1 KORENT 11

1Arineefan t'íñje naane íñje yooŋ ii ineefan ti Kiris. 2Íñj'endu ti kasokorooruun iŋi naane aa áribaŋinaam tu doon areyi fe, ni naane aa arijok nu sumoŋu súsuba b'iliikenuun bu. 3Bare ímaŋamaŋi árimeyi bonde: Kiris aamo fu aseef ite ániine-niine fe, ániine n'áyemi aseef ite anaare, abe Atambatun n'áyemi aseef ite Kiris. 4Ániine af'áyemi ti kalawu, man yooŋ ti kayiŋan bike tu huruwu hite Atambatun, abe n'asol dike doon ti hikawo, an ondu áwiinianawiinian Kiris eeemo u hikawo. 5Anaare n'afin áyemi ti kalawu, man yooŋ ti kayiŋan bike tu huruwu hite Atambatun, abe ásooreit doon, anaare ondu áwiinianawiinian áyino eeemo u hikawo. Anokooreenokoor kite akina anaare u ayiselayiselo. 6Anaare af'aŋ'ateñeko kákumbalool hikawo, awarawar kame iŋi biyiselo! Bare makamu áfuñinanieefuñinani anaare n'ayiselo, man yooŋ n'amuñ tu wan woone, awarawar kame kákumbalool hikawo. 7Ániine awarut iŋi kákumbalool hikawo akina ti kalawu, ábuki áwuwaneewuwan éeyemi naane Atambatun, akina yooŋ aamo fu búnokoorum bite kániku koone. Bare anaare aamo fu búnokoorum bite kániku kite ániine. 8Múniyo t'éniiit ite anaare t'Atambatun ásike fu éewuwan ániine, bare t'ániine t'ásike fu éewuwan anaare. 9Abe ániine áwuwanutee bija t'anaare, bare anaare áwuwanee fu bija t'ániine. 10Iŋ'ite ho aamo fu anaare awarawar iŋi búsooro éewufoor kaanuku ájeŋginajeŋgin áyino, emalaka i kéekinineŋ. 11Bare úne kéehine ku buroŋ bite b'úne t'afeeneŋ n'Anahaan u, anaare awarut kákini hikawo, ondu ti kaaŋen ániine u. Ániine yooŋ awarut kákini hikawo, ondu ti kaaŋen anaare u. 12Ábuki fu anaare, naane aamo i t'eni yite ániine t'Atambatun ásike fu éewuwano, iyu yooŋ aamo fu ániine, anaare af'áyihinoo. Bare bireyi fe t'Atambatun t'ufu búnuutin. 13Ariyinoor bo fee aruun kumuumuun ariijuk: bijakajak fíya anaare n'alaw Atambatun t'ákumbaloolut hikawo? 14Uf'újondoman naane buroon bu beemo i, n'uŋ'újuk kaanuku áfuñinanieefuñinani ániine n'awas wan woone weekamb, 15abe bare anaare, wan weekambe uŋu wúnikano. Múniyo anaare awuneewun wan weekambe kaanuku uŋu wubin wúkumbalooloo hikaw. 16An af'asooñ ámaŋi síjeeŋoor tu bondu, ámeyi bonde: iyu if'írihin, uni ni bakate ku Atambatun kéeyilene ku. 17B'ibin bee te bo, iyinaatuun kasokoroor te bo, ábuki hah'arikuukanooro kaanuku ariilaw Atambatun, híhinaariituun n'arihaŋ bija hágila ti bítim bu; iŋi híhinuun n'arihaŋ biñako. 18Bítiyar bu beemo fu kaanamyen af'arikuukanooro áriiyemi ti kalawu Atambatun, aŋ'áriwaajinoor, abe ijaja bo káyilen. 19(Abe káwaajinoor kuwarawar kabaju t'aruun man kéejube ku nu múniyo ni káyiniee kakeetan.) 20Af'arikuukanooro, ariyinaat kaanu Éhijiima yite Anahaan u y'af'ariñoofo. 21Ábuki af'aririiko buñoofo bu kep, huruw fe aŋ'amoken tu woone wu, bakaake nere t'éwusan, bakaaku nera káajoñjolatin. 22Kame aribajut sunuuf kaanuku áriiñoofein, abe n'árihujein toko? Bare me aruun áritumbe arihuuf bakate ku Atambatun kéeyilene ku ariyak aŋ'ariifuñatan ii keebajut ku doon? Hahiyu naŋ n'árimaŋie fu isokuun? Isokorooruun, bare me? Aaa, it'ítumb isokorooruun mayet tu bondu! 23Bonde bi kaliikenam fu béenuutina bu t'Anahaan u, abe íwufooruunwufoor bo yooŋ: Anahaan u Yesu, káajiim ki kajooheno ku, ayitayit humburu 24abe n'aane Atambatun eyeehen. Ahaban, n'afiitar ho abe n'aane: «Diye eniam y'ísike i isaan bija t'aruun. Aŋ'árihin iye kaanuku áriibaŋinaam.» 25H'aamo hu yooŋ kañoofaa éhijiima i kahaban, n'ásik ekot ite ébiñ i abe n'aane: «Diye ekot yéewufoore i kaajamoor kíyeni ku keeja ku kabaju t'etut Atambatun ni bakan koone, halan húuma heeja hu búyuuso héekinineŋ. Híhinin fe h'árihujee te yo, árihin bo kaanuku áriibaŋinaam.» 26Ábuki híhinin fe h'ariteŋe humburu honde, abe n'árihujo t'ekot yende, áriwufoora kaanuku Anahaan u aketaket, abe bondu bija yooŋ kóyin k'ábatikein ku. 27Iŋ'ite ho aamo fu an af'ateŋ tu humburu hu mateŋar mite kafuñatan Anahaan u, man yooŋ n'áhujo t'ekot i mo mifeeneŋ mu, atina t'eni yite Anahaan u, ni halan hoone yooŋ. 28Huruw fe ajab ajuker hikawo jak, ahaban n'ateŋ tu humburu hu, abe n'áhujo t'ekot i. 29Ábuki an af'ateŋ tu humburu hu, n'áhujo yooŋ t'ekot i, abe ayinoorut eni yite Anahaan u, an ondu anoŋka éehin Atambatun eekufoo. 30Bondu bíkinineŋe fu keehooje t'aruun n'iŋi kásomut, kábajaariit sembe, bakaake kayak yooŋ iŋi kaket. 31Uf'újab újuker kikaw úne, Anahaan u man ajoonan úne. 32Bare aŋ'ajoonan úne, abe n'ajoŋooran úne kaanuku utum'úbin útinanee ni bakate ku t'etaam ye. 33Náami kújakuwe, af'arikuukanooro kaanuku ariiñoofo t'afeeneŋ, arinahananoor. 34An af'ajoñjolat, ajab ájifin te o bala abin, kaanuku atum'abin áhin Atambatun eekufouun kane aŋ'arikuukanooro. Baabu b'árikandijenam bu, if'ija ibin, n'iŋ'ísafinuun te bo.

will be added

X\