1 SAAŊ 5

1An fe éeyilene kaanuku Yesu aamo fu Kiris, akina añi Atambatun, abe an fe éemaŋie Faaf u, aŋ'ámaŋi yooŋ bakañio. 2Uf'úmaŋi Atambatun, abe n'úhin yooŋ naane buluwa boone busoke i, n'uŋu bukuur úne kaanuku úmaŋamaŋi bakañio. 3Kámaŋi Atambatun aamo fu kájeŋgin buluwa boone. Abe buluwa boone biniŋut, 4ábuki añi fe ite Atambatun áyinooni kaheeku buroon beejakut bite bu t'etaam i. Ti káyilen kite k'úne t'uf'úheek buroon bondu. 5Aañ ayino fu kaheeku bo? Kane arko fu taŋ an éeyilene u kaanuku Yesu aamo fu Añi ite Atambatun. 6Yesu Kiris aamo fu an éeŋaasina u t'etaam i: n'ayooso tu móhujo ti kaboste koone, n'áyuus yooŋ halan hoone ti kaketu ku. Tu móhujoiit barebare t'áŋaasina fu, bare áŋaasinoŋaasin tu móhujo, ni ti halan yooŋ. Abe Búwejet Beenabe bu iŋi biseede kaanuku bondu bite nu múniyo, ábuki Búwejet bu beemo fu múniyo mu. 7Eseede bákahaaji kabaje fu: 8Búwejet Beenabe bu, móhujo mu, ni halan hu, abe t'éhaajiiin fe kajokajok ti bifeeneŋ. 9Kúŋgowulan ku iŋi kaseede bike, n'uŋ'úyileniin; b'Atambatun bamb'aseede bihaŋahaŋ bo bireyi fe, bo beemo fu b'aseede bu t'Añio. 10Náami an éeyilene u t'Añi ite Atambatun anaŋa t'eholo kaseede konde. Bare an éeyilenut u t'Atambatun ajokojok ajuusa, ábuki áyilenut b'Atambatun aseede bu t'Añio. 11Bonde b'Atambatun aseede fu: awunawun úne buroŋ béehabanaariit bu, abe buroŋ bondu bondu t'Añio. 12An éehine u t'afeeneŋ n'Añi u abaja buroŋ bu, bare an éehinut u t'afeeneŋ n'Añi ite Atambatun abajut buroŋ bu. 13Ikiñjakiñj bonde fe bija t'aruun kéeyilene ku tu huruwu hite Añi ite Atambatun, man n'áriyilen kaanuku aribaja buroŋ béehabanaariit bu. 14Bonde bíkinineŋe fu kikaw úne ni kiyaŋg t'Atambatun: úmoomi kaanuku uf'úlawo dike doon deeriibe ni kámaŋi koone, o kajamatan úne. 15Abe makamu úmoomi kaanuku aŋ'ajamatan úne kane úlawo dike doon, úmeyi yooŋ kaanuku aŋ'awun úne doon d'úlawo. 16An af'ajuk at'o ti káhinu kaahoofoor k'ámeyie kaanuku keejarut eket, awarawar kalawu, abe Atambatun n'aŋ'awun at'o ondu buroŋ bu. Keeemo ku wuhoofoor wooniin wujarut eket k'isoke fu barebare. Bare abajeebaj kaahoofoor keejare eket, abe eenut ariwarawar kalawu bija t'an éehine kaahoofoor naane kondu. 17Hinij heejakut fe kaahoofoor, bare abajeebaj wuhoofoor weejarut eket. 18Úmoomi kaanuku añi fe ite Atambatun aŋ'araan kahoofoor, ábuki Añi ite Atambatun aŋ'ajukaro, abe Batuuk bu biyinaat te o doon. 19Úmoomi kaanuku Atambatun akino fu úne, bare etaam i ereyi fe yendu ti sembe site Batuuk bu. 20Úmoomi kaanuku Añi ite Atambatun abinabin, abe n'awun úne búwesinato kaanuku núumeyi Atambatun ite u nu múniyo. T'Añio Yesu Kiris t'úhine fu t'afeeneŋ n'Atambatun ite u nu múniyo. Añi u aamo fu Atambatun ite u nu múniyo, akina aamo fu yooŋ buroŋ béehabanaariit bu. 21Kúñuumo, aritey ñájiim ñu!

will be added

X\