Tito 2

1Ma pajta muaa, ayaa pu ruxe'eve'e pej peyan tihua'umua'aten mej mi meyan rɨ'ɨ titetyujcha'ɨ a'ij tɨ tiraavijte'e aɨjna cɨme'e mej tya'atzaahuate'e huataujnyáatacan cɨme'e. 2Pata'aj peyan tihua'umua'aten ɨ maj vaujsicɨra'i maj cai eihua raya'acare'en ɨ nahuaj, silu cɨj mu'u, mej mi seica rɨ'ɨ tihua'useij. Ruxe'eve'e mej mi rɨ'ɨ me tityaumuámua'aren, majta mej rɨ'ɨ titetyujcha'ɨ maɨjna cɨme'e mej ra'astijre'e ɨ tavastara'a. Ajta ayan ruxe'eve'e mej hua'uxe'eve'en ɨ ruxa'a tyaɨte, ajta mej mi tya'utaviicue'i tyamua'a naa. 3Pata'aj peyan che'eta pana'a tihua'umua'aten aɨme ɨ ucarijse mej mi majta rɨ'ɨ titetyujcha'ɨ. Capaj hua'ata'acare'en maj a'ij pua'a tyu'ujeeva seij ajta seij. Capu ajta ayan tiraavijte'e mej eihua raya'acare'en ɨ nahuaj, silu mej mi tihua'umua'aten ti'itɨ tɨ a'ij ti'ivaɨre'e. 4Miche'e maɨn jucarijse meyan tihua'umua'aten ɨ maj juuca ɨ maj auj tyaamua mej mi meyan tihua'uxe'eve'en ɨ rucɨna'astyamua'a, majta ɨ ruyaujmua'a. 5Ayaa pu ruxe'eve'e mej rɨ'ɨ metityaumuámua'aree aɨme ɨ maj mauj tyaamua, mej mi cai tyu'uxana'acɨre'en. Ajta, ayaa pu ruxe'eve'e mej nain cɨn ti'ichaɨj ɨ ruche. Ajta, mej mi rɨ'ɨ hua'ajchaɨ ɨ rutyaɨtestyamua'a. Miche'e majta hua'ara'astijre'en ɨ rucɨna'astyamua'a. Na'ari, tɨ pua'a macai ayan huarɨni, ɨ seica ɨ maj hua'aseij, camu che'e raataxe'eve'esin maj ra'ara'astijre'en ɨ tavastara'a. 6Ayaa paj che'eta pana'a ca'anijra'a hua'uta'an ɨ tyetyaca ɨ maj mauj tyaamua mej mi rɨ'ɨ metityaumuámua'are'en maɨjna cɨme'e a'ij mej rɨcɨ. 7Pajta muaa, pata'aj peyan aseijrata hua'a jemi tɨj saɨj tɨ ari arauraste nain cɨme'e a'ij nyej nyauchan timue'ixaa, aɨjna cɨme'e a'ij paj rɨcɨ tɨ i'i xa'apɨ'ɨn cɨme'e. Pata'aj tihuá'umua'aten tzaahuati'ira'a cɨme'e, pajta peyan tihua'utaseijrate'en tɨ huapɨ'ɨ ruxe'eve'e mej mi meyan huarɨni. 8Pata'aj peyan tihua'uta'ixaate'en tyamua'a naa a'ahuaritaacan cɨme'e a'ij tɨ tiraavijte'e mej mi cai meyan saɨque ti'ixajta. Ayaa paj huarɨni tɨ i hua'utatévi'iraste'en aɨme ɨ maj muájchaɨre'e maɨjna cɨme'e maj cai ti'itɨj cɨn huatanyuusin tɨ a'ij pua'a namuajre'e maj cɨn titaaxajtzi'i. 9Pata'aj peyan tihua'utajeeve aɨme ɨ mej ti'imuare'e ca'anyejri cɨme'e, mej mi hua'ara'astijre'en aɨme ɨ mej tihue'ijte'e. Miche'e meyan tyu'umuare'en mej mi nain cɨn rɨ'ɨ tihua'uta'an. Ayaa pu ruxe'eve'e maj cai a'ij mana'a tihua'ajeeva aɨme ɨ mej tihue'ijte'e. 10Mej mi majta cai tihua'anahue'ira, silu mej mi nain cɨn hua'ara'astijre'en, mata'aj cai ti'itɨj cɨn ata'ɨtza'ara'an. Tɨ pua'a meyan huarɨni, ayaa mu een cɨn ca'anijra'a hua'uta'asin ɨ seica mej mi majta raataxe'eve'en, maj majta ra'ara'astijre'en a'ij tyej tihua'amua'ate aɨjna cɨme'en tɨ Dioj tu'irajtuaani. 11Ee xaa, pu'uri me eijre'e seijre'e tɨ Dioj ari rɨ'ɨ tihua'acha'ɨ ɨ tyetyaca aɨjna cɨme'e tɨ Dioj ra'ujca'anye tɨ hue'irajtuaani naijmi'ica. 12Aɨj tu cɨn ramua'aree tɨ ayan ruxe'eve'e tyej ra'antipua'arite'en nain cɨme'e tɨ a'ij pua'a een ɨ Dioj jemi, ajta nain cɨn tyej rahuausin iiyan chaanaca japua, tɨ cai ayan a'ateeren rusen cɨme'e. Ajta, ayaa pu ruxe'eve'e tyej teyan rɨ'ɨ ti'ititacha'ɨ a'ij tɨ tiraavijte'e, a'ij tɨ ti'ijxe'eve'e ɨ Dioj. Ajta ayan ruxe'eve'e tyej rɨ'ɨ me tityaumuámua'aren tyatɨj tyana'a teyan a'ateerin iiyan japuan ɨ chaanaca tɨ yan seijre'e. 13Tyajtahua'a tu tyauj rachu'eve'en ɨ tyaj cɨn huatatyamua'ave'en ajna xɨcajra'a tɨ jetzen tyaja'ure'enyejsin ɨ tyej rachu'eve'en tɨ ajtahua'a ye huataseijre'esin aɨjna ɨ Dioj tɨ nain cɨn antyujmua'aree, tɨ ajta tu'irajtuaani. Ai pu aɨn pueen ɨ Jesús tɨ ajta i'i Cɨriistu'u. 14Aɨ pu huataura'a tɨ huamɨ'ɨni tajetze ma'acan tɨ ij aɨn tyu'unajchita nain cɨme'e a'ij tyej té'echaɨca'a ityan, tyaɨjna cɨme'e tyaj cai a'atzu ra'ara'astijre ɨ Dioj. Ayaa pu een cɨn ajta huamɨ'ɨ tajetze ma'acan tɨ ij rɨ'ɨ taaruuren ɨ tatzajta'a tyej ti tyaɨtestyamua'ame'en pueenya'a ta'ara'ani, tyej ti ahuátaca'anyen tyej ti teyan huarɨni i tɨ i'ixa'apɨ'ɨn cɨme'e. 15Aɨ pu aɨn pueen ɨ tɨ ruxe'eve'e pej peyan tihua'umua'aten. Pata'aj ca'anijra'a hua'uta'an nain cɨme'e ɨ paj cɨn anti'amua'aree. Pata'aj pajta hua'ajtya'axɨ'ɨn. Capaj hua'ata'acare'en tɨ a'atɨ a'ij pua'a ti'imuaseijra.

will be added

X\