1 SAAŊ 2

1Kúñuumo, íñj'endu ti kákiñjinuun bonde kaanuku atum'aŋ'arihoofoor. Bare ake af'áhin kaahoofoor, úbajabaj an aa areeŋo úne t'Atambatun: o aamo fu Yesu Kiris éejube u. 2Akina awune fu enio yeesarahee kaanuku man wuhoofoor wute w'úne nu wuboŋketee. Káanukiiit wute w'úne barebare, bare bija yooŋ nu wute bakaaku kúŋgowulan fe. 3Uf'újeŋgin buluwa bite Atambatun, bukuur úne kaanuku úmoomio. 4An af'aane ámoomio, abe bare ájeŋginut buluwa boone, akina ajuusa, abe múniyo mu munooto te o. 5An bare éejeŋgine hirim hoone, kámaŋi k'ámaŋie ku Atambatun keeyane faŋ. Iye u úyinie fu kámeyi man úhinahin t'afeeneŋ n'Atambatun. 6An af'asok aane áhinahin t'afeeneŋ n'Atambatun, awarawar kanaban tu wuwot wute Yesu. 7Kújakuwe, aruun k'ímaŋie-maŋie ku, eluwa éyeniiit y'ikiñjuun fee. Eluwa yeefiyee, y'arisaanee huta hu ti kájabina ku. Eluwa yendu yeefiyee i yeemo fu hirim h'arijame hu. 8Bare eluwa yende y'ikiñjuun yee éyeni yooŋ. Múniyo mite te yo mujukeejuk ti Kiris, ni t'aruun yooŋ, ábuki ébaani yendu ti bija bútowuto, abe meejaaŋe mite mu nu múniyo miheeka méeŋaasin. 9An af'aane ondu ti meejaaŋe mu, abe bare n'ahuuf at'o, an ondu aroŋa t'ébaani i. 10An af'ámaŋi at'o, an ondu ondu ti meejaaŋe mu, abe doon fe diyinaato káhinu eeney ti kaahoofoor. 11Bare an eehuufe at'o, an ondu ondu t'ébaani i; aŋ'añaah t'ébaani i, abe ámeyiaariit diin t'aamo fu ti bija bu, ábuki ébaani i ébujobuj ñíkin. 12Kúñuumo, iikiñjuun bonde: wuhoofoor woonuun wuboŋketeeboŋket, Kiris éekinineŋ. 13Aruun sifaaf su, iikiñjuun bonde: árimoomi an éeyemie u huta hu ti kájabina ku. Aruun biñi bu, iikiñjuun bonde: arikalakalo Batuuk bu. 14Kúñuumo, isooñ ikiñjuun bonde: árimoomi Faaf u. Aruun sifaaf su, isooñ ikiñjuun bonde: árimoomi an éeyemie u huta hu ti kájabina ku. Aruun biñi bu, isooñ ikiñjuun bonde: aribajabaj sembe; hirim hite Atambatun hondu t'aruun, abe yooŋ arikalaa Batuuk bu. 15Atum'árimaŋi etaam i, nu buroon beeemo bu te yo fe. An af'ámaŋi etaam i, an ondu ámaŋiit Faaf u. 16Ábuki buroon bite t'etaam i búmoomi naane bonde: wúfaŋi weejakut wu wute kúŋgowulan ku, bimero bite doon fe deejukee, ni biyitooro bu iŋi ebaj i. Bondu fe t'Átambatuniit t'ufu búnuutin, bare t'etaam i. 17Etaam i yendu ti bija bihabano, nu wúfaŋi wu fe weeemo wu te yo. Bare an eeemo aŋ'áhin b'Atambatun ámaŋie bu, o karoŋu hiraanu. 18Kúñuumo, kamoosen kite etaam i kulohena! Arijamajam kaanuku Anatoora ite Kiris awarawar bibin. Abe hahiye enatoora yite Kiris keehooje kabina; iŋ'ite ho h'úmeyie fu kaanuku kamoosen kite etaam i kulohena. 19Bokondu bakan úneiit nu múniyo, iŋ'ite ho hi kanuute fu t'úne. Múniyo kane káyemi bakan úne, n'iŋi kariiko yéeni n'úne. Bare iyu i bije fu t'ahaŋ kakuuru kaanuku mayet afeeneŋ tu boko aamo n'úne. 20Aruun bare, aribajabaj Búwejet Beenabe bu bi Kiris awunuun bu, abe iyu a árimeyie fu arireyi fe múniyo mu. 21Náami if'íkiñjinuun, iŋi káanukiiit man aruun árimeyiit múniyo mu, bare aŋarkeyi naane árimoomi mo. Abe árimoomi yooŋ kaanuku haajuus hiyinaat kánuutina tu múniyo mu. 22Kame aañ aamo fu ajuusa u? O aamo fu an eejeeŋe u kaanuku Yesu aamo fu Kiris. An ondu aamo fu Anatoora ite Kiris, abe ateñekateñeko Faaf u n'Añi u. 23Abe an eeteñekee Añi u, ámeyiit yooŋ Faaf u. An éesiiŋooreina n'Añi u, ámoomi yooŋ Faaf u. 24Iŋ'ite ho aamo fu áriwasiyoor ariinaŋ ti siheluun hirim h'arijame hu huta hu ti kájabina ku. Arko b'arijame bu huta hu ti kájabina ku bondu ti siheluun, aruun yooŋ káyemi t'afeeneŋ n'Añi u ni Faaf u. 25Abe bonde bi Kiris aane fu o kawunu úne: buroŋ béehabanaariit bu. 26Ikiñjuunkiñj bondu iŋi bakan keeŋes ku kabuutuuun. 27Aruun bare, Kiris awunuunwun Búwejet boone. Makamu Búwejet boone bondu t'aruun, arisawuleit an aliikenuun. Ábuki Búwejet bu iŋi biliikenuun doon areyi fe, abe doon dindi biliikenuun dite toko, díteiit haajuus. Iŋ'ite ho aamo fu arijok alitee ti káhinu k'árihine ku t'afeeneŋ ni Kiris naane Búwejet bu biliikenuun i. 28Hee kúñuumo, arijok alitee ti káhinu k'árihine ku t'afeeneŋ ni Kiris, man hunak h'abin hu ifi hireeŋ, kikaw úne ni kiyaŋg piŋ; utum'úbin úfuño hágilao hunak hondu. 29Árimoomi kaanuku Kiris ájubajub. Náami ariwarawar yooŋ kámeyi kaanuku an fe aŋ'áhin beejoŋoore, akina añi ite Atambatun.

will be added

X\