1 KORENT 3

1Kújakuwe, múniyo h'íyemie hu t'aruun, iyinaatuun yéeni káhamin naane an aa áhamin ni bakan keebaje Búwejet bite Atambatun. Íhaminuunhamin naane an aa áhamin ni bakate ku t'etaam ye, naane bilekej ti bítim bite Kiris. 2Íjuwanuunjuwan, bare iñoofanutuun, ábuki man áriyini biñamuno. Bija yooŋ hahiye fe ariyinaat, 3ábuki buroŋ boonuun búmoomi naane bite bu bakate ku t'etaam ye. Naane aamo i aŋ'arihiñanoor abe yooŋ aŋ'ariheñjeŋoor, eeman aamo fu árimoomi naane bakate ku t'etaam ye, máhinar moonuun yooŋ naane mite bakate ku t'etaam ye? 4Ake t'aruun af'aane: «Íñje ite tu Pool», ake n'aane: «Íñje ite t'Apolos», aamo fíiit aŋ'árihin naane bakate ku t'etaam ye? 5Náami aañ aamo fu Apolos, aañ yooŋ aamo fu Pool? Uni eroka yite Atambatun barebare taŋ, aruun ariŋaase t'uni áriiyilen. Iŋ'írihin huruw fe burok b'Atambatun asaano bu: 6íñje inawanaw nunukanuk nu, Apolos n'aroose no, bare Atambatun áhine fu no neehaat. 7Náami eenawe u n'eeroose u kanooto doon tus. Atambatun aamo fu doon areyi fe, ábuki akina áhine fu nunukanuk nu neehaat. 8Eenawe u n'eeroose u karare, ábuki iŋi karok t'afeeneŋ bija t'Atambatun, abe o kasiibaniin huruw fe aliik tu burok boone. Aruun ariemo fu etool ite Atambatun. Aruun ariemo fu yooŋ báakinum bite Atambatun. 10Naane t'Atambatun awunam du t'isiiŋane fu kiñaan kítiyar ku naane anuta éemeyie buroko. Hahiye ake ondu ti káhoojinan enuuf i. Bare huruw fe anaŋ toko hikawo ti naane aamo i ti káhoojinan ku. 11Ábuki kiñaan kítiyar ku kiheeka keesiiŋo, ko keemo fu Yesu Kiris, abe an ayinaat kasiiŋan kike. 12Ake áyinooni káhoojinan enuuf i n'éwurus, man yooŋ n'ehalis, man yooŋ nu bujuju beeseere, man yooŋ n'ásik búkuŋu, man yooŋ étuuru, man yooŋ yaŋej. 13Tu hunak hite Kajoonan ku, burok bite ánoan fe kafeeñu, abe bo kámeyiee. Ábuki hunak hondu káyemi hite sineemak sómbokun, site káwufoor buŋ bu burok bite ánoan fe bunokoore fu. 14Ake af'asiiŋan burok boone ti kiñaan kítiyar ku, abe sineemak su siyinaat te bo doon, an ondu kasiibanee. 15Sineemak su ni sifin súsuf burok bite ake, o kábuuru hisiibanu hoone. Humuumo akina kafakanee, bare anokooreenokoor kite am áfakina ti sineemak. 16Kame árimeyiit kaanuku aruun ariemo fu enuuf ite Atambatun, abe Búwejet bite Atambatun bikinakin t'aruun? 17An af'ábuj enuuf ite Atambatun, Atambatun kábuju an ondu. Ábuki enuuf ite Atambatun enabanab, abe aruun ariemo fu enuuf yendu. 18An atum'abuut hikawo: ake t'aruun af'aliik ti bakate ku t'etaam ye n'aane áwesinatawesinato, aja áyemi t'ésuk i naane an eewene, t'áami nu múniyo áwesinatawesinato. 19Ábuki búwesinato bite bakate ku t'etaam ye, t'Atambatun diyu kaañunaate. Múniyo Míkiñjin mu meenaan: «Atambatun aŋ'ajok kúwesina ku ti bífiir booniin bi kanoŋke bu keekuuj.» 20Nu musooñ meene: «Atemit ámoomi biyinoor bite kéewesinatee ku; ámoomi kaanuku bijarut doon tus.» 21Náami ágila ite bítim, an atum'amako. Ábuki aruun arikino fu areyi fe: 22íñje Pool, Apolos, Piyeer, etaam i, buroŋ bu, eket i, beebaje bu hahiye, ni beeyak bu bibin kabaju fe, aruun arikino bo. 23Ábuki aruun bakate Kiris, abe Kiris ite Atambatun.

will be added

X\