1 KORENT 1

1Íñje Pool a Atambatun aruwe u naane t'ámaŋie du kaanuku íiyemi apotor ite Yesu Kiris, n'ati úne Sosuten írikiñjinuun fee. 2Uni bokondu ti kákiñjinuun aruun bakate ku Korent kéeyilene ku, aruun k'Atambatun akino ku. Aruwuunruw kaanuku áriihin t'afeeneŋ ni Yesu Kiris, aruun ni bakaaku fe keeemo ku tánotan, kiŋki karuw huruwu hite Anahaan ite úne Yesu Kiris, Anahaan ooniin n'Anahaan ite úne toko. 3Atambatun Faaf úne, n'Anahaan u Yesu Kiris kaja kásoniyanuun, abe ni kawunuun káasuumaay. 4Ko kireyi fe iŋ'eene Atambatun úuma eyeehen uŋu hoonuun hu, iŋ'ite kajaku koone k'áwufooruun ku ti Yesu Kiris. 5Múniyo naane árihine i ne o t'afeeneŋ, arihoojaneehoojan bib n'ebaj yánoyan, áhaŋum yite kámeyi kite múniyo mu, ni kawaare kite te mo. 6Iriseedaseede Kiris t'aruun, abe n'arijok te bo ni sembe-sembe. 7Náami buroon b'Atambatun bamb'awun, bike bunooto toko b'aribajut, aruun keeemo ku ti kanahan kóyin k'Anahaan ite úne Yesu Kiris áŋaasin ku. 8Humuumo káwutiyenuun sembe bija yooŋ tu hunak hiraanu hu, kaanuku an atum'abin abaj bike bite katinanuun hunak h'ábatikein hu te ho. 9Atambatun áwasaariit báhamin b'asoke, akina eeruwuun u kaanuku áriihin t'afeeneŋ n'Añio Yesu Kiris Anahaan ite úne. 10Kújakuwe, íñj'endu ti kalawuuun tu huruwu hite Anahaan ite úne Yesu Kiris: arijamoor, káwaajinoor itim kibaj t'etutuun. Arijokoor alit tip ariibaj búwejet bifeeneŋ ni biyinoor bifeeneŋ. 11Kújakuwe, múniyo bakaake ti keekine ku tu Kúlowe kasokamsok kaanuku aŋ'ariheñjeŋoor. 12Iihatuun báhamin bu: kaane huruw fe t'aruun aŋ'asok beewayee ni bite bu bakaaku. Bakaake iŋi kaane boko bakate ku Pool; bakaaku ni kaane boko bakate ku Apolos; bakaake ni kasooñ kaane boko bakate ku Piyeer; bakaaku ni kaane boko bakate ku Kiris. 13Butum aŋ'ariyinoor n'ariene Kiris áwaajinooreewaajinoor? Bare me íñje Pool ikete fu t'ekuruwa i uŋu hoonuun hu? Tu huruwu húuma fíya t'aribostee fu? 14Íñj'endu ti kaanu Atambatun eyeehen naane aamo i ibosteit mayet afeeneŋ t'aruun, kane arko taŋ Kirispus ni Gáyiyus. 15Náami an fe t'aruun ayinaat kaanu abosteeboste tu huruwu húuma. 16(Ániya! Ibostaboste yooŋ butoŋ bite Sitefanas, bare íyilenut kaanuku isooñasooña iboste ake away.) 17Kiris áboñinootam kaboste: áboñinamboñin kawaare Hirim Heetoofe hu, abe káanukiiit iŋ'íhamin nu búwesinato bite húŋgowulan. Abe iyu if'íhin, ábuki ímaŋiit kákasinan sembe seeemo su t'eket yeene t'ekuruwa i. 18Múniyo kawaare kite eket ite Kiris t'ekuruwa i, bakan keeemo ku tu bútowuto bu kajokajok ko naane beeñunut. Bare t'úne keeemo ku ti bítim bite kafaku ku, diyu sembe site Atambatun. 19Míkiñjin mu meenaan: «Íñje kábuju búwesinato bite kéewesinatee ku, abe n'iŋ'ífiiten naane iya káwasi kite kéewasie ku.» 20Náami húwesina hu hondu diin? Eejaŋgee u ondu diin? Eetoofe u butum t'etaam ye ondu diin? Atambatun áwufoorawufoor kaanuku búwesinato bite kúŋgowulan ku buñunut! 21Múniyo kúŋgowulan ku nu búwesinato booniin fe kámeyiit Atambatun, abe bondu Atambatun áhine fu bo nu búwesinato boone. Náami Atambatun áhabaneina fu kaanuku eefakan kéeyilene ku ni hirim hih'iriwaare heeemo hu naane heeñunut. 22Esuwif i kaŋesaŋes kajuku beehaŋiin kikaw, beekuuriin kaanuku hirim hu t'Atambatun tu húnuutina fu; Egerek i ni kafin kaŋes bumbu búnuutin tu búwesinato bu. 23Uni bare iŋ'iriwaare kaanuku Afakana u atibeetib t'ekuruwa i: t'Esuwif i, an af'asok bondu n'aŋ'áami álafatina Atambatun, ti keenooto ku Esuwif, bondu buñunut. 24Bare ti bakan k'Atambatun aruwe ku, Esuwif i ni keenooto ku Esuwif, Kiris aamo fu sembe site Atambatun, nu búwesinato boone yooŋ. 25Ábuki bondu bite b'Atambatun bu kúŋgowulan ku kajoke bu naane beeñunut, bihaŋahaŋ káwasi búwesinato booniin, abe bi kajoke bu te o naane beebajut sembe, bihaŋahaŋ yooŋ sembe. 26Kújakuwe, arijondoman fee naane áriyemie i h'Atambatun aruwuun hu: bakan ku kúŋgowulan ku kiŋki kajuker ni kajok bakan kéewesinatee kahoojut t'aruun, bakate sembe su kahoojut yooŋ, ni bakan kómbokun ku. 27Bare keejokee ku naane bakan keeñunut, Atambatun ajifaniinjifan kaanuku eefuñatan kéewasinatee ku. Keejokee ku naane bakan keebajut sembe, Atambatun ajifaniinjifan kaanuku eefuñatan bakate sembe su. 28Bakan ku kúŋgowulan ku káwiiniane ku, ni kahuufiin, abe yooŋ kajokutiin doon fe, Atambatun ajifaniinjifan kaanuku éebuj keejokee ku bakan kómbokun. 29Iyu, an at'áyini kamaku hágila Atambatun. 30Atambatun áhinuunhin t'afeeneŋ ni Yesu Kiris, abe akina Kiris ákinineŋe fu n'úmeyi búwesinato béenuutina bu t'Atambatun. Akina ákinineŋe fu yooŋ Atambatun n'ajok úne bakan kéejube, n'ajifan úne núuyemi bakan koone, abe n'áhin úne núufak tu wuhoofoor wu, 31naane bikiñjee i ti Míkiñjin mu. Meenaan: «An af'ámaŋi kamaku, amak tu buroon b'Atemit áhine bu barebare.»

will be added

X\