1 KORENT 7

1Hahiyu iibin ti b'árikandijenam bu t'eleetar y'árikiñjinam i bite kaanuku «man kasaate ajakajak t'ániine.» 2Hee ajakeejak, bare kaanuku an u eetey huŋotu hu n'an i kaseñeit, ho húkoyie ániine-niine fe n'abaj anaar'o, anaare-naare yooŋ fe n'abaj áyino. 3Ániine u awarut biteñeko kásiku hikawo asaan anaar'o, anaare u yooŋ awarut biteñeko kásiku hikawo asaan áyino. 4Anaare u aŋkut ákini enio: yite i áyino. Ániine u yooŋ aŋkut ákini enio: yite i anaar'o. 5An atum'ateñeko kasaan áwiyo hikawo, kane arko taŋ boko kajamoore ni kaane keefin keewas bondu dikee keejoŋoor ni kalawu ku. Bare bondu buwas, n'iŋi kabatuko ti biseño booniin. Káhinaate iyu, man káyini bújokumooro, abe Setani n'aŋ'abaj bítim eeneyaniin ti kaahoofoor. 6Eenutuun áritumb árihin iyu, aaa. Eene bare af'árihin iyu, bijakajak. 7Tu kúuma ku, ésuk i fe n'eŋ'éyemi biyeeŋat naane íñje. Bare huruw fe ni b'Atambatun awuno bu: an e nu bonde, aau nu bonda. 8Bonde b'ija fu kasoku keebajut ku haare, ni haare hu ki bákayiniin kakete ku: bijakajak ni kariiko iyu naane íñje. 9Bare arko kayinaat bújokumooro, háyine hu kasa, haare hu yooŋ kaseño. Ábuki bihaŋ kajaku ésuk i ni kaseño, bala hiŋes hite huŋotu hu ni bakaaku hihaŋiin sembe. 10Keeseñee ku, báhamin bonde b'ija fu kasokiiin (káanukiiit t'íñje tu búnuutina, bare t'Anahaan u): anaare eeseñee awarut kanuutu t'áyino. 11Bare af'anuut, atum'aŋk'aseño; t'áyino taŋ t'aware fu bibatuko keebukan. Ániine yooŋ awarut kahooru anaar'o. 12Bakaaku, báhamin bonde b'ija fu kasokiiin íñje humuumam (Ánahaaniit asoke fu bo): an éeyilene af'abaj anaare éeyilenut, abe anaare u n'aane hee keeriiko t'afeeneŋ, atum'ahooro. 13Anaare yooŋ éeyilene af'abaj ániine éeyilenut, abe ániine u n'aane hee keeriiko t'afeeneŋ, anaare u atum'aano kawasoor. 14Ábuki ániine éeyilenut u áhinahin t'afeeneŋ ni kéeyilene ku iŋi naane aamo i n'anaar'o éeyilene u; anaare éeyilenut u yooŋ áhinahin t'afeeneŋ ni kéeyilene ku iŋi naane aamo i n'áyino éeyilene u. Káhinaate iyu, biñi booniin n'iŋi káyemi naane kéeyilenut ku, abe bare boko yooŋ káhinahin t'afeeneŋ ni kéeyilene ku. 15Bare arko an éeyilenut u ámaŋamaŋi kaanuku biseño booniin beewiis, aja awiis bo. Ifi bija iyu, ániine éeyilene u man yooŋ anaare éeyilene u aŋkut akol n'áwiyo, ábuki Atambatun aruwuunruw kaanuku ariiroŋ ti káasuumaay. 16Bare íikandijenuun bonde: awe anaare u, á̱moomi me man awe káyini kafakan áyini? Awe yooŋ ániine u, á̱moomi me man awe káyini kafakan anaarei? 17Bondu buwas, íñj'endu ti kaanuuun huruw fe aja áhin buroŋ boone naane t'Anahaan u asaano du, naane t'afiye du áyemi h'Atambatun aruwo hu. Bondu b'if'isok kéeyilene ku kareyi fe. 18Arko an u ateyatey karam h'Atambatun aruwo hu, aja ariiko iyu. Arko an u ateyit karam h'Atambatun aruwo hu, atum'atey karam. 19Kateyi karam ni kateyaate karam, bondu bibajut éñjeriŋ t'Atambatun. Beebaje bu éñjeriŋ te o beemo fu kájeŋgin kite buluwa boone. 