1 KORENT 14

1Arijab ariŋes man n'árimaŋi bakaaku. Ariŋes yooŋ buroon bu Búwejet Beenabe bu bumbu buwun, áhaŋum kayiŋan kite báhamin bite Atambatun. 2An af'aŋ'áhamin ti kíhaminiin kuway, n'Atambatun n'áhamine fu, bare nu kúŋgowulan kíiit, ábuki an ájamaariit naŋ n'af'asok. Búwejet Beenabe bu ifi bitiŋgo, bare béenuusee bu bamb'asok biniŋaniŋ ésuk i. 3An af'aŋ'ayiŋan báhamin bite Atambatun, nu kúŋgowulan ku n'af'áhamin, abe aŋ'ayaŋgananiin kikaw, n'abeetooriin, abe n'áhiniin keehaŋ kayanu ti káyilen ku. 4An af'aŋ'áhamin ti kíhaminiin kuway, káyilen koone taŋ k'af'áhin keehaŋ kayanu. An aŋ'afin ayiŋan báhamin bite Atambatun, káyilen kite kéeyilene ku fe k'af'áhin keehaŋ kayanu. 5Ímaŋamaŋi aruun arireyi fe n'árihamin ti kíhaminiin kuway, bare b'ihaŋe bu kámaŋi beemo fu aŋ'ariyiŋan báhamin bite Atambatun. An aa ayiŋan báhamin bite Atambatun ahaŋahaŋ éñjeriŋ an aa áhamin ti kíhaminiin kuway, kane arko taŋ ake áhandine b'asoke bu, man kéeyilene ku kareyi fe ni kahaŋ kayanu ti káyilen ku. 6Kújakuwe, arko íñje ibine fee t'aruun, abe n'íhaminuun ti kíhaminiin kuway, n'iŋi fíya íñjeriŋuun? Aaa, kane arko fu taŋ íñje isokuun akuur but bike b'Atambatun áwufooram, man yooŋ n'íhinuun áriimeyi múniyo mu, man yooŋ n'iyiŋanuun báhamin bite Atambatun, man yooŋ n'iliikenuun bike. 7Ariliik fee tu buroon bu bimbi bíyifee te bo naane éyifu, n'ekondiŋ: ake af'áyemi ti káyifu, abe n'aŋ'átukulool, buŋ b'an aja fu kámeyi naŋ n'aamo fu ti káyifu ku? 8Arko káabiinu ku kusokut akuuree kane hitiik hibaj, aañ n'arito eeja bite te ho? 9Iyu yooŋ a ariemo fu: af'árihamin ti kíhaminiin kuway, buŋ b'ésuk i eja fu kajoku naŋ n'arisoke fu? Diyu káfiiten hiyam! 10Kíhaminiin ku kuhoojahooj faa t'etaam i, abe abajut hike heeemo toko hi bakate te ho kájamooraariit báhamin. 11Ifit'ijam bare kíhaminiin k'an áhamine n'íñje, an ondu káyemi t'íñje amoosoora, n'íyemi te o yooŋ amoosoora. 12Iyu yooŋ a ariemo fu: makamu árimaŋamaŋi dómbokun buroon bu Búwejet bite Atambatun bumbu buwun, ariŋes man n'arihaŋ kabaju bimbi búyokunan kéeyilene ku keehaŋ kayanu ti káyilen ku. 13Iŋ'ite ho aamo fu an aa áhamin ti kíhaminiin kuway, awarawar kalawu Atambatun eewuno aŋ'abin áhandin bo ti kike k'ésuk i ejame. 14Ábuki if'ilaw ti kíhaminiin kuway, ehelam eŋ'éyemi ti kalawu ku, bare ímeyiaariit naŋ n'if'isok. 15Náami buŋ b'ija fu? Íñje kalawu n'ehelam ti kíhaminiin kuway, abe n'ilaw yooŋ ti báhamin b'ijame; íñje kahooñu Atambatun n'ehelam ti kíhaminiin kuway, abe n'ihooño yooŋ ti báhamin b'ijame. 16Af'a̱law Atambatun ti kíhaminiin kuway kaanuku a̱aano eyeehen, abe bakan kéemusut kajamu báhamin naane bondu ni káyemi toko ti kéeyilene ku, kámeyiit yooŋ naŋ n'a̱soke fu, buŋ bi kaja fu kaanu «Amiin» ti kalawu kúuwe? 17Arko yooŋ kalawu kúuwe kutoofatoof naane fíya naŋ, iti kíhiniin keehaŋ kayanu ti káyilen ku. 18Íñj'endu ti kaanu Atambatun eyeehen naane ihaŋuun i arireyi fe káhamin ti kíhaminiin kuway. 19Bare kéeyilene ku ifi kakuukanooro, iŋ'ihaŋ kámaŋi kasoku kirim keemo hutok k'ésuk i kajame man n'iliikeniin ne ko, bala isok kirim keemo súñjune sumoŋu ti kíhaminiin kuway. 