1 KORENT 4

1Náami ariwarawar kajoku uni naane eroka barebare bakate Kiris, bakan keesaanee kaanuku iŋi kawaare múniyo méenuusee mite m'Atambatun. 2Bimbi bíkandijenee húŋgowulan heesaanee bike beemo fu ajoŋoor ne bo. 3Íñje bare, af'arijoonanam, man yooŋ bakaake ni kajoonanam, iti bíhinam doon. Íjoonanaariit hikawam tu bondu. 4Iwatanooreit tu doon fe, bare hóiit heemo fu ikuurakuur tu buroon bireyi fe. Ajoonana úuma aamo fu Anahaan u. 5Iŋ'ite ho aamo fu atum'arijoonan an tu hunak hu hireeŋoorut. Arinahan Anahaan u eebin: o kafeeñal ti meejaaŋe mu béenuusee bu t'ébaani i, abe n'áwufoor yooŋ biyinoor bite kúŋgowulan ku béenuusee bu. Abe huruw fe, Atambatun kaliiku ti b'áhine bu eesokorooro. 6Kújakuwe, b'isoke bee bireyi fe, iliikaliik bo t'íñje n'Apolos kaanuku iiliikenuun man n'áriyini kánandin naane báhamin bonde bije i. Beenaan: «Bijakajak an n'araan ti beesokee bu ti Míkiñjin mu.» Káhinu iyu, an t'aruun man aŋ'asaŋg ti bísiiŋooreina n'ake kéesokum áwiyo. 7Kame aañ áhinuun fu ariihaŋ bakaaku? Átambatuniit awunuun fu doon d'aribaje du fe? Makamu iyu i bije fu, iŋi naŋ n'af'arisaŋg nu doon d'aribaje du kite áruuniit ariwunee do? 8Aŋ'ariyinoor n'ariene ariheeka ariibaj doon d'árimaŋie du fe! Ariheeka áriiyemi kusaanum ti bítim bite Kiris! Áriyemia bákayi, abe bare uni mayet! Ímaŋamaŋi áriiyemi bákayi bakate nu múniyo kaanuku man uni yooŋ n'íriyemi bákayi t'afeeneŋ n'aruun! 9Bare anokooramnokoor kite uni epotor i, Atambatun áhinahin uni íriiyemi biraanu bite kúŋgowulan ku. T'ésuk i, írimoomi naane bakan keeware kayooliee ti sifiñjan su. Uni yooŋ naane boko, t'uni t'aduna i ereyi fe t'ef'éheelin, huta hu tu kúŋgowulan ku bija yooŋ t'emalaka i. 10Ésuk i ejokajok uni bakan keewene iŋ'ite hu Kiris, bare aruun aŋ'ariene áriwesinatawesinato iŋ'ite hu Kiris! Irijokeejok bakan keebajut sembe, bare aruun aŋ'ariene aribajabaj sembe! Irihuufeehuuf, bare aruun arijokeejok nu sumoŋu súsuba! 11Bija t'ewahatu yende yooŋ irijoñjolatajoñjolat, búhujo bondu t'uni, abe iribajut wañ. Iŋ'írimiñee kep, abe iriyinaat biriiko yooŋ tand'afeeneŋ. 12Iŋ'írilaamool tu burok kaanuku íriikuumanooro. An af'álafatin uni, n'iŋ'irilaw beejake bija te o. An n'áhihinoor uni, n'iŋ'irituumen. 13An af'asok t'uni beejakut, n'iŋ'írisafin atoofee. Bija t'úmiye yooŋ, ésuk i ejokajok uni naane kuhos kite aduna i, nu buruwat bite kúŋgowulan ku. 14Káfuñatanuuniit k'iŋese fu h'íkiñjinuun hee, bare kaanuku iirimuun naane bakañiam k'ímaŋie. 15Ábuki hutoof yooŋ aŋ'aribaj eliikenauun bítim bite Kiris kaamo súñjune sumoŋu, faaf afeeneŋ taŋ ariyino fu kabaju. Abe múniyo tu buroŋ boonuun aruun ni Yesu Kiris, íñj'eemo fu faafuun aŋarkeyi naane íñje ijabe fu iwaareuun Hirim Heetoofe hu. 16Náami íñj'endu ti kaanuuun árihin naane íñje. 17Bondu bíkinineŋe fu n'íboñinuun Timote eeemo u naane añiam i ímaŋie, abe n'ájub t'Anahaan u. O kábaŋinanuun buŋ bu buroŋ búuma ti bítim bite Kiris beemo fu ariike, abe buroŋ bondu b'if'iliiken ésuk i tánotan ti kéeyilene ku kareyi fe. 18Bakaake t'aruun kayitoorayitooro, ti kaanu ku man it'ibinuun kajuku. 19Bare Atemit af'aane hee, íñje bibin t'aruun memee. N'iŋ'ímeyi man bokondu kiŋki kayitooro iyu ti báhamin kabajabaj sembe site Atambatun, man yooŋ bayi! 20Ábuki Jáyi jite Atambatun jíteiit báhamin beetoofe barebare; jo jite sembe. 21Naŋ n'árimaŋie fu? Ibin t'aruun nu hunuk, man yooŋ ibin íiwufooruun kámaŋi ku, ni káneeni ku yooŋ?

will be added

X\