Tito 3

1Pata'aj hua'uta'ijcate'en ɨ tyaɨte mej mi meyan hua'astijre'en aɨme ɨ mej ti'ijta, majta aɨme ɨ mej ti'itɨj cɨn antyujmua'aree. Miche'e meyan huarɨni a'ij mej ti'ijxe'eve'e ɨ mej ti'ijta. Miche'e majta ahuaujca'anye'en mej mi maɨjna cɨn tyu'umuare'en ti'itɨ tɨ a'ij ti'ixa'apɨ'ɨn. 2Capaj hua'ata'acare'en mej a'ij pua'a tihua'ajeeva ɨ ruxa'a tyaɨte silu pata'aj ca'anijra'a hua'uta'an mej mi ru'ihuaamua'a mua'ara'ani tyamua'a naa, mej mi majta rɨ'ɨ tihua'uchaɨn ɨ seica. Miche'e majta rɨ'ɨ tihuaurixaate'en maj cai a'ij mana'a pua'a tyu'ujeeva. 3Capaj yá'uhua'anan a'ij tyej eenya'a ajcua ɨmɨ tyaj cai xɨ tya'atzaahuatya'acaa. Catu ti'itɨj u'umua'areeraca'a. Catu tyajta ti'itɨ a'astijra'acaa. Ti'itɨ tɨ na'a pu tacuanamua. Cu xuee tyej ravaɨra'acaa ca'anyejri cɨme'e ɨ tɨ tatzajta'an seijra'acaa tɨ a'ij pua'a een. Ajta ti'itɨ tɨ ta'aranajchaca'a, aɨj tu tyajta vaɨra'acaa. Ayaa tu ti'itítachaɨca'a tyej hua'ajchaɨra'acaa ɨ taxa'a tyaɨte. Seica mu majta tájchaɨra'acaa ityejmi. Tyajta ityan, ayaa tu che'eta tyana'a ityan tyajɨɨmua'a tu tájaaxaijvi'iraca'a seij tyajta seij. 4Ma ajta aɨn ɨ Dioj ɨ tɨ tu'irajtuaani, aɨ pu taata'a tyej teyan raaseij tɨ aɨn rɨ'ɨ tyamua'a ti'itachaɨ. Aɨ pu ajta taxe'eve'e. 5Aɨ pu xaa tu'irajtuaa. Capu aɨjna cɨn tu'irajtuaa aɨjna cɨme'e tyej teyan huarɨj ɨ tɨ i'ixa'apɨ'ɨn silu aɨjna cɨme'e tɨ aɨn tá'ancu'uvajxɨ'ɨ. Aɨ pu taajajcuare ɨ ruxaijnyu'uca cɨme'e. Cu xuee tyaj tyajtahua'a huanu'eihua ɨ Dioj jemi, aɨjna cɨme'e tɨ ta'ari'iri'i tɨ xana'avi'ira'acaa ɨ tajetze. 6Ruxaijnyu'uca pu xaa huatyajtuaa ityejmi jemi nain cɨme'e ɨ ruxé'evi'ira'a aɨjna cɨme'e tɨ tajapua huanyúu aɨjna ɨ Jesús tɨ ajta i'i Cɨriistu'u. 7Ayaa pu een cɨn raatyajtua tyejmi jemi tɨ i aɨn ayan tiraaxa'apɨ'ɨntare'en tyej ti cai che'e ti'itɨj cɨn autyaturan ɨ jemin aɨjna cɨme'e tɨ tá'ancu'uvajxɨ'ɨ. Ayaa tu een cɨn seijre'e tyej ti teri rachu'eve'e tɨ'ij titáacɨ'ɨti majca'ihua yee tyej ruuri ta'ara'ani jemin para rusen cɨme'e. 8Ayaa pu xaa nya'u ti'ayajna. Aɨj nu cɨn neyan ti'ijxe'eve'e paj muaa ca'anijra'a hua'uta'an mej mi rá'antzaahuate'en tɨj nyana'a neri timue'ixaa aɨme ɨ mej meri ra'astijre'e ɨ Dioj. Miche'e majta rɨ'ɨ mana'a maɨjna jetze ucarute maj rɨ'ɨ titetyújchaɨca