1 KORENT 12

1Kújakuwe, úja hahiyu tu buroon bu Búwejet Beenabe bu bumbu buwun. Ímaŋamaŋi árimeyi bifeeneŋ bu tu buroon bondu. 2Árimoomi kaanuku hítiyar hu, aruun t'ariyoosoorut bítim bite Kiris, aŋ'ariwas yéeni bakaaku keeñakuun ti ñájiim ñéehaminaariit ñu, abe áriyiniaariit biteñeko. 3Iŋ'ite ho h'ímaŋie fu áriimeyi bonde: an af'aane: «Yesu aja áwuumee!», Búwejet bíteiit Atambatun bitiŋgo fu eesok bo. Abe yooŋ an ayinaat kaanu: «Yesu aamo fu Anahaan u!», tu Búwejet Beenabe bu bitiŋguto. 4Buroon bu Búwejet bu bumbu buwun buwayawayo, bare Búwejet bifeeneŋ bu ufu buwun bo. 5Ñurok ñu bija t'Atambatun ñuwayawayo, bare Anahaan afeeneŋ u uf'úrok bija te o. 6Bifehe bu yooŋ buwayawayo, bare Atambatun afeeneŋ u áhine fu bo bireyi fe bija t'úne úreyi. 7Búwejet bu buwunawun huruw fe t'úne bike bite káyokunan kéeyilene ku fe. 8Búwejet bu uŋu buwun ake káwasi ti báhamin; bo Búwejet bifeeneŋ bu nu buwun ake kámeyi báhamin. 9Bo Búwejet bondu bifeeneŋ bu nu buwun ake eebaj káyilen kómbokun, nu buwun ake sembe site karitan bakan kéesomute. 10Búwejet bu uŋu buwun ake sembe site káhinu buroon beehaŋe ésuk i kikaw, nu buwun ake sembe site kayiŋan báhamin bite Atambatun, nu buwun ake sembe site kakeetan bumbu búnuutin tu ñúwejet ñeejakut ñu, nu bumbu búnuutin tu Búwejet bite bu nu múniyo. Nu buwun ake sembe site káhamin ti kíhaminiin kuway, nu buwun ake sembe site káhandin kíhaminiin kondu. 11Búwejet bifeeneŋ bu ifi bíhin ii bondu fe: huruw fe n'uŋu buwuno beewayee, naane tu hutoofe du bo. 12Úmoomi kaanuku eni yite húŋgowulan efeeneŋ, abe bare ebajabaj buroon beehooje. Buroon bondu naane buhooje i fe, bujokoorajokoor béehin eni efeeneŋ. Iyu yooŋ i Kiris aamo fu. 13Bakaake t'úne Esuwif, bakaaku kanooto Esuwif, bakaake búsukateen, bakaaku kanooto búsukateen, bare úreyi fe úbostee fu tu Búwejet Beenabe bu bifeeneŋ bu kaanuku núuhin eni efeeneŋ. Abe Búwejet Beenabe bu bifeeneŋ bu bibine fu t'úne úreyi fe. 14Eni i, dóoniit difeeneŋ d'ebaje fu, ebajabaj buroon beehooje. 15Kuwot ifi keene: «Makamu inooto emoŋu, íñje íteiit t'eni i», bíkinineŋut náami kunuutanooraa t'eni i. 16Káakondin ni kifin keene: «Makamu inooto díkin, íñje íteiit t'eni i», bíkinineŋut náami kunuutanooraa t'eni i. 17Kane eni i ereyi fe éyemi díkin, buŋ fíya b'eja fu káhinu eŋ'ejam? Arko yo ereyi fe éyemie fu káakondin, buŋ fíya b'eja fu káhinu eŋ'ejam haaw? 18Náami Atambatun asiiŋanasiiŋan t'eni i buroon bu fe naane ámaŋie i. 19Arko eni i fe éhineehin nu doon difeeneŋ taŋ, man eenee eni! 20Bare buroon beehooje bibaje fu, n'eni efeeneŋ. 21Díkin ayinaat kaanu emoŋu: «Isawuleiti!» Hikaw hu yooŋ hiyinaat kaanu wuwot wu: «Isawuleituun!» 22Bondu biyinaat kabaju, ábuki buroon bite bu t'eni i b'újoke bu naane beehaŋe bu kábajaati sembe fe bibajabaj éñjeriŋ yómbokun. 23B'újokut bu doon fe, bo b'uf'úhaŋ katofotoor. Béeruwaariitee bu, bo b'uf'úhaŋ kásutural, 24abe béenuusaariitee bu bisawuleit úsutural bo. Iyu a Atambatun áhine fu eni i, abe n'áhin béeruwaariitee bu ni bihaŋee kajoku áwariee, 25kaanuku káwaajinoor itim kíyemi t'eni i. Buroon beeemo bu te yo fe uŋu búyokunanoor. 26Doon difeeneŋ dite t'eni i ifi dibaj káseñji, baabu buroon fe n'aŋ'áseñji yooŋ te bo. Doon difeeneŋ nu dúmuuree, baabu buroon fe n'uŋu butoofan ne do. 27Náami aruun arireyi fe árihinahin eni efeeneŋ, yeeemo i yite i Kiris, abe huruw fe t'aruun ajokoorajokoor te yo. 28Iye a Atambatun asiiŋane fu kéeyilene ku: epotor i kaamo fu étiyar i; eyiŋana yite Atambatun ni káyemi ésooboriyan i; kiŋki kaliiken ésuk i mite m'Atambatun ni káyemi éhaajiyan i; kiŋki káhin beehaŋe bu ésuk i kikaw ni kásein; kanuut toko náami keebaje ku sembe site karitan bakan kéesomute; kahaban náami kiŋki káyokunan ésuk i; kanuut toko náami kiŋki káwuforoor bakaaku buroon bi kaware bu káhinu, abe n'atik áami kiŋki káhamin ti kíhaminiin kuway. 29Ésuk íiit ereyi eemo fu epotor, man yooŋ eyiŋana yite Atambatun, man yooŋ eliikena ésuk i. Káreyiiit káyinie fu káhinu beehaŋe ésuk i kikaw, 30man yooŋ karitan bakan kéesomute. Káreyiiit káyinie fu káhamin ti kíhaminiin kuway, man yooŋ káhandin ko. 31Arijab ariŋes man Búwejet Beenabe bu nu buwunuun beehaŋe bu kabaju éñjeriŋ. Abe hahiyu íiwufooruun bítim beehaŋe bu ñaañu fe.

will be added

X\