1 SAAŊ 3

1Arijuk naane Faaf u ámaŋie i úne ariike, asooñen n'aŋ'aane úne bakañio! Abe nu múniyo, úne bakañio. Bakate ku t'etaam ye kámeyiit Faaf u; bo bíkinineŋe fu kámeyiit úne yooŋ. 2Kújakuwe, aruun k'ímaŋie-maŋie ku, hahiyu úne biñi bite Atambatun, bare naane úja i kanokoor búwuforoorutee. Bare úmoomi kaanuku Kiris af'abin ásooñin, úne káyemi naane akina, ábuki úne kajukio naane aamo i. 3An fe eebaje eyakar yendu ti Kiris bukuuranooro naane Yesu Kiris akuure i. 4An fe éehine kaahoofoor atina t'Eluwa yite Atambatun, ábuki kaahoofoor aamo fu katinu t'Eluwa i. 5Árimoomi bare kaanuku Yesu Kiris abinabin iŋi kanuutan wuhoofoor wute w'úne. Akina abajut mayet kaahoofoor. 6Náami an fe éehine ne o t'afeeneŋ araana kahoofoor; bare an fe aŋ'ahoofoor, ajukuto, abe ámeyiito yooŋ. 7Kúñuumo, atum'ariwas an fe eebuutuun! An aŋ'áhin béejube, ájubajub naane Yesu Kiris ájube i. 8An eekine ti kaahoofoor, akina an ite Setani, ábuki Setani ahoofoorahoofoor huta hu ti kájabina ku. Bonde bíkinineŋe fu Añi ite Atambatun n'abin: kaanuku éebuj burok bite Setani. 9An fe eeemo añi ite Atambatun araana kahoofoor, ábuki buroŋ béenuutina bu t'Atambatun bondu te o. At'aŋk'áyini kakinu ti kaahoofoor, ábuki akina añi ite Atambatun. 10Tu bonde ti biñi bite Atambatun kawayee fu ni biñi bite Setani: an fe éehinaariit beejake, man yooŋ éemaŋiit at'o, an ondu anooto añi ite Atambatun. 11Múniyo, hirim honde h'arijame fu huta hu ti kájabina ku: úmaŋioori. 12Úwarut káyemi naane Kayin eeyoole u at'o. Akina an ite Setani. Kame iŋi naŋ n'ayoolo fu? Aŋarkeyi naane buroon bamb'áhin bijakut, abe bare bite b'at'o bijakajak. 13Kújakuwe, atum'arijahale naane bakate ku t'etaam ye kahuufuun i. 14Úne úmoomi kaanuku únuutino t'eket i núuyooso tu buroŋ bu. Úmoomi bo aŋarkeyi naane úmaŋamaŋi bakati úne. An éemaŋiit at'o, an ondu aroŋa t'eket i. 15An fe eehuufe at'o, an ondu ayoola bakan. Abe árimoomi kaanuku ayoola bakan abajut te o buroŋ béehabanaariit bu. 16Iye u úmeyie fu naŋ neemo fu kámaŋi: Yesu Kiris ásikasik síhiinio asaan bija t'úne. Náami úne yooŋ úwarawar kásiku síhiinu úne úsaan bija ti bakati úne. 17An eebaje af'ajuk at'o n'ahaŋk, abe n'ateñeko káyokunano, buŋ b'ayino fu kaanu ámaŋamaŋi Atambatun t'eholo? 18Kúñuumo, úwarut kámaŋioori ni kirim keetoofe barebare; úwarawar kámaŋioori nu múniyo tu buroon bumb'úhin. 19Uf'úmaŋioori, n'uŋ'úmeyi kaanuku múniyo mu mikino fu úne; iyu, n'uŋ'úrooŋan sihel site s'úne hágila Atambatun. 20Hutoof sihel site s'úne ni siwatan úne, sibaa bare burooŋo, ábuki Atambatun ahaŋahaŋ so, abe ámoomi doon areyi fe. 21Náami kújakuwe, aruun k'ímaŋie-maŋie ku, sihel site s'úne ifit siwatan úne, kikaw úne n'iŋi kiyaŋg t'Atambatun. 22Aŋ'awun úne doon fe d'úlawo, ábuki uŋ'újeŋgin suluwa soone, abe beetoofo bu b'uf'úhin. 23Eluwa yende y'asaane i úne: aane úyilen tu huruwu hite Añio Yesu Kiris, abe yooŋ n'úmaŋioori naane asoke i úne. 24An éejeŋgine suluwa site Atambatun, an ondu áhina t'afeeneŋ n'Atambatun, Atambatun yooŋ áhina ne o t'afeeneŋ. Abe úmoomi kaanuku Atambatun áhinahin n'úne t'afeeneŋ, ábuki awunawun úne Búwejet boone.

will be added

X\