20Kújakuwe, atum'aŋ'ariyinoor naane biñi. Ti káhinu kite meejakut mu, áriyemi naane bilekej; bare ti biyinoor bu, áriyemi naane sifaaf. 21Iyu i Míkiñjin mu musoke fu: «Atemit aane: íñje kaboñu bakan bakate kíhaminiin kuway, bakan keeemo emoosoora, keeja kéehaminam bakan kúuma, abe bare bakan kúuma iti kajamatanam.» 22Náami káhamin ku ti kíhaminiin kuway, diyu ékeetanuma bija ti kéeyilenut ku, káanukiiit ti kéeyilene ku. N'afin áami kayiŋan ku báhamin bite Atambatun, diyu ékeetanuma ti kéeyilene ku, káanukiiit ti kéeyilenut ku. 23Ariliik fee kane arko naane kéeyilene ku kareyi fe kakuukanooree fee, abe arireyi fe n'áriyemi ti báhamin ti kíhaminiin kuway, bakan kéeyilenut man yooŋ kéemeyiit bítim bu esaan-saan ni káyoosein toko, man kaane fíya ariwenawen? 24Bare arko arireyi fe áriyemie fu ti kayiŋan báhamin bite Atambatun, abe an éeyilenut man yooŋ éemeyiit bítim bu esaan-saan n'áyoosein toko, af'ajam báhamin bu kep, n'uŋu bukuuro kaanuku akina ahoofoora. Báhamin b'ajame bu kagorio t'ehel. 25O kasoku tu buhooŋuuun béenuusee bu t'ehel yeene fe. O kayayu buhooŋio t'etaam, abe n'asokoroor Atambatun ti kaanu: «Múniyo Atambatun ondu n'aruun!» 26Náami hahiyu buŋ kújakuwe? Af'arikuukanooro, ake n'aŋ'ahooñ Atambatun, ake n'aliiken ésuk i bike, ake n'asok bike b'Atambatun áwufooro, ake n'áhamin ti kíhaminiin kuway, ake n'áhandin bo ésuk i. Bondu fe buwarawar káyokunan kéeyilene ku keehaŋ kayanu ti káyilen ku. 27Arko bakaake kámoomi toko kéemaŋie káhamin ti kíhaminiin kuway, bákasuba kasawoor kéehin bo, man yooŋ kahaŋ kahooju, bákahaaji, abe ake awarawar káhandin bi kasoke bu. 28Arko abajut an ite káhandin ésuk i báhamin bu, kaja kakoowan ti hahooja hu; káhamin n'Atambatun ti siheliin ti kíhaminiin kuway. 29Kiŋki kayiŋan báhamin bite Atambatun, bákasuba barebare man yooŋ bákahaaji kaja káhamin, abe bakaaku ni kajamatan jak keejuk man bite toko man yooŋ. 30Arko ake ámoomi toko eebaje toko-toko bike b'Atambatun áwufooro, éeyemie u ti báhamin bu n'aŋ'afit. 31Arireyi fe árinooni kasawoor ariiyiŋan báhamin bite Atambatun, kaanuku man huruw fe n'aliikenee, abe n'ayaŋgananee hikaw. 32Kiŋki kayiŋan báhamin bite Atambatun, siheliin siheekutiin, 33ábuki Atambatun anooto Atambatun ite kalas-kalas; akina Atambatun ite káasuumaay. Ariwarawar káhinu naane bakan kite Atambatun fe kéeyilene ku ii káhin: 34ifi kakuukanooro, haare hu kawarawar kakoowan. Kátumbut kawar káhamin toko. Kawarawar kajamu ti háyine hooniin naane busokee i t'Eluwa yite Moyis. 35Ifi kámaŋi kákandijen bike, n'iŋi kákandijen bo bákayiniin t'enuuf tu boko. Búwariit anaare n'áhamin kane kéeyilene ku kakuukanooro. 36Kame aŋ'ariene man t'aruun ti Hirim hite Atambatun húnuutina fu? Bare me aŋ'ariene unoonuun arijame fu ho? 37Ake af'ayinoor n'aane Búwejet Beenabe bu bondu te o, man yooŋ akina ayiŋana ite Atambatun, n'aŋ'ámeyi kaanuku b'íkiñjinuun bee, Anahaan u asoke fu bo. 38Bare arko eeteñeko bondu, aruun yooŋ ariteñekoo. 39Náami kújakuwe, arijab ariŋes man n'aŋ'ariyiŋan báhamin bite Atambatun, abe atum'ariteñeko an n'áhamin ti kíhaminiin kuway. 40Bare árihin bondu fe bujoŋoor, atum'árihin bo kítakanoor.

will be added

X\