20Huruw fe aja áyemi naane t'afiye du áyemi h'Atambatun aruwo hu. 21Kóyin k'Atambatun aruwi ku, eeman kereŋ awe ásukateen? Eheli eja ebeb. Bare af'a̱baj bítim bite kanuutu tu húsukateenaate hu, atum'a̱was bo beefaki. 22Ábuki ásukateen a Anahaan u aruwe anuuta tu húsukateenaate hu, abe akina an ite Anahaan u. An yooŋ eenooto ásukateen abe Kiris n'aruwo, áyemia ásukateen ite Kiris. 23Atambatun ajaamajaam ahahee kaanuku eejoohenuun. Náami atum'áriyemi búsukateen bite kúŋgowulan. 24Kújakuwe, huruw fe aja áyemi hágila Atambatun naane t'afiye du áyemi h'Atambatun aruwo hu. 25Ti b'árikandijenam bu ti bite bakan keeseñeit ku, b'ija bu kasoku, ijamut bo t'Anahaan u. Bare iisokuun kaayinoor kúuma, íñje a Atemit ayubiyene u éehinam íiyemi an éewoore. 26Ni sílaam seehooje see hahiye, íñj'eenaan ahaŋ kajaku huruw fe n'ariiko naane aamo i. 27A̱sasa kereŋ? Atum'a̱ŋes kahooru anaarei. Bare me a̱seit? Atum'a̱ŋes kasayi ake. 28Afa bare a̱sa, á̱hinut kaahoofoor. Ásuŋgute yooŋ af'aseño, áhinut kaahoofoor. Bare keeseñee ku kajuku sílaam, abe bo b'ímaŋiuun fu káyihinan. 29Kújakuwe, bonde b'ímaŋie fu kasoku: kunak keeŋeñene ku kifamut. Áfiitin ti hahiye, keese ku káñiŋkaan keerok bija t'Atambatun ni kite bakan keeseit; 30kiŋki kayiy yooŋ káhin ni kite kanooto ti biyiy; kiŋki katoofan káhin ni kite kanooto ti katoofu; kiŋki kájoohenn buroon bu káhin ni kite kabajut buroon bi kájoohenna bu; 31kiŋki kásik buroon bite t'etaam ye keerok béeñjeriŋiin káhin ni kite károkaariit ne bo. Ábuki aduna i naane eemo ee et'efiyo. 32Ímaŋiit aribaj bike biyinoor. An eeseit anaare aŋ'anaŋ hikawo tu buroon bite Anahaan u, aŋ'aŋes káhinu doon fe deetoofe Anahaan u. 33Bare an eesee aŋ'anaŋ hikawo tu buroon bite aduna i, abe aŋ'aŋes katoofu anaar'o. 34Náami ñakola ñúsuba ñondu ñ'af'anaŋ ti hikawo. Anaare yooŋ eeroŋut ti biseño, man yooŋ ásuŋgute éemusut biseño, bokondu iŋi kanaŋ kikawiin tu buroon bite Anahaan u. Iŋi kámaŋi káyemi bokoone ku káhabanein. Bare eeseñee u aŋ'anaŋ hikawo tu buroon bite aduna i, abe aŋ'aŋes katoofu áyino. 35Iŋi káasuumaay koonuun h'isoke fee, káanukiiit íñj'eemo ti kasejanuun bike. Ímaŋamaŋi kep aribaj buroŋ beejake, ariijok alit tip t'Anahaan u unoono taŋ. 36Útif hahiyu ti keesibare ku: ahaawa af'ajuk kaanuku kajendana káhinu beejeit akina n'asibaro aŋarkeyi naane aŋkut áyini kajoku hikawo, af'ajuker n'aane kawarawar biseño, kaja kaseño naane ámaŋie i; áhinut kaahoofoor. 37Arko bare ahaawa u áhabaneinohabanein t'an atiŋguto aane at'asa, af'ajuk kaanuku áyinooni kajoku hikawo eeriiko iyu eyeeŋat, áhinahin yooŋ áwariee. 38Náami af'a̱sa asibari, á̱hinahin áwariee; afut'a̱sa asibari, awe a̱haŋe káhinu áwariee. 39Anaare eeseñee awarut káyemi n'ake ániine t'áyino aketut. Áyino bare af'aket, áyinooni biseño t'an eetoofo u, saama náami t'an éeyilene t'Anahaan u. 40O bare kahaŋu katoofan kane arko eeriiko iyu t'asooñut aseño. Diyu kaayinoor kúuma, abe eenaan íñje yooŋ ibajabaj Búwejet bite Atambatun.

will be added

X\