1 SAAŊ 4

1Kújakuwe, aruun k'ímaŋie-maŋie ku, atum'áriyilen ésuk i fe kiŋki kaane Búwejet Beenabe bu bondu tu boko. Ariŋesiin kep ariijuk man búwejet bi kabaje bu, t'Atambatun tu búnuutina. Isokuunsok bonde ábuki kiŋki kajuus kaane boko kaamo eyiŋana yite Atambatun bokondu t'etaam i, abe kahoojahooj. 2Iye a arija fu kámeyi man ake abajabaj Búwejet bite Atambatun man yooŋ: an fe eeene múniyo Yesu Kiris abinabin éeyemi húŋgowulan, an ondu abajabaj Búwejet béenuutina bu t'Atambatun. 3Bare an fe eeteñekee bondu, an ondu abajut Búwejet béenuutina bu t'Atambatun. Búwejet b'abaje bu bite Anatoora ite Kiris, a arijame u kaanuku awarawar bibin, abe hahiyu aheeka éereeŋin t'etaam ye. 4Kúñuumo, aruun bare bakan bakate Atambatun, abe arikalakalo kiŋki kajuus kaane boko kaamo eyiŋana yite Atambatun. Ábuki Búwejet beeemo bu t'aruun bihaŋahaŋ sembe beeemo bu ti bakate ku t'etaam ye. 5Boko bakan bakate t'etaam ye. Iŋ'ite ho h'ifi káhamin naane bakate ku t'etaam ye, abe bakate ku t'etaam ye iŋi kajamataniin. 6Úne bare bakan bakate Atambatun. An éemeyie Atambatun aŋ'ajamatan úne; bare an eenooto ite Atambatun ájamatanaariit úne. Iyu u úyino fu kakeetan Búwejet bite múniyo mu, nu búwejet bite haajuus hu. 7Kújakuwe, aruun k'ímaŋie-maŋie ku, árimaŋioori, ábuki kámaŋi ku, t'Atambatun tu kúnuutina fu. An af'ámaŋi ésuk i, an ondu añi ite Atambatun, abe ámoomi Atambatun. 8An eefinut ámaŋi ésuk i, an ondu ámeyiit Atambatun, ábuki Atambatun ámaŋamaŋi ésuk i. 9Iye a Atambatun áwufoore fu naane ámaŋie i úne: áboñinoboñin Añio afeeneŋ u t'etaam ye, kaanuku núubaj te o buroŋ bu. 10Iye i kámaŋi aamo fu: káanukiiit man úne úmaŋie Atambatun, bare akina ámaŋie fu úne. N'áboñin Añio kaanuku man wuhoofoor wute w'úne nu wuboŋketee iŋ'ite kaasarah koone. 11Kújakuwe, aruun k'ímaŋie-maŋie ku, makamu iyu a Atambatun ámaŋie fu úne, úne yooŋ úwarawar kámaŋioori. 12An ámusut kajuku Atambatun; bare uf'úmaŋioori, Atambatun n'aŋ'áhin n'úne t'afeeneŋ, abe kámaŋi k'ámaŋie ku úne kiyanayan faŋ. 13Iye u úmeyie fu kaanuku úhinahin t'afeeneŋ n'Atambatun, abe akina yooŋ n'áhin n'úne t'afeeneŋ: awunawun úne Búwejet boone. 14Irijukajuk ni ñíkin uni, abe n'iriseede kaanuku Faaf u áboñinoboñin Añio eebin éeyemi Afakana ite kúŋgowulan ku. 15An af'asok aane Yesu aamo fu Añi ite Atambatun, Atambatun káhinu ne o t'afeeneŋ, akina yooŋ n'áhin t'afeeneŋ n'Atambatun. 16Uni írimoomi kámaŋi k'Atambatun ámaŋie ku úne, abe íriyilenayilen ko. Atambatun ámaŋamaŋi ésuk i. An éemaŋie bakan, áhinahin t'afeeneŋ n'Atambatun, abe Atambatun áhina ne o t'afeeneŋ. 17Arko kámaŋi keeemo ku t'úne kiyanayan, kikaw úne kayaŋgu piŋ hunak h'Atambatun aja hu kajoonan te ho, ábuki manoŋkar mite m'úne t'etaam ye múmoomi naane mite mu Yesu Kiris. 18Kámaŋi ariboorut n'ekoloowe. Ábuki kámaŋi keeyane aŋ'anuutan ekoloowe. Ekoloowe, at'o kúnuur. Náami an af'aŋ'ákoleyi, kámaŋi kite Atambatun kiyanut te o. 19Atambatun ajabe fu ámaŋi úne. Iŋ'ite ho h'úmaŋio fu, akina nu kúŋgowulan ku fe. 20An af'ahuuf at'o, abe bare n'aane ámaŋamaŋi Atambatun, akina ajuusa. Múniyo afut'ámaŋi at'o aa ajuk, ayinaat kámaŋi Atambatun a ájukaariit u. 21Náami eluwa yende yi Kiris asaane i úne: an éemaŋie Atambatun awarawar yooŋ kámaŋi at'o.

will be added

X\