1 KORENT 9

1Abajeebaj fíya doon déekiniam? Íñje ápotoriit? Ijukut Yesu Anahaan ite úne? Íñjeiit kereŋ ibine fu n'aruun ti bítim bite Anahaan u? 2Arko bakaake kateñekamteñeko kajoku naane apotor, t'aruun bare íñje apotor. Ábuki naane árihine i t'afeeneŋ ni Kiris húwufoorawufoor kaanuku nu múniyo íñje apotor. 3Iye if'ísafin kiŋki katinanam: 4iwarut fíya kabaju doon dite buñoofo nu doon dite búhujo bija tu burok bimb'íhin t'aruun? 5Iyinaat fíya kabaju anaare éeyilene iŋ'ibin iriboor ne o tu wútuki wu naane bakaaku epotor ii káhin, ni bakati kite Anahaan u, ni Piyeer? 6Bare me íñje ni Barnabas suwan uni taŋ iriware fu kásuwat íriikuumanooro? 7Árimusa kajamu ni kaane asulaan ajaja saruwis, abe n'aŋ'anoŋk eejaamooro? Árimusa kajamu ni kaane ake áhinahin etool, abe awarut kariyu ti miriyaay mu? Man yooŋ ake buroko jíhaaw, abe awarut kásiku míis mite sunuk su? 8Káanukiiit tu bu kúŋgowulan ku kanoŋke bu keesiiŋan barebare t'iliike fu b'isoke bee. Ábuki Eluwa yite Moyis bo yooŋ b'esoke fu. 9Múniyo Míkiñjin mu meenaan: «Atum'a̱kob butum bite húyond heeemo t'eyotok.» Atambatun ásikasik fíya ehelo anaŋ tu kúyond ku? 10Aaa, iŋ'ite h'úne h'asoke fii. Bondu bikiñjeekiñj ábuki an eeemo tu buwañ awarawar kayakar kabaju húrub hoone, naane yooŋ an eeemo t'eyotok. 11Irinawanaw t'aruun hirim hite Atambatun; náami if'írihotukan t'ebaj yeenuun, uni fíya irihahane? 12Arko bakaake káyinooni kabaju t'aruun buroon bite kákuumaniin, úniiit fíya iriware fu kahaŋiiin kabaju bo? Bare írihinut iyu. Írimuñamuñ areyi fe kaanuku Hirim Heetoofe hu heesoke hu bite bu Kiris itim hifitee. 13Árimoomi kaanuku kiŋki karok t'Enuuf ite Atambatun, tu buroon b'ésuk i bimbi kásikin toko t'ifi kákuumanooro; kiŋki káhin yooŋ wusarah wu ti bitaabul bu iŋi kabaj kifiit kooniin tu sunuk su sinsi sisarahee toko. 14Iyu yooŋ a Anahaan u asoke fu ti kiŋki kawaare Hirim Heetoofe hu; aanaan te ho ti kaware fu búkuumanooro. 15Íñje bare íhinut mayet bifeeneŋ tu bondu, abe h'ikiñj hee n'aruun, eenutuun ariwunam dike doon. Tu kúuma ku, ho húkoyie n'iket bala an abin anuutan t'íñje bondu bimb'isaŋgoor ne bo! 16Iyakut kamaku iŋi naane ii iwaare Hirim Heetoofe hu. Diyu burok b'isejanee, abe at'ajakee bija t'íñje kane arko iwaareit ho. 17Arko yéeni íñje inoŋke fu eeene íihin burok bondu, n'iŋ'ijaamee. Bare naane aamo i t'íñjeiit tu búnuutina, butum tu buwananooro doon d'Atambatun asejanam t'eemo fu, 18bajaam búuma ni bíyemi naŋ? Bo beemo fu iwaare fuufu Hirim Heetoofe hu, t'iŋesut kabaju toko doon d'awaaraa Hirim Heetoofe hu aware du kabaju. 19Inooto ásukateen ite an fe, bare íhinoorahinooro ásukateen ite ésuk i ereyi fe, kaanuku man n'íñakin bakan keehooje-hooj bibin ti Yesu Kiris. 20If'íyemi n'Esuwif i, iŋ'íhin naane boko kaanuku man n'íñakiniin. Eluwa yite Moyis ékiniitam, bare if'íyemi ni bakan k'ékinie ku, iŋ'íhin naane boko kaanuku man n'íñakiniin. 21If'íyemi ni keenooto ku Esuwif, keebajut ku Eluwa yite Moyis, iŋ'íhin naane boko keebajut ku yo kaanuku man n'íñakiniin. Eenut íjeŋginut eluwa yite Atambatun, aaa, íjeŋginajeŋgin eluwa yite Kiris. 22If'íyemi ni keeyanut ku ti káyilen ku ti Kiris, iŋ'íhin naane boko kaanuku man n'íñakiniin. Íhinoorahinooro buroon bu fe t'ésuk i ereyi kaanuku man n'ifakan bakaake. 23Abe bondu fe iŋ'íhin bo kaanuku man Hirim Heetoofe hu ni hijamo, iibin ibaj húrub t'ebaj ite te ho. 24Árimoomi kaanuku bakan ifi káyemi ti síheekoor ti kateyi, kareyi fe iŋi kateyi, bare eeheeke u taŋ af'ásik hisiibanu hu. Náami aritey man n'aribin árisik hisiibanu hu. 25Kiŋki káhin buroon bu naane kateyi ku bija ti síheekoor su, ajok étuum i, iŋi kajab kaliiken ásuf. Iŋi káhin bondu kaanuku man ni kabin kabaj hisiibanu héefiyaariit. Úne bare uŋ'úhin bo kaanuku man n'úbaj hisiibanu hite hiraanu. 26Iŋ'ite ho aamo fu if'íyemi ti kateyi, íteyaariit báamiim; if'íyemi t'étuum naane étuuma i, ílohumaariit yooŋ báamiim. 27Iŋ'ijoŋg eniam ásuf, abe n'ijok yo alit, kaanuku man itim'ibin iwaare bakaaku Hirim Heetoofe hu ihaban, Atambatun n'aanam n'íñjeiit.

will be added

X\