maɨjna cɨme'e tɨ i'ixa'apɨ'ɨn. Tɨ pua'a meyan huarɨni, aɨ mu xaa rɨ'ɨ tiraata'asin ɨ Dioj, majta hua'utyavaɨre'en naijmi'ica. 9Ma majta seica, eihua mu maɨjna cɨn tyu'urihua'ura mua'aju'un maɨjna cɨme'e tɨ cai amiteere'e, majta seica maɨjna jetze ucaruti mej meyan ti'ixaata mua'aju'un yee a'atani tevijra'an jetze huanyej ɨ ruhuaacɨxa'astyamua'acɨ'ɨ. Majta seica, ayaa mu tyu'urihua'ura mua'aju'un maɨjna cɨme'e yee a'iqui huataujmua'a aɨjna ɨ nyuucari tɨ ra'uyu'uxaca'a aɨjna ɨ Moisés tyaacan. Ayaa mu een cɨn meyan autyahuijsin mej mi e'ita'a a'utácɨɨnye, majta mej mi huataujnya'usi'ite'en. Naijmi'i matɨj mana'a meyan e'en matɨj aɨme, camu ti'itɨj vaɨre'e. Capaj hua'ajaahuatya'a. 10Tɨ pua'a a'atɨ ayan tyajá'amua'ɨtziitya'a sej si seyan autyahuiini sej si e'ita'a a'utácɨɨnye, ayaa paj raaruuren. Pata'aj raata'ijmɨ seicajretze, na'ari hua'apuacajretze. Tɨ pua'a auj ayan rɨjca tɨ cai mua'astijra'a, pata'aj raataite ma a'ahua'a. 11Tɨ pua'a cai mua'astijre'e, ayaa papu'u een cɨn peyan tiraamua'aree tɨ aɨn ɨ tevi saɨque na'a ti'imuatze tɨ cai ayan tiraavijte'e. Pu'uri Dioj raaxa'apɨ'ɨntari'iri'i aɨjna cɨme'e tɨ pueijtzi raata'asin. 12Nyaa nu muaataiti'ira mueetzi jemi nyaɨjna ɨ Artemas, nyajta nyaɨjna ɨ Tíquico. Matɨ'ɨj maun a'ara'asti a'u pej a'utyejvee, aj paj xaa ahua'aca'anyen a'achu paj caj ru'umua'aree pej ya tanyen nyeetzi jemi, ayujna Nicópolis. Ayaa nu tiraaxa'apɨ'ɨntare nyej neyan nyeyun a'ateeri tɨj na'a ajna tɨ huaseevi'i a'ame. 13Pata'aj peyan huarɨni nain tɨj na'a tɨ í'irɨni paj hua'utavaɨre'en paɨjna ɨ Zenas, pajta paɨjna ɨ Apolos. Aɨjna ɨ Zenas, ai pu aɨn pueen seij tɨ ti'ixa'apɨ'ɨntare'e. Pata'aj hua'utavaɨre'en mej mi aun a'arácɨɨne. Pata'aj peyan rɨ'ɨ raaruuren tɨ ij cai ti'itɨ tihua'aturaatya'a. 14Majta aɨme ɨ tatyaɨtestyamua'a, ayaa pu ruxe'eve'e mej meyan tiraayɨ'ɨtɨhua'an mej maɨjna jetze ucarute mej meyan rɨjca ɨ tɨ i'ixa'apɨ'ɨn cɨme'e mej mi maɨjna cɨn huataujvaɨre'en. Na'ari cai, camu ti'itɨ cɨn huatyavaɨre'esin. 15Aɨ mu yaj muataujte'e matɨj mana'a pua'amua mej ye huatyáuu nya jamuan. Pata'aj peyan tihua'utataujte'en tajetze ma'acan aɨme ɨ maj taxe'eve'e, ɨ maj meyan che'eta mana'a tya'atzaahuate'e. Che'e rɨ'ɨ tyaja'amuavaɨra'a.

will be added

X\