8Hirim húuma hiraanu hu honde: aribaj biyinoor bifeeneŋ, abe n'arijamoor yooŋ. Árimaŋioori naane bakati; áriyemi bakan kéeneenie, abe atum'ariyitooro hágila bakanuun kúŋgowulan. 9An af'áhinuun beejakut, atum'arinukan; an af'álafatinuun, atum'arinukan yooŋ. Aruun árisoniyano kep, ábuki uŋu bondu h'Atambatun aruwuun fu, kaanuku eebin éesoniyanuun. 10Bonde busokee fu ti Míkiñjin mu. Meenaan: «An af'ámaŋi kabaju buroŋ beejake, abe n'ajuk yooŋ kunak keetoofe, awarawar kawasu husoku ti bakan, ni haajuus. 11Awarawar kakamboor ni meejakut mu aŋ'áhin meejake mu, abe n'aŋ'áñiŋkaan eeŋes káasuumaay ku. 12Ábuki Atambatun aŋ'ajukar kéejube ku, aŋ'ajamatan yooŋ kalawu kooniin; bare aŋ'ásokum kiŋki káhin meejakut mu.» 13Af'árihabanein ti siheluun kaanuku áriihin meejake, aañ aja fu káhinuuun meejakut? 14Hutoof yooŋ ariwarawar kajuku sílaam aŋarkeyi naane aŋ'árihin meejake, kikawuun n'uŋu kutoof. Atum'árikoleyi an, abe atum'ariwas an eehohotanuun. 15Bare arijok Kiris tu suhol soonuun naane Anahaan oonuun. Arifare ko kireyi fe kásafin an fe eeyakuun kákandijen iŋ'ite eyakar yeeemo i t'aruun. 16Abe n'aribeben tíŋ, abe n'arisaaho yooŋ ti kásafin kooniin. Ñúwejet ñoonuun ñukuur but, kaanuku man bakan ifi kajuus kasaanuun, man yooŋ ni kasok bike tu buroŋ boonuun ni Kiris beejake bu, ni kafuño. 17Ábuki t'Atambatun ámaŋie, ahaŋ kajaku an n'ajuk sílaam o ti káhinu meejake, bala ajuk so o ti káhinu meejakut. 18Múniyo Kiris humuumo aketaket hifeeneŋ, abe hiraanu, bija tu wuhoofoor wute kúŋgowulan ku. Akina eeemo u an eejake n'aket bija t'énafuta, kaanuku éehinuun ariibukan n'Atambatun. Enio yi kayoole fu, bare n'ábatikannee buroŋ tu Búwejet Beenabe bu. 19Tu Búwejet bondu t'aje fu eewaare ñúwejet ñite keekete ku keeemo ku t'ekulu i. 20Keekete ku bokondu kaamo fu bakate ku kóŋkeyin kéejeŋginut ku Atambatun o ti kanahan kooniin ni kámuñu, kóyin ki Nowe áyemie ku tu burok bite esahar i. Bakan keefamut, kaamo hutok ni bákahaaji barebare ni kayooso t'esahar i, abe ni kafakanee tu móhujo mu. 21Móhujo mondu múmoomi naane kaboste ku kiŋki kifakanuun hahiye. Kaboste kondu, káanukiiit kite kañawu ñubub ñite eni. Aaa, ko kite kájeŋgin Atambatun nu búwejet beekuure. Kaboste ku iŋi kifakan úne aŋarkeyi naane Yesu Kiris aritaneeritan t'eket i. 22Ajaja t'etiir bufor bu, abe ondu t'ariikee inde baatos Atambatun. Emalaka i iŋi kajam te o, n'ébuur i, ni baabu buroon fe beebaje bu sembe beeemo bu t'etiir bufor bu.

will be added

X\